މަސްތުވާތަކެތީގެ މައްސަލަތަކުގައި ގަސްދުގައި ގޯސްހަދާ ފަރާތްތައް ތަހުގީގީ އިދާރާތަކުގައި ތިިބޭ ކަމަށް އެޓާނީ ޖެނެރަލް އިބްރާހީމް ރިފްއަތު ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި ވިދާޅުވުމުން ހޯމް މިނިސްޓަރު އިމްރާން އަބްދުﷲ އެކަން ދޮގުކުރެއްވުން އެއީ އިތުރުފުޅެއް ކަމަށް ދެކެވަޑައިގަންނަވާ ކަމަށް ރައްޔިތުންގެ މަޖިލީހުގެ ބައެއް މެމްބަރުން މިއަދު ވިދާޅުވެއްޖެ އެވެ.
ފެބްރުއަރީ 17 ގައި ޖުޑިޝަރީ ކޮމިޓީން ބޭއްވި ބައްދަލުވުމެއްގައި އޭޖީ ވިދާޅުވީ މަސްތުވާތަކެތީގެ މައްސަލަތަކުގައި ގަސްދުގައި ގޯސްހަދާ ފަރާތްތައް ތަހުގީގީ އިދާރާތަކުގައި އެބަތިބި ކަމަށާއި އެފަދަ ފަރާތްތައް ފުލުހުންގެ ތެރޭގައި ވެސް އެބަތިބި ކަމަށެވެ. އޭޖީގެ އެވާހަކައާ ގުޅިގެން ލިއުމުން ޖަވާބު ހޯއްދަވަން، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ކުރެއްވި ސުވާލަކަށް މިމަހުގެ 14 ވަނަ ދުވަހު ދެއްވި ޖަވާބުގައި ހޯމް މިނިސްޓަރު ވިދާޅުވީ ފުލުހުންގެ ތެރޭގައި އެފަދަ ބަޔަކު ނެތް ކަމަށެވެ.
އެއާއެކު އޭޖީއާއި ހޯމް މިނިސްޓަރާ ދެބޭފުޅުންގެ ތެރެއިން ކޮންމެވެސް އެއް ވަޒީރަކު އިތުރުފުޅު ހައްދަވާފައިވާ ކަަމަށް ގަބޫލުކުރެއްވޭ ކަމަށް ވިދާޅުވެ މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފް މަޖިލީހަށް މިއަދު މައްސަލައެއް ހުށަހެޅުއްވި އެވެ.
އެ މައްސަލަ މަޖިލީހަށް ބަލައިގަނެ، މިހާރު ކުރިއަށްދާ ބަހުސްގައި އެމްޑީޕީގެ ބައެއް މެމްބަރުން ވިދާޅުވީ އޭޖީ އިތުރުުފުޅު ހެއްދެވިކަމަށް ގަބޫލުނުކުރެއްވޭ ކަމަށެވެ. މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ އެމްޑީޕީ މެމްބަރު އީވާ އަބްދުﷲ ވިދާޅުވީ ކޯޓްތަކާއި ފުލުހުންގެ އިދާރާގައި ގޯސްހަދާ މީހުން ތިބުމަކީ މުޅި ދުނިޔޭގައި ވެސް ކަން އޮތް ގޮތްކަން އެންމެނަށް ވެސް އެނގޭ ކަމަށެވެ.
ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ. ކޮމިޓީ ބައްދަލުވުމެއްގައި ވާހަކަދައްކަވަނީ. ފޮޓޯ: މަޖިލީހުގެ އިދާރާ
"މަސްތުވާތަކެއްޗާ ގުޅޭ ކަންކަމާ ހިއުމަން ޓްރެފިކިންއާ ގުޅޭ ކަންކަމާ މިކަހަލަ ބޮޑެތި ޖަރީމާތަކުގައި މިކަހަލަ ބޮޑެތި ޖަރީމާތަކުގައި ގަސްދުގައި ގޯސްހަދާ ފުލުހުން މުޅި ދުނިޔޭގައި ވެސް އުޅޭކަން އެނގޭ. އެއީ ދެން ދޮގުނުކުރެވޭނެ ވަރުގެ ވާހަކައެއް،" އީވާ ވިދާޅުވި އެވެ.
ރާއްޖޭގެ ފުލުުހުންގެ އިދާރާގައި އެފަދަ ބަޔަކު ނެތް ކަމަށް ހޯމް މިނިސްޓަރަށް ކުއްލިއަކަށް ވިދާޅުވެވޭނެ ގޮތެއް ވިސްނިވަޑައިނުގަންނަވާ ކަމަށް ވެސް އީވާ ވިދާޅުވި އެވެ.
