ސްރީލަންކާގައި ހިންގަމުންދާ ކާފިއުއަށް ބެލުމެއް ނެތި ޔުނިވާސިޓީ އޮފް ޕެރަޑެނިޔާގެ ދަރިވަރުން ކުރަމުން ދިޔަ މުޒާހަރާ ރޫޅާލަން ފުލުހުން ބާރުގެ ބޭނުންކޮށްފި އެވެ.
ކެންޑީގައި ކުރިއަށް ދިޔަ އެއްވުން ރޫޅާލަން ފުލުހުން ވަނީ ކަރުނަ ގޭހާއި ބާރު ސްޕީޑުގައި ފެން ޖަހާފަ އެވެ. އެއީ ޕެރަޑެނިޔަ ޔުނިވާސިޓީ ސްޓުޑަންޓްސް ޔޫނިއަނުން ރޭވި މުޒާހަރާ އެކެވެ.
ކެންޑީގެ އިތުރުން ވެރިރަށް ކޮލޮމްބޯގެ އިންޑެޕެންޑެން ސްކޮޔާއަށް އިދިކޮޅު ލީޑަރު ސަޖިތު ޕްރޭމަދާސާ ވަނީ ސަޕޯޓަރުންނާ އެކު ވަޑައިގެންފަ އެވެ. ނަމަވެސް ފުލުހުން ވަނީ އެ މީހުން ވެސް ހުއްޓުވާފަ އެވެ.
ލަންކާގެ އިދިކޮޅު ފަރާތްތަކުން އެއްވުމުގައި. -- ފޮޓޯ: ޑެއިލީ މިރާ
އިދިކޮޅު ލީޑަރާ އެކު ގިނަ އަދަދެއްގެ އިދިކޮޅު ޕާލިމެންޓް މެމްބަރުން ވެސް އެ އެއްވުމުގައި ބައިވެރިވި އެވެ. އޭގެ ތެރޭގައި ސަރަތު ފޮންސެކަ އަދި ޕަޓަލި ޗަމްޕިކަ ރަނަވަކަ ހިމެނިވަޑައިގަންނަވަ އެވެ.
އޭގެ އިތުރުން އޮސްޓްރޭލިއާ އާއި ނިއުޒީލޭންޑުގައި ތިބި ލަންކާ ރައްޔިތުން ވެސް ދަނީ ސަރުކާރާ ދެކޮޅަށް މުޒާހަރާ ކުރަމުންނެވެ. އެގޮތުން ނިއުޒީލޭންޑްގެ އޯކްލޭންޑް އަދި އޮސްޓްރޭލިއާގެ ޕާތު، ބްރިޒްބޭން، ސިޑްނީ އަދި މެލްބާންގައި ދިރިއުޅޭ ލަންކާ ރައްޔިތުން އެއްވުންތައް ބޭއްވި އެވެ.
ގައުމުން ބޭރުގައި ދިރިއުޅޭ ލަންކާ ރައްޔިތުން މުޒާހަރާ ކުރަނީ. -- ފޮޓޯ: ޑެއިލީ މިރާ
ގައުމުގެ ހާލަތާ މެދު ހިތްހަމަނުޖެހި ސުލްހަވެރިކަމާ އެކު ހިޔާލު ފާޅު ކުރަން މަސައްކަތް ކުރުމުން، ކާފިއު ހިންގައި ރައްޔިތުންނަށް އިތުރަށް ގޮންޖެހުންތައް ޖައްސަމުންދާ ކަމަށް އެ މީހުން ބުންޏެވެ.
ލަންކާ ސަރުކާރުން ނިންމާފައި ވަނީ ހޯމަ ދުވަހުގެ ހެނދުނު 06:00 އާ ހަމައަށް ކާފިއު ހިންގުމަށެވެ. އެގޮތަށް ނިންމީ އާދީއްތަ ދުވަހު ރައްޔިތުން މުޒާހަރާއަށް ނުކުންނަން އިއުލާނުކޮށްފައި ވަނިކޮށެވެ.
