ސްރީލަންކާއަށް ކުރިމަތިވެފައިވާ އިގްތިސާދީ ކާރިސާގައި އާއްމު ދިރިއުޅުމަށް ހުރަސް އެޅިފައި ވާތީ، ގިނަ ބަޔަކު ނުރުހުން ފާޅު ކުރަން ފެށުމާ އެކު، ރައީސް ގޮތަބަޔާ ރާޖަޕަކްސަގެ ފޭސްބުކް ޕޭޖުގައި ކޮމެންޓު ނުކުރެވޭ ގޮތް ހަދައިފި އެވެ.
ޑެއިލީ މިރާ ނޫހުން ބުނީ ގޮތަބަޔާ ބައިވެރިވެވަޑައިގަންނަވާ ރަސްމީ ހަރަކާތްތަކުގެ މައުލޫމާތާ އެކު ޕޭޖު ގަވާއިދުން އަޕްޓޭޑް ކުރަމުން ދިޔަ ނަމަވެސް، އާއްމުންނަށް އެއްވެސް ހިޔާލެއް ފާޅު ނުކުރެވޭ ގޮތް ހަދާފައިވާ ކަމަށެވެ. އެކަމަކު ޕޯސްޓުތަކަށް ރިއެކްޓުކޮށް، ޝެއާ ކުރެވެ އެވެ.
އެ ބަދަލު ގެނައީ ބުދަ ދުވަހު އެވެ. ލަންކާ ރައްޔިތުން ސަރުކާރާ މެދު ހިތްހަމަނުޖެހުން ފާޅު ކުރަން ފެށީ، އިގްތިސާދީ ކާރިސާގައި ކޮންމެ ދުވަހަކު ވެސް ގަޑިއިރުތަކެއް ވަންދެން ކަރަންޓުގެ ހިދުމަތް ކެނޑުން ފަދަ އެތައް ގޮންޖެހުންތަކާ ކުރިމަތިވާން ފެށުމުންނެވެ.
ގޮތަބަޔާގެ ގެކޮޅު ކައިރިއަށް އާއްމުން އެއްވެފައި. -- ފޮޓޯ: ޑެއިލީ މިރާ
ރުޅި ގަދަވެފައި ތިބި ގިނަ އަދަދެއްގެ އާއްމުން ވަނީ ބުރާސްފަތި ދުވަހުގެ ރޭ ގޮތަބަޔާ ދިރިއުޅުއްވާ ގެކޮޅު ކައިރިއަށް އެއްވެ މުޒާހަރާކޮށްފަ އެވެ. އެ ސަރަހައްދުގެ ސެކިއުރިޓީ ވަރުގަދަކޮށް، ސަލާމަތީ ކަންކަން ބެލެހެއްޓުމަށް ސިފައިން ހަރަކާތްތެރިވި އެވެ.
އަންނަ އާދީއްތަ ދުވަހު ވެސް ރައްޔިތުންގެ ބޮޑު މުޒާހަރާއެއް ބޭއްވުމަށް ދަނީ ތައްޔާރުވަމުންނެވެ. ސޯޝަލް މީޑިއާ އާއި ސޯޝަލް ނެޓްވޯކްތަކުގައި އުޅޭ އެތައް ހާސް އާއްމުން ރާވަމުންދާ މުޒާހަރާއަށް ބައެއް ސިޔާސީ ޕާޓީތަކުން ވެސް ތާއީދުކުރެ އެވެ.
