ސުޕީރިއާ ކޯޓެއްގެ އިސް ގާޒީކަމަށް އައްޔަނުކުރި ފުރަތަމަ އަންހެން ބޭފުޅާގެ ގޮތުގައި ފެމިލީ ކޯޓުގެ އިސް ގާޒީ ކަމަށް ހުޒައިފާ މުހައްމަދު މިއަދު ޖުޑިޝަލް ސާވިސް ކޮމިޝަން (ޖޭއެސްސީ) އިން އައްޔަނުކޮށްފި އެވެ.
ގާޒީ ހުޒައިފާއަކީ މެޖިސްޓްރޭޓް ކޯޓުތަކަށްވުރެ މަތިީ ފަންތީގައިވާ ސުޕީރިއާ ކޯޓުތަކުގެ ތެރެއިން ކޯޓަކަށް އައްޔަނުކުރި އެންމެ ފުރަތަމަ އަންހެން އިސް ގާޒީ އެވެ. އޭނާއަށް މިއަދު މަގާމުގެ ފަތްކޮޅު އެރުއްވީ އެކަމަށް އޮތް ހާއްސަ ރަސްމިއްޔާތެއްގައި ޖޭއެސްސީގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސެއިން އެވެ.
ޖޭއެސްސީން ބުނީ ގާޒީ ހުޒައިފާ އަކީ މެލޭޝިއާގެ އިސްލާމިކް ޔުނިވާސިޓީން މާސްޓާސް އޮފް ކޯޕަރޭޓިވް ލޯ ހާސިލުކޮށްގެން ހުންނެވި ބޭފުޅެއް ކަމަށެވެ. ގާޒީ ހުޒައިފާ އެންމެ ފުރަތަމަ ފަނޑިޔާރެއްގެ ގޮތުގައި އައްޔަނުކޮށްފައިވަނީ 2007 ވަނަ އަހަރު އެވެ.
މި ހިނގާ މާޗު މަހުގެ 10 ވަނަ ދުވަހު ފެމިލީ ކޯޓުގެ އިސް ގާޒީކަމަށް ކުރިމަތިލާން ހުޅުވާލީ އެ ކޯޓުގައި މިހާރު ތިއްބެވި ގާޒީންނަށެވެ. އެ އިއުލާނުގައި އިސް ގާޒީގެ މަގާމަށް ހޮވޭ ފަރާތަކަށް ޖުމްލަ 42،375ރ. މުސާރައިގެ ގޮތުގައި ލިބޭނެކަމަށް ވެ އެވެ. އެއީ، އަސާސީ މުސާރައިގެ ގޮތުގައި 31،000ރ. އާއި ލިވިން އެލަވަންސްގެ ގޮތުގައި 15،000ރ. އަދި ރިސްކް އެލަވަންސްގެ ގޮތުގައި ލިބޭ 1،375ރ. އެވެ.
އޭގެ އިތުރުން ވެސް ކަނޑައަޅާފައި އޮންނަ އުސޫލުގެ ތެރެއިން އިސް ގާޒީ ހުޒައިފާއަށް ފޯނު އެލަވަންސެއް ވެސް ލިބޭނެ އެވެ. އަދި، ހަމައެއާއެކު މެޑިކަލް އިންޝުއަރެންސް ވެސް ލިބޭނެ އެވެ.
އިސް ގާޒީގެ މަގާމަށް ޖޭއެސްސީން އިއުލާންކުރީ ފެމިލީ ކޯޓުގެ ކުރީގެ އިސް ގާޒީގެ ގޮތުގައި މީގެ ކުރިން ހުންނެވި ފަނޑިޔާރު އަބްދުﷲ އަދީބު ނިމިދިޔަ ޑިސެމްބަރުގެ ތެރޭ ރިޓަޔާ ކުރެއްވުމުންނެވެ.
