އިންތިގާލީ ސަރުކާރެއް ގެންނަން ޕާލިމެންޓުން ފާސްކޮށްފި ނަމަ ސިޔާސީ އެއްބައިވަންތަ ކަމަށް ޖާގަ ދިނުމުގެ ގޮތުން މިނިސްޓަރު ކަމުން އިސްތިއުފާ ދެއްވާނެ ކަމަށް ސްރީލަންކާގެ ސްޕޯޓްސް މިނިސްޓަރު ނަމާލް ރާޖަޕަކްސަ ވިދާޅުވެއްޖެ އެވެ.
ލަންކާގެ އިގްތިސާދީ ކާރިސާއާ ގުޅިގެން އާއްމުން ރުޅި ގަދަވެ ސަރުކާރުގެ އިސްތިއުފާއަށް ގޮވަން ފަށާފައި ވަނިކޮށް 11 ސިޔާސީ ޕާޓީއަކުން ވަނީ އިންތިގާލީ ސަރުކާރެއް ގާއިމް ކުރުމަށް ފަހު އާ އިންތިހާބަކަށް އިއުލާނު ކުރުމަށް ބާރު އަޅާފަ އެވެ.
އެކަމާ ގުޅޭ ގޮތުން ޑެއިލީ މިރާ ނޫހަށް ނަމާލް ވިދާޅުވީ މިއީ އިންތިހާބަކަށް ދާންވީ ވަގުތު ނޫން ކަމަށާއި ނަމަވެސް އިންތިގާލީ ސަރުކާރެއް ގާއިމްކޮށްފި ނަމަ ސިޔާސީ އެއްބައިވަންތަ ކަމަށް މިނިސްޓަރު ކަމުން އިސްތިއުފާ ދެއްވާނެ ކަމަށެވެ.
ޑެއިލީ މިރާ ނޫހުން ބުނީ އިންތިގާލީ ސަރުކާރެއް ގާއިމް ކުރަން ޕާޓީތަކުން ގޮވާލުމާ އެކު، ސަރުކާރުގެ ތެރޭގައި އެކަން މަޝްވަރާ ކުރަމުންދާ ކަމަށެވެ.
ނަމާލް ވިދާޅުވީ މި ވަގުތު އިގްތިސާދީ އެއްބައިވަންތަކަން އިސްކުރަން ޖެހޭ ކަމަށާއި ތެލުގެ ދަތިކަމާއި ގޭހުގެ ދަތިކަން އަދި ހަކަތައިގެ ކާރިސާ ހައްލު ކުރަން އަވަސް ފިޔަވަޅު އަޅަމުންދާ އިރު، ގައުމު ކުރިއަށް ގެންދަން ސިޔާސީ އެއްބައިވަންތަކަން ވެސް ބޭނުންވާ ކަމަށެވެ.
"މިކަން އަޅުގަނޑުގެ ސިކުނޑީގައި ބަހައްޓައިގެން، އިންތިގާލީ ސަރުކާރެއް ގާއިމްކޮށްފި ނަމަ، ހުރިހާ މަގާމަކުން އިސްތިއުފާ ދޭނަން،" ނަމާލް ވިދާޅުވި ކަމަށް ޑެއިލީ މިރާ ނޫހުގައިވެ އެވެ.
ލަންކާއަށް ދިމާވެފައިވާ ކާރިސާގައި ސަރުކާރުގެ އިސްތިއުފާއަށް އާއްމުން ގޮވަމުންދާ އިރު، އެންމެ ބޮޑު ފާޑުކިޔުމެއް އަމާޒު ވަނީ ވެރިކަމުގައި އޮތް ރާޖަޕަކްސަ އާއިލާއަށެވެ.
ރައީސްގެ މަގާމުގައި ގޮތަބަޔާ ރާޖަޕަކްސަ ހުންނެވި އިރު ބޮޑު ވަޒީރުގެ މަގާމުގައި ހުންނެވީ ރައީސްގެ ބޭބޭފުޅު އަދި ކުރީގެ ރައީސް މަހިންދަ ރާޖަޕަކްސަ އެވެ. ފިނޭންސް މިނިސްޓަރުގެ މަގާމުގައި ހުންނެވީ ރައީސްގެ ކޮއްކޯފުޅު ބެސިލް ރާޖަޕަކްސަ އެވެ. ނަމާލްއަކީ މަހިންދަ ރާޖަޕަކްސަގެ ދަރިކަލުންނެވެ.
