ފަތުރުވެރިކަމުގެ ބޭނުންތަކަށް ރަށްތައް ދޫކުރުމުގެ ތިން ވަނަ މަރުހަލާގައި ރިސޯޓު ތަރައްގީކުރަން ބީލަމަށް ހުޅުވާލި 18 ރަށުގެ ތެރެއިން ނުވަ ރަށަކަށް, ވަރަށް ބޮޑެތި ބިޑު ލިބިފައިވާ ކަމަށް ސަރުކާރުން މިއަދު ބުނެފި އެވެ.
އެ 18 ރަށުގައި ރިސޯޓު ހަދަން ބީލަން ހުށަހެޅުމުގެ ފުރުސަތު ހުޅުވާފައިވަނީ ދުބާއީ އެކްސްޕޯގައި އެވެ. އޭގެ ތެރޭގައި ގިނައީ ކުރިން ބީލަމަށް ހުޅުވާލައިގެން ނުވިކުނު ރަށްތަކެވެ.
މިފަހަރު ބީލަމަށް ހުޅުވައިލި ރަށްތަކަކީ ހއ. މެދަފުއްޓާއި ށ. ކުޑަޅައިމެންދޫ އާއި ރ. އެއްތިގިލި ހިމެނޭ ގޮތަށް އަލިފުށި ފަޅުން 10 ހެކްޓަރާއި، ފ. އެނބުލުފުށި އަދި ފ. ޖިންނަތުގައު އެވެ.
ބީލަމަށް ހުޅުވާލި ރައްތަކުގެ ތެރެއިން ރ. ށ. އަދި ލ. އަތޮޅު އެއްވެސް ރަށަކަށް ބިޑެއް ނުލިބެ އެވެ. ރ. އަތޮޅުން ބީލަމަށްލީ އެއްތިގިލި އަދި އަލިފުށި ފަޅުން 10 ހެކްޓަރު - 20 ހެކްޓަރު ބިމެވެ.
ލ. އަތޮޅު ކަށިދޫ - 3.1 ހެކްޓަރާއި ލ. ބޮޑުމުންޏަފުށި - 3 ހެކްޓަރު ލ. ދޮންބެރެހާ އަދި ހޮޅަރެހާ - 4.44 ހެކްޓަރު ބިމެއް ބީލަމަށް ހުޅުވާލި އެވެ. އަދި ށ. ކުޑަޅައިމެންދޫ - 14.70 ހެކްޓަރު ބިމެއް ރިސޯޓު ތަރައްގީކުރަން ހުޅުވާލި އެވެ.
ފަތުރުވެރިކަން ތަރައްގީ ކުރުމަށް ކުއްޔަށް ދިނުމަށް ހުޅުވާލި ރަށްތަކުގެ ތެރެއިން ނަލަ ނަލަ އަދި ދަތުރު ކުރުމުގަ ފަސޭހަ ރަށްތަކަށް ބޮޑެތި އަގުތަކެއް ވަނީ ބީލަމުގައި ހުށަހަޅާފަ އެވެ. އެގޮތުން، އެކުއިޒިޝަން ކޮސްޓްގެ ގޮތުގައި ހުށަހަޅާފައިވާ އަގުތައް، މިނިސްޓްރީން ކަނޑައަޅާފައިވާ އެކުއިޒިޝަން ކޮސްޓުތަކުގެ އެންމެ މަދު މިންވަރަށްވުރެ 250 ޕަސެންޓް އެވްރެޖްކޮށް ބޮޑެވެ.
އަދި، އެކުއިޒިޝަން ކޮސްޓްގެ ގޮތުގައި ހުށަހަޅާފައިވާ އެންމެ ބޮޑު އަގަކީ އެ ރަށަށް ކަނޑައަޅާފައިވާ އެންމެ ކުޑަ އެކުއިޒިޝަން ކޮސްޓަށްވުރެ 929 ޕަސެންޓު ބޮޑު އަދަދެކެވެ.
ހުޅުވާލި ރައްޔަތަކަށް 29 ބީލަން ފޮތް ގަނެފައިވާއިރު 13 ފަރާތަކުން ވަނީ ތަފާތު 9 ރަށަކަށް 18 ބީލަން ހުށަހަޅާފައިވާ ކަމަށް މިނިސްޓްރީން ބުނެ އެވެ.
އެގޮތުން:
- ހއ. އަތޮޅުގެ ދެ ރަށަކަށް ތިން ބީލަން،
- މ. އަތޮޅުގެ ރަށަކަށް ދެ ބީލަން
- ފ. އަތޮޅުގެ ދެ ރަށަށް އަށް ބީލަން
- ތ. އަތޮޅުގެ ރަށަކަށް އެއް ބީލަން
- ގއ. އަތޮޅުގެ ރަށަކަށް އެއް ބީލަން
- ގދ. އަތޮޅުގެ ދެ ރަށަށް ތިން ބީލަން
