ބޭހާއި އެހެނިހެން މެޑިކަލް ތަކެތީގެ ދަތިކަން ކުރިމަތިވެ، ސްރީލަންކާގެ ޕެރަޑެނިޔަ ޓީޗިން ހޮސްޕިޓަލްގެ ހުރިހާ ޝެޑިއުލް ސާޖަރީތައް މެދުކަނޑާލުމަށް ފަހު އަލުން ފަށައިފި އެވެ.
ހޮސްޕިޓަލް ޑިރެކްޓަރު ޑރ. އެޗް އެމް އަރްޖުނާ ތިލަކަރަތުނަ ޑެއިލީ މިރާ ނޫހަށް ވިދާޅުވީ ބައެއް ސާޖަރީތައް މެދުކަނޑާލީ ހޯމަ ދުވަހު ކަމަށެވެ.
އެއީ ބޭހާއި ބައެއް މެޑިކަލް ތަކެތީގެ ދަތިކަން ދިމާވުމުން، އެމެޖެންސީ ސާޖަރީތަކަށް އެ ތަކެތި ރައްކާކޮށްފައި ބެހެއްޓުމަށް ކަމަށް އޭނާ ވިދާޅުވި އެވެ.
"މެޑިކަލް ސަޕްލައިޒް ޑިވިޝަނުން އަޅުގަނޑުމެންނަށް އަންގައިފި، ބޭނުންވާ ބޭހާއި އެހެން ތަކެތި ލިބުނުހާ އަވަހަކަށް ސާޖަރީތައް އަލުން ފަށަން،" އޭނާ ވިދާޅުވި އެވެ.
"އެހެންވީމަ ތަކެތީގެ ދަތިކަން ހައްލުވެ، މިއަދުން މިއަދަށް އަލުން ސާޖަރީތައް ފަށާނެ ކަމަށް ބެލެވޭ."
ޑެއިލީ މިރާ ނޫހުން ހޮސްޕިޓަލާ ހަވާލަދީ ބުނީ އަންގާރަ ދުވަހުގެ މެންދުރުގެ ވަގުތެއްގައި އަލުން ސާޖަރީތައް ފަށާފައިވާ ކަމަށެވެ.
ބޭހުގެ ދަތިކަމާ ހެދި ޕެރަޑެނިޔަ ހޮސްޕިޓަލުގެ ސާޖަރީތައް ހުއްޓުމަކަށް އައި އިރު، ސޯޝަލް މީޑިއާގައި ހިޔާލު ފާޅު ކުރަމުންދާ ބައެއް ލަންކާ ރައްޔިތުން ވެސް އަންނަނީ ބޭސް ނުލިބޭ ވާހަކަ ދައްކަމުންނެވެ.
ބޭހާއި އެހެނިހެން ޒަރޫރީ ތަކެތީގެ ދަތިކަން ލަންކާއަށް ކުރިމަތިވީ ތަކެތި އިމްޕޯޓް ކުރާނެ ބޭރު ފައިސާ ނެތުމުންނެވެ.
ސާޖަރީތައް ހުއްޓުމަކަށް އައި ހަބަރު ފެތުރުމާ އެކު، އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރް ވަނީ ލަންކާއަށް އެހީވާން ބޭނުން ކަމަށް ވިދާޅުވެފަ އެވެ.
އެގޮތުން އިންޑިއާގެ ސަފީރު މެދުވެރިކޮށް، ލަންކާއަށް ބޭނުންވާ އެހީތައް ސާފު ކުރާނެ ކަމަށާއި، ފޯރުކޮށްދެވެން އޮތް ހުރިހާ އެހީއެއް ފޯރުކޮށްދޭނެ ކަމަށް ވިދާޅުވި އެވެ.
