ބުރާސްފަތި ދުވަހު މުޅި ސްރީލަންކާއިން 13 ގަޑިއިރަށް ކަރަންޓުގެ ހިދުމަތް މެދުކަނޑާލަން ނިންމާފައިވާ ކަމަށް ޑެއިލީ މިރާ ނޫހުން ރިޕޯޓުކޮށްފި އެވެ.
ލަންކާގެ އިގްތިސާދީ އަދި މާލީ ކާރިސާގައި ތެލުގެ ދަތިކަން ކުރިމަތިވެ، ކޮންމެ ދުވަހަކު ވެސް ދަނީ ގިނަ ވަގުތުތަކަށް ކަރަންޓުގެ ހިދުމަތް މެދުކަނޑާލަމުންނެވެ.
ކަރަންޓު ކަނޑާފައި ހުންނަ ވަގުތު އިތުރުވަމުންދާ އިރު ބުރާސްފަތި ދުވަހު 13 ގަޑިއިރަށް ކަރަންޓު ކަނޑަން ފާސްކޮށްފައިވާ ކަމަށް ރިޕޯޓުތައް ބުނެ އެވެ.
ޑެއިލީ މިރާ ނޫހުން ބުނީ ވަގުތުން ވަގުތަށް ތެޔޮ ނުލިބޭ ނަމަ، އަންނަ ހަފްތާއިން ފެށިގެން ކޮންމެ ދުވަހަކު ވެސް މަދުވެގެން 10 ގަޑިއިރަށް ކަރަންޓު ކަނޑަމުން ދާނެ ކަމަށެވެ.
ކަރަންޓު ކެނޑުމުގެ މައްސަލަ މާޗް ފަސް ވަނަ ދުވަހުގެ ކުރިން ހައްލު ވާނެ ކަމަށް ފިނޭންސް މިނިސްޓަރު ބެސިލް ރާޖަޕަކްސަ ކެބިނެޓް ބައްދަލުވުމެއްގައި ވިދާޅުވި ނަމަވެސް، ކަރަންޓު އުފައްދާ ޕްލާންޓުތަކަށް ބޭނުންވާ ވަރަށް އަދިވެސް ތެޔޮ ފޯރުކޮށްނުދެވޭ ކަމަށް ނޫސްތަކުން ބުނެ އެވެ.
ސިލޯން ޕެޓްރޯލިއަމް ކޯޕޮރޭޝަން (ސީޕީސީ) އިން ބުދަ ދުވަހު ބުނީ އޭޕްރިލް މަހު އެއްވެސް ދަތިކަމެއް ނެތި ޑީސެލް، ޕެޓްރޯލް އަދި ޖެޓް ފިޔުލް ވެސް ސަޕްލައި ކުރެވޭނެ ކަމަށެވެ.
ސީޕީސީގެ ޗެއާމަން ސުމިތު ވިޖޭސިންގެ ނޫސްވެރިންނަށް ވިދާޅުވީ އެހެން އަހަރުތަކާ ހިލާފަށް މި އަހަރު ކަރަންޓު ބޭނުން ކުރުން 35 ޕަސެންޓު މައްޗަށް ޖެހުނު ކަމަށެވެ.
މި އަހަރުގެ ފުރަތަމަ ތިން މަސް ދުވަހު ތެޔޮ އިމްޕޯޓް ކުރަން 1.2 ބިލިއަން ޑޮލަރު ހޭދަކޮށްފައިވާ ކަމަށާއި އަހަރުގެ ބާކީ އޮތް ބަޔަށް ބޭނުންވާ ތެޔޮ އެތެރެ ކުރަން ފަސް ބިލިއަން ޑޮލަރު ބޭނުންވާ ކަމަށް އޭނާ ވިދާޅުވި އެވެ.
އޭނާ ވިދާޅުވީ ކަރަންޓު ބޭނުން ކުރުން އާދަޔާ ހިލާފަށް މަތިވެފައިވާ ސަބަބެއް މިހާތަނަށް ނޭނގޭ ކަމަށާއި ސަބަބު ދެނެގަތުމަށް މަސައްކަތްތަކެއް ކުރަން ޖެހޭ ކަމަށެވެ.
