ސްރީލަންކާގައި ކުއްލި ހާލަތު އިއުލާނުކޮށް، ހުޅަނގު ޕްރޮވިންސްގައި ހަ ގަޑިއިރު ވަންދެން ކާފިއު ހިންގަން ރައީސް ގޮތަބަޔާ ރާޖަޕަކްސަ ނިންމަވައިފި އެވެ.
ކުއްލި ހާލަތު އިއުލާނު ކުރީ އާއްމު ރައްކާތެރިކަމާއި، ހަމަޖެހުން ގާއިމްކޮށް، ހިދުމަތާއި ތަކެތި ސަޕްލައި ކުރުމުގައި ހުރަސްތައް ކުރިމަތިވިޔަ ނުދިނުމަށް ކަމަށް ގެޒެޓުގައި ޝާއިއުކުރި އަމުރުގައިވެ އެވެ.
މުޅި ސްރީލަންކާގައި ކުއްލި ހާލަތު އިއުލާނުކޮށްފައިވާ އިރު، ހުޅަނގު ޕްރޮވިންސްގައި ކާފިއު ހިންގީ ހަ ގަޑިއިރުގެ މުއްދަތަކަށެވެ. ހޮނިހިރު ދުވަހު ހެނދުނު 06:00 ގައި ކާފިއު ވަނީ ނިންމާލާފަ އެވެ.
ރޭ ދަންވަރު ކާފިއު ހިންގީ ކޮލޮމްބޯގެ އެކި ހިސާބުތަކުގައި އާއްމުން މުޒާހަރާ ކުރަން ފެށުމުންނެވެ. ބުރާސްފަތި ދުވަހުގެ ރޭ ވެސް މުޒާހަރާއެއް އޮތެވެ.
ރައީސްގެ ގެކޮޅު ކައިރީގައި ބުރާސްފަތި ދުވަހުގެ ރޭ އޮތް އެއްވުމުގައި ހަމަނުޖެހުން އުފެދި، ނޫސްވެރިން ހިމެނޭ ގޮތަށް 45 މީހުން ހައްޔަރު ކުރި އެވެ.
ލަންކާ ރައްޔިތުން މަގުތަކަށް ނުކުމެ މުޒާހަރާ ކުރަން ފެށީ ގައުމަށް ދިމާވެފައިވާ މާލީ އަދި އިގްތިސާދީ ކާރިސާއަށް ހައްލު ނުލިބި ދިގުލައިގެން ގޮސްފައި ވާތީ އެވެ.
ކޮންމެ ދުވަހަކު ވެސް އެތައް ގަޑިއިރަކަށް ކަރަންޓުގެ ހިދުމަތް ކަނޑަމުންދާ އިރު، އާއްމު ދިރިއުޅުމަށް ވަނީ ހުރަސް އެޅިފަ އެވެ. އެހެންވެ، މުޒާހަރާގެ ބައިވެރިން ގޮވާލަނީ ސަރުކާރުގެ އިސްތިއުފާ އަށެވެ.
