ސްރީލަންކާގެ ބޮޑު ވަޒީރު މަހިންދަ ރާޖަޕަކްސަ އިސްތިއުފާ ދޭން އުޅޭ ކަމަށް ފެތުރޭ ހަބަރުތައް ބޮޑު ވަޒީރުގެ މީޑިއާ ސެކެޓްރީއިން ދޮގުކޮށްފި އެވެ.
އިސްތިއުފާ ދޭން އުޅޭ ހަބަރު ދޮގުކުރި ނަމަވެސް، ޑެއިލީ މިރާ ނޫހުން ބުނީ އިދިކޮޅު މެމްބަރުންނާ އެކު ވަރަށް އަވަހަށް އާ ކެބިނެޓެއް ހުވާ ކުރާނެ ކަމަށެވެ.
އެގާރަ ސިޔާސީ ޕާޓީ ހިމެނޭ ކޯލިޝަނާ އެކު އާދީއްތަ ދުވަހު ބޭއްވި ބައްދަލުވުމުގައި އެ ޕާޓީތަކުން ރައީސް ގޮތަބަޔާ ރާޖަޕަކްސަ އާއި ބޮޑު ވަޒީރަށް ހުށަހެޅުއްވީ އިންތިގާލީ ސަރުކާރެއް ގެނައުމަށެވެ.
އެ ސަރުކާރުގައި މުޅިން އާ ބޮޑު ވަޒީރެއް ހުރުން މުހިއްމު ކަމަށް ޕާޓީތަކުން ބުންޏެވެ. އެހެންކަމުން މަސްދަރުތަކާ ހަވާލަދީ ލަންކާގެ ނޫސްތަކުން ކުރިން ބުނީ މަހިންދަ ރާޖަޕަކްސަ އިސްތިއުފާ ދެއްވާނެ ކަމަށެވެ.
ލަންކާއަށް ކުރިމަތިވެފައިވާ ކާރިސާއިން އަރައިގަތުމަށް އިންތިގާލީ ސަރުކާރެއް ގާއިމް ކުރުމަށް 11 ސިޔާސީ ޕާޓީ ހިމެނޭ ކޯލިޝަނުން އެންމެ ފުރަތަމަ ގޮވާލީ ހޮނިހިރު ދުވަހު އެވެ.
ނޫސްވެރިންގެ ބައްދަލުވުމެއްގައި ނޭޝަނަލް ފްރީޑަމް ފްރަންޓް (އެންއެފްއެފް) ގެ ލީޑަރު ވިމާލް ވީރަވަންސަ ވިދާޅުވީ އިގްތިސާދާ ގުޅޭ ރޭވުން ހަދަން ޖެހޭނީ ޕާލިމެންޓުގައި ރައްޔިތުން ތަމްސީލް ކުރާ ހުރިހާ ޕާޓީއެއް އެކުގައި ކަމަށެވެ. އޭގެ ފަހުން ގާނޫނު އަސާސީއާ އެއް ގޮތްވާ ގޮތަކަށް މުޅިން އާ ކެބިނެޓެއް އެކުލަވާލަން އޭނާ ގޮވާލެއްވި އެވެ.
ޕިވިތުރު ހެލާ އުރުމަޔާ (ޕީއެޗްޔޫ) ގެ ލީޑަރު އުދެޔާ ގައްމަންޕިލަ ވިދާޅުވީ އިންތިގާލީ ސަރުކާރެއް ގާއިމް ކުރެވުމާ އެކު، އާ އިންތިހާބެއް ބާއްވަން އިއުލާން ކުރަން ޖެހޭ ކަމަށެވެ. އޭނާ ތުހުމަތު ކުރެއްވީ ރައްޔިތުން ބަނޑުހައި ހޫނުކަމާއި ކަނު އަނދިރީގައި ދިރިއުޅެމުންދާ އިރު، ދަރަނި ދެއްކުމަށް ސަރުކާރުން ހަތް ބިލިއަން ޑޮލަރު ހޭދަކުރަން އުޅޭ ކަމަށެވެ. އޭނާ ގޮވާލެއްވީ ދަރަނި ދެއްކުން މެދުކަނޑާލުމަށެވެ.
ސްރީލަންކާ ފްރީޑަމް ޕާޓީ (އެސްއެލްއެފްޕީ) އިން ސަރުކާރަށް ގޮވާލީ އިންތިގާލީ ސަރުކާރެއް ގާއިމް ކުރުމަށެވެ. އެ ޕާޓީއިން ބުނީ އިންތިގާލީ ސަރުކާރެއް ގާއިމް ނުކުރާ ނަމަ، ވެރިކަން ކުރާ ކޯލިޝަނުން އިސްތިއުފާ ދޭނެ ކަމަށެވެ.
