ސްރީލަންކާގެ ބޮޑު ވަޒީރުކަމުން މަހިންދަ ރާޖަޕަކްސަ އިސްތިއުފާ ދޭން ނިންމަވާފައިވާ ކަމަށް ލަންކާގެ ނޫސްތަކުން ބުނެފި އެވެ.
ޑެއިލީ މިރާ ނޫހުން ބުނީ ރައީސް ގޮތަބަޔާ ރާޖަޕަކްސަ އާއި މަހިންދަ ރާޖަޕަކްސަ އިންތިގާލީ ސަރުކާރެއް ގެންނަން މިއަދު ނިންމެވި ކަމަށެވެ.
އެހެންކަމުން، އާ ސަރުކާރަށް ޖާގަ ދިނުމުގެ ގޮތުން މަހިންދަ ރާޖަޕަކްސަ އިސްތިއުފާ ދޭން ނިންމަވާފައިވާ ކަމަށް އެ ނޫހުން ބުންޏެވެ.
އެގާރަ ސިޔާސީ ޕާޓީ ހިމެނޭ ކޯލިޝަނާ އެކު އާދީއްތަ ދުވަހު ބޭއްވި ބައްދަލުވުމުގައި އެ ޕާޓީތަކުން ރައީސް އާއި ބޮޑު ވަޒީރަށް ހުށަހެޅުއްވީ އިންތިގާލީ ސަރުކާރެއް ގެނައުމަށެވެ. އަދި އެ ސަރުކާރުގައި މުޅިން އާ ބޮޑު ވަޒީރެއް ހުރުން މުހިއްމު ކަމަށް ހުށަހެޅި އެވެ.
އެ ހުށަހެޅުން ބަލައިގަންނަ ކަމަށް ރައީސް އާއި ބޮޑު ވަޒީރު ވިދާޅުވި ކަމަށް މަސްދަރުތަކުން ބުނެ އެވެ. އަދި މަހިންދަ ރާޖަޕަކްސަގެ ބަދަލުގައި އެސްއެލްޕީޕީގެ އެހެން ޕާލިމެންޓް މެމްބަރަކު ބޮޑު ވަޒީރު ކަމަށް ގެންނާނެ ކަމަށް ބެލެވެ އެވެ.
އެގޮތުން އާ ބޮޑު ވަޒީރުގެ މަގާމަށް ހުށަހަޅާފައި ވަނީ ދިނޭޝް ގުންވަވަރްޑެނަގެ ނަން ކަމަށް މަސްދަރުތަކުން ބުނެ އެވެ. ނަމަވެސް ރަސްމީކޮށް އެކަން އިއުލާނުކޮށްފައެއް ނުވެ އެވެ.
ފިނޭންސް މިނިސްޓަރު ބެސިލް ރާޖަޕަކްސަގެ ބަދަލުގެ އެ މަގާމަށް ހުށަހަޅާފައި ވަނީ އިދިކޮޅު ފަޅިން ހަރްޝާ ޑެ ސިލްވާގެ ނަން ކަމަށް ވެސް ނޫސްތަކުގައިވެ އެވެ.
