އާންމުން ކުރާ ވިޔަފާރީތަކުގެ ތެރެއަށް ވަންނަން، ކުންފުނި އުފައްދަން ބައެއް ކައުންސިލްތަކުން ހުށަހަޅަމުންދާ ކަމަށް ހުޅުމާލޭ ދާއިރާގެ މެމްބަރު އަލީ ނިޔާޒް އިއްޔެ ވިދާޅުވެއްޖެ އެވެ.
އަތޮޅު އަދި ރަށު ކައުންސިލުތަކަށް މާލީ ބާރުވެރިކަންދީ ލާމަރުކަޒީ ނިޒާމު ހަރުދަނާ ކުރުމަށް މި ސަރުކާރުން ގާނޫނަށް ގެނައި ބޮޑެތި އިސްލާހުތަކުގެ ތެރޭގައި ކުންފުންޏާއި ކޯޕަރޭޓިވްސް އުފައްދައިގެން ވިޔަފާރި ކުރުމާއި އާމްދަނީ ހޯދުމުގެ މަގު ވަނީ ތަނަވަސްކޮށްދީފަ އެވެ.
ގާނޫނުން ބޮޑެތި ބާރުތަކެއް ލިއްބައިދީފައިވީ ނަމަވެސް، ލޯކަލް އޮތޯރިޓީ ކުންފުނިތައް އުފެއްދުމުގެ ހުއްދަ މިހާތަނަށް ސަރުކާރުން ދީފައިނުވާކަމުގެ ޝަކުވާ ކައުންސިލުންތަކުން އަންނަނީ ކުރަމުންނެވެ.
އިއްޔެގެ މަޖިލިސް ޖަލްސާގައި ސަރުކާރުން ހުށަހަޅާފައިވާ ކުންފުނީގެ ބިލަށް ބަހުސް ކުރައްވަމުން ލާމަރުކަޒީ ކޮމިޓީގެ މުގައްރިރުކަން ވެސް ކުރައްވާ އަލީ ނިޔާޒް ވިދާޅުވި ގޮތުގައި ލޯކަލް އޮތޯރިޓީ ކުންފުނިތައް އުފައްދަން ޖެހެނީ، ރަށެއްގެ ނޫނީ އަތޮޅެއްގެ ތަރައްގީގެ ޕްލޭނުގައި ހިމެނިފައިހުރި ކަންކަން ފުއްދުމަށްޓަކައި އެވެ.
އަދި، އެއީ އެހެން އާންމު ވިޔަފާރިތަކަށް ވެސް ގެއްލުންނުވާ ގޮތަށް، އާންމު ވިޔަފާރިތަކަށް ނުވަދެވޭ ގޮތަށް، އާންމުންނަށް ނުކުރެވޭ ވިޔަފާރިތަކަށް ޑިވެލޮޕްމަންޓް ޕްލޭންގައި ހުރި ކަންކަން ހާސިލު ކުރުމަށްޓަކައި އުފައްދަންޖެހޭ ކުންފުނިތައް ކަން އޭނާ ފާހަގަކުރެއްވި އެވެ.
އެ ކުންފުނިތައް ނުއުފެއްދިގެން ބައެއް ކައުންސިލުތަކުން ޝަކުވާ ކުރަމުންދާތީ، އެކަން ލަސްވަމުންދާ ސަބަބުގެ ހަގީގަތް ބެއްލެވިއިރު، ވަރަށް އާދައިގެ ކަންތައްތަކަށް ކުންފުނި އުފައްދަން ކައުންސިލުތަކުން އެދިފައި ހުރި ކަމަށް އަލީ ނިޔާޒް އިއްޔެ ހާމަކުރެއްވި އެވެ.
"މިސާލަކަށް، ރަށެއްގެ ގެސްޓްހައުސް ހިންގުމަށްޓަކައި ކުންފުންޏެއް އުފައްދަން. އަޅުގަނޑު މި ދެންނެވީކީ އެކަމަށް އެދިފައި އޮތް ވާހަކައެއް ނޫން. މިއީ އާންމުކޮށް ރަށުގައި އިގުތިސޯދު ހިންގުމަށްޓަކައި އާންމު ވިޔަފާރިވެރިން ކުރާ ވިޔަފާރިއެއް. އެ ވިޔަފާރި ކުރުމަށްޓަކައި ކައުންސިލުތަކުން ލޯކަލް އޮތޯރިޓީ ކުންފުންޏެއް ހިންގުމަކީ އެއީ، އެންމެ ރަނގަޅު ގޮތެއް ކަމަކަށް؛ އަދި އެއީ މި ގާނޫނުގެ ރޫހެއް ކަމަކަށް ވެސް އަޅުގަނޑު ނުދެކެން،" އޭނާ ވިދާޅުވި އެވެ.
ލާމާރުކަޒީ ގާނޫނުގައި ލޯކަލް އޮތޯރިޓީ ކުންފުނިތަކުން ކުރެވޭނެ ވިޔަފާރިތަކުގައި އަމަލު ކުރަންޖެހޭ އުސޫލުތައް ރެޖިސްޓްރާ އޮފް ކޮމްޕެނީސް ހަދާ ގަވާއިދުގައި ބަޔާން ކުރަންވާނެ ކަމަށް ވަނީ ބުނެފަ އެވެ.
އަލީ ނިޔާޒް އިއްޔެ ހާމަކުރެއްވި ގޮތުގައި އެ ގަވައިދު މިހާރު އެކުލަވާލެވި، ބަންޑާރަ ނައިބުގެ ލަފައަކަށް ވަނީ ފޮނުވިފަ އެވެ.
"އަޅުގަނޑަށް މައުލޫމާތު ލިބިފައި އޮތް ގޮތުގައި މިހާރު ގަވާއިދު، އެޓާނީ ޖެނެރަލްގެ އޮފީހަށް ލަފަޔަކަށް ފޮނުވާފައިވީ. މި ހަފްތާގެ ތެރޭގައި އަނބުރާ ލިބުނީމާ، މި އަންނަ ހަފްތާ ނުވަތަ މި އަންނަ މަހުގެ ތެރޭގައި ލޯކަލް އޮތޯރިޓީގެ ކުންފުނިތައް އުފެއްދުމަށް ކައުންސިލުތަކަށް އެ އިހުތިޔާރު ނުވަތަ އެ ކަންކަން ސަރުކާރުގެ ތެރެއިން ހަމަޖެހިގެންދާނެ ކަމަށް އަޅުގަނޑު ގަބޫލުކުރަން،" އޭނާ ވިދާޅުވި އެވެ.
އެ ގަވައިދު ހެދުނު ނަމަވެސް އަލީ ނިޔާޒް ވިދާޅުވި ގޮތުގައި ރަށުގެ ތެރޭގައި އާންމުން ކުރާ ވިޔަފާރިއަށް ހުރަސް އެޅޭ ފަދަ ގޮތަކަށް ލޯކަލް އޮތޯރިޓީ ކުންފުނިތައް އުފެއްދުމުން ބޭނުންވާ މަގުސަދު ހާސިލުނުވާނެ އެވެ.
