ސްރީލަންކާ ރައްޔިތުންގެ ފިއްތުންތައް ކުރިމަތިވެ އާދީއްތަ ދުވަހުގެ ރޭ ކެބިނެޓް އިސްތިއުފާ ދިނުމާ އެކު ވަރަށް އަވަހަށް އިންތިގާލީ ސަރުކާރު އިއުލާނު ކުރަން ތައްޔާރުވެއްޖެ އެވެ.
އިގްތިސާދީ ކާރިސާއާ މެދު ހިތްހަމަނުޖެހިފައި ތިބި ރައްޔިތުން މުޒާހަރާ ކުރަން ފެށުމުން، 11 ސިޔާސީ ޕާޓީ ހިމެނޭ ކޯލިޝަނުން ރައީސް ގޮތަބަޔާ ރާޖަޕަކްސަ އާއި ބޮޑު ވަޒީރު މަހިންދަ ރާޖަޕަކްސައާ ބައްދަލުކުރީ އާދީއްތަ ދުވަހުގެ މެންދުރެވެ.
އެ ބައްދަލުވުމުގައި ޕާޓީތަކުން ހުށަހެޅީ އިންތިގާލީ ސަރުކާރެއް ގާއިމް ކުރުމަށެވެ. ކުރިއަށް އޮތް ދެ ހަފްތާ ތެރޭގައި އާ ސަރުކާރު އިއުލާނު ނުކުރާ ނަމަ، ސަރުކާރު ކޯލިޝަނުގައި ހިމެނޭ އެލްއެސްއެފްޕީގެ 14 ޕާލިމެންޓު މެމްބަރުން ސަރުކާރާ ވަކިވާނެ ކަމަށް ބުންޏެވެ.
ސިޔާސީ ހަމަޖެހުމަށް ޖާގަ ދިނުމުގެ ގޮތުން ބޮޑު ވަޒީރު މަހިންދަ ރާޖަޕަކްސަ އިސްތިއުފާ ދެއްވަން ތައްޔާރަށް ހުންނެވިކަން ހާމަކުރެއްވި ކަމަށް އެ ބައްދަލުވުމުގައި ބައިވެރިވި ފަރާތްތަކުން ނޫސްތަކަށް މައުލޫމާތު ދިނެވެ.
އެއާ އެކު މަހިންދަ ރާޖަޕަކްސަ އިސްތިއުފާ ދޭން ނިންމަވާފައިވާ ކަމަށް ނޫސްތަކުން ރިޕޯޓު ކުރި އެވެ. އެހެން ނަމަވެސް، އޭގެ ކުޑައިރުކޮޅެއް ފަހުން ބޮޑު ވަޒީރުގެ އޮފީހުން އެ ހަބަރުތައް ދޮގުކުރި އެވެ.
އާދީއްތަ ދުވަހުގެ ރޭގެ ވަގުތެއްގައި ކެބިނެޓް މިނިސްޓަރު ރައީސް އާއި ބޮޑު ވަޒީރާ އެކު ބޭއްވި ބައްދަލުވުމެއް ގިނަ ވަގުތުތަކެއް ވަންދެން ކުރިއަށް ދިޔަ އެވެ. އެންމެ ފުރަތަމަ އިސްތިއުފާ ދެއްވީ ޔޫޓު މިނިސްޓަރު ކަމުގައި ހުންނެވީ މަހިންދަ ރާޖަޕަކްސަގެ ދަރިކަލުން ނަމާލް ރާޖަޕަކްސަ އެވެ.
އޭގެ ފަހުން ޖަސްޓިސް މިނިސްޓަރު އަލީ ސަބްރީ ވެސް އިސްތިއުފާ ހުށަހެޅުއްވި އެވެ. އެއާ އެކު ކެބިނެޓުގެ ބާކީ ހުރިހާ މިނިސްޓަރުން ވެސް އިސްތިއުފާގެ ސިޓީގައި ސޮއިކުރަން އެއްބަސްވި އެވެ.
ޑެއިލީ މިރާ ނޫހުން ބުނީ އިސްތިއުފާގެ ސިޓީތަކާ އެކު ބޮޑު ވަޒީރު އަންގާރަ ދުވަހުގެ ހެނދުނު ރައީސްއާ ބައްދަލުކުރައްވާނެ ކަމަށެވެ. އެއަށްފަހު މިއަދު ވަގުތެއްގައި ގައުމާ މުހާތަބު ކުރައްވާނެ ކަމަށް ނުވަތަ ބަޔާނެއް ނެރުއްވާނެ ކަމަށް ބެލެވެ އެވެ.
ލަންކާގެ ކެބިނެޓް އިސްތިއުފާ ދިން ނަމަވެސް، އަންގާރަ ދުވަހުގެ ހެނދުނު ވެސް އެކި ހިސާބުތަކުގައި ރައްޔިތުންގެ މުޒާހަރާތައް ދަނީ ބާއްވަމުންނެވެ. އެހެންކަމުން ސެކިއުރިޓީ ވަނީ ވަރުގަދަކޮށްފަ އެވެ.
