ސްރީލަންކާގައި ޓްވިޓާ، ފޭސްބުކް އަދި ޔޫޓިއުބް ހިމެނޭ ގޮތަށް ސޯޝަލް މީޑިއާ ސައިޓުތައް ބްލޮކްކޮށްފައިވާ ކަމަށް ނޫސްތަކުން ބުނެފި އެވެ.
ޑެއިލީ މިރާ ނޫހުން ބުނީ ސޯޝަލް މީޑިއާ އެޕްތައް ޑައުންލޯޑް ކުރުމާއި ބޭނުން ކުރުމުގައި އާއްމުންނަށް ދަތިވާ ކަމުގެ ޝަކުވާ އިތުރުވެފައިވާ ކަމަށެވެ.
ސޯޝަލް މީޑިއާ ސައިޓުތައް ބްލޮކް ކުރުމުން ވީޕީއެންގެ އެހީގައި ސައިޓުތައް ބޭނުން ކުރަމުންދާ އިރު، އެ ފިޔަވަޅަކީ ބޭކާރު ފިޔަވަޅެއްގެ ގޮތުގައި ސްޕޯޓްސް މިނިސްޓަރު ނަމާލް ރާޖަޕަކްސަ ވަނީ ސިފަކުރައްވާފަ އެވެ.
"ސޯޝަލް މީޑިއާ ބްލޮކް ކުރުމަށް އަޅުގަނޑު ދުވަހަކު ވެސް ތާއީދެއް ނުކުރާނަން. ވީޕީއެން ލިބެން ހުރުމަކީ އެފަދަ ނިންމުމުގެ ބޭކާރުކަން ދޭހަވާ ކަމެއް. އަޅުގަނޑު ވެސް މި އުޅެނީ ވީޕީއެންގައި،" ނަމާލް ވިދާޅުވި އެވެ.
ނަމާލް ސަރުކާރަށް ގޮވާލެއްވީ ވިސްނުން ބަދަލުކޮށް، ސޯޝަލް މީޑިއާ ބްލޮކް ކުރުން އުވާލުމަށެވެ.
ނޫސްތަކުން ބުނާ ގޮތުން ސޯޝަލް މީޑިއާ ސައިޓްތައް ބްލޮކް ކުރީ ޓެލެކޮމިއުނިކޭޝަންސް ރެގިއުލޭޓަރީ އޮތޯރިޓީގައި ޑިފެންސް މިނިސްޓްރީން އެދުމުންނެވެ.
އެގޮތުން ފޭސްބުކް، ވަޓްސްއެޕް، އިންސްޓަގްރާމް، ޓްވިޓާ، ޔޫޓިއުބް އަދި އެހެނިހެން ސޯޝަލް މީޑިއާ ނެޓްވޯކްތަކާއި ސައިޓްތައް ވަނީ ބްލޮކްކޮށްފަ އެވެ.
