ރަޝިއާ އާއި ޔޫކްރެއިންގެ އޮފިޝަލުން އެއް ތަންވެ، ތުރުކީގައި ދެ ވަނަ ބައްދަލުވުން އަންގާރަ ދުވަހު ފެށުމާ އެކު، "މާޔޫސްކަން" ނިމުމަކަށް ގެންނަން ތުރުކީގެ ރައީސް ތައްޔިބް އުރުދުގާން ގޮވާލައްވައިފި އެވެ.
އިސްތަންބޫލްގެ ޑޮލްމަބާޗޭ ޕެލެސްގައި ފެށި ބައްދަލުވުމުގެ މަގްސަދަކީ ރަޝިއާގެ ސިފައިން ޔޫކްރެއިނަށް އަރައި ފަށާފައިވާ ހަނގުރާމަ ނިމުމަކަށް ގެންނަން އެއްބަސްވުމަކާ ހަމައަށް އައުމެވެ.
ހަނގުރާމައަށް މަހަކަށް ވުރެ ގިނަ ދުވަސްވެފައިވާ އިރު، 20،000 މީހުން މަރުވެފައިވާ ކަމަށް ލަފާކުރެވެ އެވެ. އަދި 10 މިލިއަން މީހުން ވަނީ ގެދޮރު ދޫކޮށް ދާން ޖެހިފަ އެވެ.
މީގެ ކުރިން ރަޝިއާ އާއިޔޫކްރެއިންގެ އޮފިޝަލުން ވަނީ ތުރުކީގައި ބައްދަލުކޮށްފަ އެވެ. ނަމަވެސް އެ ބައްދަލުވުން އެދެވޭ ނަތީޖާއެއް ލިބިފައެއް ނުވެ އެވެ.
titledesc
އޭގެ ފަހުން ވީޑިއޯ މެދުވެރިކޮށް ގަވާއިދުން ބައްދަލުވުންތައް ބޭއްވުމަށް ފަހު، ދެ ވަނަ ބައްދަލުވުން ފެށީ އަންގާރަ ދުވަހު އެވެ.
އުރުދުގާން ވިދާޅުވީ ހަނގުރާމަ ނިމުމަކަށް ގެނެވޭނީ ޔޫކްރެއިނާއި ރަޝިއާއަށް ކަމަށާއި ހަނގުރާމަ ދިގުދެމިގެން ދިޔުމަކީ އެއްވެސް ބަޔަކަށް ފައިދާ ހުރި ގޮތް ނޫން ކަމަށެވެ.
