ސްރީ ލަންކާގައި ކުއްލި ނުރައްކަލުގެ ހާލަތު އިއުލާނު ކުރުމާއެކު ހަތިޔާރާއެކު ގިނަ އަދަދެއްގެ ސިފައިން އެކި ހިސާބުތަކުގައި ފޯރި މަރަން ފަށައިފި އެވެ.
ހުކުރު ދުވަހުގެ ރޭ ކުއްލި ނުރައްކަލުގެ ހާލަތު އިއުލާނު ކުރީ ކުއާއްމު ރައްކާތެރިކަމާއި، ހަމަޖެހުން ގާއިމްކޮށް، ހިދުމަތާއި ތަކެތި ސަޕްލައި ކުރުމުގައި ހުރަސްތައް ކުރިމަތިވިޔަ ނުދިނުމަށް ކަމަށް ގެޒެޓުގައި ޝާއިއުކުރި އަމުރުގައިވެ އެވެ.
ރައީސްގެ ގެކޮޅު ކައިރީގައި ބުރާސްފަތި ދުވަހުގެ ރޭ އޮތް އެއްވުމުގައި ހަމަނުޖެހުން އުފެދި، ނޫސްވެރިން ހިމެނޭ ގޮތަށް 45 މީހުން ހައްޔަރު ކުރި އެވެ.
ލަންކާ ރައްޔިތުން މަގުތަކަށް ނުކުމެ މުޒާހަރާ ކުރަން ފެށީ ގައުމަށް ދިމާވެފައިވާ މާލީ އަދި އިގްތިސާދީ ކާރިސާއަށް ހައްލު ނުލިބި ދިގުލައިގެން ގޮސްފައި ވާތީ އެވެ.
ކޮންމެ ދުވަހަކު ވެސް އެތައް ގަޑިއިރަކަށް ކަރަންޓުގެ ހިދުމަތް ކަނޑަމުންދާ އިރު، އާއްމު ދިރިއުޅުމަށް ވަނީ ހުރަސް އެޅިފަ އެވެ. އެހެންވެ، މުޒާހަރާގެ ބައިވެރިން ގޮވާލަނީ ސަރުކާރުގެ އިސްތިއުފާ އަށެވެ.
ނޫސްތަކުން ބުނީ ހޮނިހިރު ދުވަހު ހެނދުނު ހަތިޔާރު ހިފައިގެން ގިނަ އަދަދެއްގެ ސިފައިން އުޅޭ މަންޒަރު ފެނުނު ކަމަށެވެ. އެގޮތުން އެސޯލްޓް ރައިފަލް ހިފައިގެން ތެޔޮ ސްޓޭޝަންތަކާއި އެހެން ތަންތަނުގައި ސިފައިން ދަނީ ފޯރި މަރަމުންނެވެ.
"ކުއްލި ނުރައްކާ އިއުލާނު ކުރުމުގެ ކުރިން ސިފައިންނަށް މިގޮތަށް އަމިއްލައަށް ނުކުމެ އުޅުމުގެ ބާރެއް ނޯވޭ. އޭރު ޖެހެނީ ފުލުހުން އެދުމުން އެހީ ފޯރުކޮށްދޭން. އެކަމަކު ހުކުރު ދުވަހުން ފެށިގެން ސިފައިން އެ މަސައްކަތް ކުރަނީ ފުލުހުން އެދިގެންނެއް ނޫން،" އިސް ފުލުހަކު އޭއެފްޕީއަށް ބުންޏެވެ.
ކުއްލި ނުރައްކާ އިއުލާނުކޮށްފައިވާ އިރު، އާދީއްތަ ދުވަހު މުޅި ސްރީލަންކާގައި ބޮޑު މުޒާހަރާއަކަށް ދަނީ ތައްޔާރުވަމުންނެވެ.
