ހޮނިހިރު ދުވަހުގެ އިރުއޮއްސި 06:00 އިން ހޯމަ ދުވަހުގެ ހެނދުނު 06:00 އާ ދެމެދު މުޅި ސްރީލަންކާގައި ކާފިއު ހިންގަން އިއުލާނުކޮށްފި އެވެ.
އިގްތިސާދީ ކާރިސާގެ ސަބަބުން އާއްމުން ރުޅި ގަދަވެ މުޒާހަރާ ކުރަން ފަށާފައިވާ ސްރީލަންކާގައި ހުކުރު ދުވަހުގެ ރޭ ކުއްލި ނުރައްކަލުގެ ހާލަތު ވެސް އިއުލާނު ކުރި އެވެ.
ބުރާސްފަތި ދުވަހުގެ ރޭ ރައީސް ގޮތަބަޔާ ރާޖަޕަކްސަގެ ގެކޮޅު ކައިރީގައި ބޭއްވި މުޒާހަރާއެއްގައި ހަމަނުޖެހުން އުފެދުނު އިރު، އެއީ ހަރުކަށި ބަޔެއްގެ އަމަލުތައް ކަމަށް ސަރުކާރުން ބުންޏެވެ.
ނަމަވެސް ރިޕޯޓުތައް ބުނާ ގޮތުން މުޒާހަރާ ކުރަމުން ދަނީ އާއްމު ރައްޔިތުންނެވެ. އާދީއްތަ ދުވަހު ވެސް އާއްމުންގެ ބޮޑު އެއްވުމެއް ބާއްވަން ދަނީ ތައްޔާރުވަމުންނެވެ.
ހޮނިހިރު ދުވަހުގެ ރޭ ކާފިއު ހިންގަން ފެށުމާ އެކު އަންނަ ހޯމަ ދުވަހުގެ ހެނދުނާ ހަމައަށް ހުރިހާ ބަސް ދަތުރުތަކާއި ރޭލު ދަތުރުތައް ވަނީ މެދުކަނޑާލާފަ އެވެ.
އޭގެ އިތުރުން ކާފިއު ހިންގާ މުއްދަތުގައި ތާވަލުކޮށްފައިވާ އިމްތިހާންތަކާއި ޒަރޫރީ ހަރަކާތްތަކަށް ނޫން ގޮތަކަށް ދަރިވަރުން ސްކޫލަށް ނުފޮނުވަން އެޑިއުކޭޝަން މިނިސްޓްރީން އަންގާފައިވެ އެވެ.
