ޕެރިސް (އޭޕްރީލް 4) - ފްރެންޗް ލީގުގައި މިރޭ ކީލިއަން އެމްބާޕޭ، ލިއޮނަލް މެސީ އަދި ނޭމާ، ލީގުގެ އެއް މެޗެއްގައި ފުރަތަމަ ފަހަރަށް ޕީއެސްޖީ އަށް ގޯލު ޖަހައިދިންއިރު، އެ ޓީމުން 5-1 އިން ލޮރިއެންޓް އަތުން މޮޅުވެއްޖެ އެވެ.
މެސީ، މި ސީޒަނުގައި ޕީއެސްޖީއާ ގުޅުނު ފަހުން އެއް މެޗެއްގައި ނޭމާ އާއި އެމްބާޕޭއާ އެކު ލަނޑު ލިސްޓަށް ފުރަތަމަ ފަހަރަށް އެރިއިރު، ތިން ކުޅުންތެރިންގެ ފަރާތުން ވެސް މޮޅު ކުޅުމެއް ފެނުނެވެ. މެޗުގެ ފުރަތަމަ ގޯލަކީ މި ތިން ކުޅުންތެރިންގެ ކޮމްބިނޭޝަނުން ޖެހި ގޯލެކެވެ. މެޗުގެ 12 ވަަނަ މިނިޓްގައި މެސީ ހުސް ތަނަށް ދިނީ އެމްބާޕޭ އަށެވެ. އޭނާ ހުސްކޮށްލާފައި ދިން ބޯޅަ ނޭމާ ވަނީ އޭރިއާތެެރެއިން ހަމަޖެހިލާފައި ގޯލަށް ވައްދާލައިފަ އެވެ.
މެޗުގެ 28 ވަނަ މިނިޓްގައި އެމްބާޕޭ ވަނީ ޕީއެސްޖީގެ ލީޑުފުޅާކޮށްދީފަ އެވެ. މި ގޯލު ޖަހަން އެމްބާޕޭ އަށް ފުރުސަތު ތަނަވަސްކޮށްދިނީ ޕީއެސްޖީގެ މެދުތެރޭގައި ގިނަ މެޗުތަކެއް ކުޅެމުން އަންނަ ސެނެގާލް މިޑްފީލްޑަރު އިދްރީސާ ގާނާ ގޭއި އެވެ.
ދެ ވަނަ ހާފުގައި ކުޅެން ނުކުމެ، ލޮރިއެންޓުން މެޗުގެ ތެރެއަށް ވަންނަން ކުރި މަސައްކަތުގައި ވަނީ ގޯލެއް ޖަހައިފަ އެވެ. މެޗުގެ 56 ވަނަ މިނިޓްގައި ލޮރިއެންޓަށް މި ގޯލު ޖަހައިދިނީ ތަރޭމް މޯފީ އެވެ. މި ގޯލާ އެކު ލޮރިއެންޓަށް ކުޑަ ދިރުމެއް ލިބުނު ނަމަވެސް އިތުރު ގޯލެއް ޖެހޭވަރުގެ ކުޅުމެއް ނުދެއްކުނެވެ. ޕީއެސްޖީ ފެނުނީ މާ ވަރުގަދަކޮށެވެ.
ޕީއެސްޖީގެ ތިން ވަަނަ ގޯލު ޖެހުމަށް ފަހު ހަކީމީ (ކ) އާއި އެމްބާޕޭ އުފާފާޅުކުރަނީ.-- ފޮޓޯ: އޭއެފްޕީ
މެޗުގެ 67 ވަަނަ މިނިޓްގައި އަޝްރަފް ހަކީމީ ދިން ބޯޅައަކުން އެމްބާޕޭ ވަނީ މެޗުގައި އޭނާގެ ދެ ވަނަ ގޯލު ޖަހައި، ޕީއެސްޖީ އަށް އަލުން ދެ ގޯލުގެ ލީޑެއް ނަަގައިދީފަ އެވެ. ޕީއެސްޖީން ފަހުން ޖެހި ދެ ގޯލަށް ފުރުސަތު ތަނަވަސްކޮށްދިނީ މެޗުގެ މޮޅު ކުޅުންތެރިޔާ، އެމްބާޕޭ އެވެ. އެ ގޮތުން މެޗުގެ 73 ވަނަ މިނިޓްގައި އެމްބާޕޭ ވަނީ މެސީ އަށް ގޯލު ޖަހަން ބޯޅަ ދީފަ އެވެ. މިއީ މެސީ މި ފަހަރު ލީގުގައި ކުޅުނު 19 މެޗުގައި ޖެހި ތިން ވަނަ ގޯލެވެ. މެސީ ވަނީ 11 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
މެޗުގެ އިތުރު ވަގުުތުގައި ނޭމާ، ޕީއެސްޖީގެ ފަސް ވަނަ ގޯލު ޖެހީ ވެސް އެމްބާޕޭ ރަނގަޅު ވަގުތުގައި ދިން ބޯޅައަކުންނެވެ. މި ސީޒަނުގެ ނިޔަލަށް ޕީއެސްޖީ ކޮންޓްރެކްޓްގައި ހުރި އެމްބާޕޭ އަށް މިއީ އެ ޓީމުގެ ޖޯޒީގައި އިންޑިވިޖުއަލީ އެންމެ ރަނގަޅު ސީޒަނެެވެ. އެމްބާޕޭ މި ސީޒަނުގައި މިހާތަނަށް ކުޅުނު 38 މެޗުން ވަނީ 28 ގޯލު ޖަހައި 20 ގޯލު ޖަހަން ފުރުސަތު ތަނަވަސްކޮށްދީފަ އެވެ.
ފްރެންޗް ލީގުގެ ބާކީ އަށް މެޗަށް ދާއިރު، ޕީއެސްޖީ އެއް ވަނައިގައި އޮތީ 30 މެޗުން 68 ޕޮއިންޓް ހޯދައިގެންނެވެ. ދެ ވަނައިގައި މާސޭ އޮތީ މިރޭ ސެއިން އެޓިއެން އަތުން 4-2 އިން ހޯދި މޮޅާ އެކު 30 މެޗުން 56 ޕޮއިންޓް ހޯދައިގެންނެވެ.
