ޕާލިމެންޓުގައި ސްރީލަންކާ ސަރުކާރު ތަމްސީލް ކުރާ ހުރިހާ މެމްބަރުންގެ ގެތައް ކައިރީގައި އާއްމުން އެއްވެ މުޒާހަރާ ކުރަމުންދާ ކަމަށް ނޫސްތަކުން ބުނެފި އެވެ.
ޑެއިލީ މިރާ ނޫހުން ބުނީ އެއްވެފައިވާ މީހުން ގޮވަނީ ޕާލިމެންޓް މެމްބަރުން ވަގުތުން އިސްތިއުފާ ދިނުމަށް ކަމަށެވެ.
ބައެއް ހިސާބުތަކުގައި މުޒާހަރާ ހޫނުވެ، ފުލުހުން ބާރުގެ ބޭނުން ކުރި ނަމަވެސް މުޒާހަރާގެ ބައިވެރިވުން އެނބުރި ގެތަކަށް ގޮސްފައެއް ނުވެ އެވެ.
ހޯމަ ދުވަހުގެ ހެނދުނު ބޮޑު ވަޒީރު މަހިންދަ ރާޖަޕަކްސަގެ ގެކޮޅު ކައިރިއަށް އެއްވި މީހުން ވަނީ ފުލުހުންގެ ބެރިކޭޑްތައް ވެސް ފަޅާލާފަ އެވެ.
އޭގެ އިތުރުން މުޒާހަރާއެއްގައި ބައިވެރިވާން މަސައްކަތް ކުރި ބުދު ދީނުގެ ފާދިރީއެއް އެ ތަނުން ދިޔުމަށް ވެސް މުޒާހަރާގެ ބައިވެރިން އެންގި އެވެ.
ރިޕޯޓުތައް ބުނާ ގޮތުން އެމެރިކާގެ ލޮސް އެންޖެލިސްގައި ގޮތަބަޔާގެ ދަރިކަލުން ދިރިއުޅުއްވާ ގެ ކައިރިއަށް ވެސް ލަންކާ ރައްޔިތުން ވަނީ ޖަމާވެފަ އެވެ.
އާ ކެބިނެޓް އައްޔަނު ކުރުމުގެ މަސައްކަތް
އާދީއްތަ ދުވަހުގެ ރޭ ބޮޑު ވަޒީރު ފިޔަވައި ކެބިނެޓްގެ އެހެން ހުރިހާ މިނިސްޓަރުން ވަނީ އިސްތިއުފާ ދެއްވާފަ އެވެ. އެއީ އިންތިގާލީ ސަރުކާރަށް ޖާގަ ދިނުމުގެ ގޮތުންނެވެ.
ހޯމަ ދުވަހު ރައީސް ގޮތަބަޔާގެ ކުރިފުޅުމަތީގައި އާ ކެބިނެޓުގެ ހަތަރު މިނިސްޓަރު ހުވާކުރެއްވި އެވެ. ނަމަވެސް އެއީ ކުރީގެ ކެބިނެޓުގައި ވެސް ތިއްބެވި މިނިސްޓަރުންނެވެ.
ބެސިލް ރާޖަޕަކްސަގެ ބަދަލުގައި ފިނޭންސް މިނިސްޓަރު ކަމަށް އަލީ ސަބްރީ އަދި ފޮރިން މިނިސްޓަރު ކަމަށް ގީއެލް ޕީރިސް ހަމަޖައްސާފައިވާ އިރު، އެޑިއުކޭޝަން މިނިސްޓަރު ކަމަށް ދިނޭޝް ގުނަވަރްދެނަ އަދި ހައިވޭ މިނިސްޓަރަކަށް ޖޯންސްޓަން ފެނަންޑޯ ވަނީ އައްޔަނު ކުރައްވާފަ އެވެ.
ބައެއް ފަރާތްތަކުން ދަނީ އެއީ އާ ކެބިނެޓެއް ނޫން ކަމަށާއި އެއީ ކުރިން ވެސް ކެބިނެޓުގައި ތިއްބެވި މެމްބަރުން އެހެން މިނިސްޓްރީތަކަށް އައްޔަނު ކުރުން ނުވަތަ "ކެބިނެޓް ރީޝަފްލް" އެއްގެ ގޮތުގައި ސިފަކުރަމުންނެވެ.
