އަފްގާނިސްތާނުގައި އަންހެން ކުދިންގެ ސެކަންޑަރީ ސްކޫލުތައް ނުހުޅުވާތީ 600 މިލިއަން ޑޮލަރުގެ ޕްރޮޖެކްޓުތައް މެދުކަނޑާލަން ވޯލްޑް ބޭންކުން ނިންމައިފި އެވެ.
ވޯލްޑް ބޭންކުން މެދުކަނޑާލި ޕްރޮޖެކްޓުތަކަކީ ތައުލީމާއި ސިއްހަތު އަދި ދަނޑުވެރިކަމާ ގުޅުން ހުރި ޕްރޮޖެކްޓުތަކެވެ. އެ ޕްރޮޖެކްޓުތަކަކީ އަންހެނުންނާއި އަންހެން ކުދިން ބާރުވެރިކޮށް، އެކި ދާއިރާތަކުގައި އެ މީހުންގެ ބައިވެރިވުން އިތުރު ކުރަން ބާރު އަޅާ ޕްރޮޖެކްޓުތަކެވެ.
މިދިޔަ އޯގަސްޓް މަހު ވެރިކަމަށް އައި ތާލިބާނުން ސެކަންޑަރީ ގްރޭޑްތަކުގެ އަންހެން ދަރިވަރުންނަށް ސްކޫލުތައް ހުޅުވާލީ މިދިޔަ ހަފްތާގަ އެވެ. ނަމަވެސް، ކުޑަ ވަގުތުކޮޅަކަށް ފަހު، ދަރިވަރުން އަނބުރާ ގެޔަށް ފޮނުވާލައި، އަނެއްކާވެސް ސްކޫލުތައް ބަންދު ކުރަން ނިންމި އެވެ.
ތާލިބާނުން ބުނީ ދެން ސްކޫލު ހުޅުވާނީ ދަރިވަރުންގެ ޔުނިފޯމު "އިސްލާމީ ޝަރީއަތާއި އަފްގާނިސްތާނުގެ އާދަކާދަ" އާ އެއް ގޮތަށް ފަރުމާ ކުރުމަށް ފަހު ކަމަށެވެ.
އެ ނިންމުމަށް ބައިނަލްއަގްވާމީ ފާޑުކިޔުން އަމާޒުވެފައިވާ އިރު، ވެރިރަށް ކާބުލްގައި ހުންނަ އެޑިއުކޭޝަން މިނިސްޓްރީ ބޭރުގައި ބައެއް ރައްޔިތުން ހޮނިހިރު ދުވަހު މުޒާހަރާ ކުރި އެވެ.