މާފަންނު އުތުރު ދާއިރާގެ އެމްޑީޕީ މެމްބަރު އިމްތިޔާޒް ފަހުމީ (އިންތި) ވިދާޅުވީ އިމްރާން މަޖިލީހަށް ޖަވާބު ދެއްވި އިރު އޭޖީ ދެއްކެވި ވާހަކައަށް މާބޮޑު ސަމާލުކަމެއް ދެއްވާފައި ނުވާ ކަމަށެވެ. ޖުޑިޝަރީ ކޮމިޓީގައި އޭޖީ ދެއްވި ސްޓޭޓްމަންޓަކީ ސީރިއަސް ވާހަކައެއް ކަމަށް ވެސް އިންތި ވިދާޅުވި އެވެ. ރާއްޖޭގައި އަތުލައިގަންނަ މަސްތުވާތަކެތީގެ މައްސަލަތަކުގައި މީހަކު ހިފަހައްޓައިނުލެވޭކަން އެއީ ހަގީގަތެއް ކަމަށެވެ. ދައުލަތުގެ އިދާރާތަކުގެ ތެރެއިން ބައެއްގެ ބައިވެރިވުން އެކަމުގައި އޮންނަ ކަމަށް ބެލެވެނީ އެހެންވެ ކަމަށް ވެސް އޭނާ ވިދާޅުވި އެވެ.
މާވަށު ދާއިރާގެ ޕީއެންސީ މެމްބަރު މުހައްމަދު ސައީދު ވިދާޅުވީ ހޯމް މިނިސްޓަރު އިމްރާން އަބްދުﷲ އަކީ މީގެ ކުރިން ވެސް އެތައް ކަމެއްގައި އިތުރުފުޅު ހައްދަވާފައިވާ ބޭފުޅެއް ކަމަށެވެ. އޭގެ މިސާލެއްގެ ގޮތުގައި އޭނާ ދެެއްކެވި އެއް ކަމަކީ މަޖިލީހުގެ ރައީސް މުހައްމަދު ނަޝީދު އަވަހަރާކޮށްލަން ދިން ބޮމުގެ ހަމަލާއަށް ފަހު ނަޝީދުގެ ހާލުކޮޅު ރަނގަޅުކަމަށް އިމްރާން ވިދާޅުވި ވިދާޅުވުމެވެ.
"މަނިކުފާނު، ހައެއް މޭގައި ބޮން ގޮއްވާލައިގެން ހޮސްޕިޓަލްގައި އޮއްވާ އެތަނަށް ނުވަދެ ކީކޭތޯ ވިދާޅުވީ؟ ހާލު އަނެއްހެން ގޯހެއް ނޫނޭ. އޭރު މިހުންނަނީ އެތަނަށް ނުވަދެ،" ސައީދު ވިދާޅުވި އެވެ.
ކެންދޫ ދާއިރާގެ ޖޭޕީ މެމްބަރު އަލީ ހުސައިން ވިދާޅުވީ ފުލުހުންގެ ތެރޭގައި 3،000 އަށް ވުރެ ގިނަ މީހުން ތިބޭ އިރު އޭގެ ތެރޭގައި ގޯސް ހަދާ މީހުން ތިބޭނެ ކަމަށެވެ.
ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ. ކޮމިޓީ ބައްދަލުވުމެއްގައި ވާހަކަދައްކަވަނީ. ފޮޓޯ: މަޖިލީހުގެ އިދާރާ
"އެތަނުގައި އެއްވެސް ގޮތަކަށް ގޯސްހަދާ މީހުން ނުތިބޭ ކަަމަށް އެއްވެސް މިނިސްޓަރަކު ވިދާޅުވާ ނަމަ އަޅުގަނޑު ގަބޫލުކުރާނީ އެއީ ހަމަ ކަނޑައެޅިގެން ހައްދަަވާ އިތުރުފުޅެކޭ،" އަލީ ވިދާޅުވި އެވެ.
އޭޖީ ނުވަތަ ހޯމް މިނިސްޓަރު މަޖިލީހަށް އިތުރުފުޅު ހައްދަވާފައިވާ ކަމަށް ތުހުމަތުކުރައްވައި އާދަމް ޝަރީފް މިއަދު ހުށަހެޅުއްވި މައްސަލަ މަޖިލީހަށް ބަލައިގަނެ ބަހުސްކުރަން ފާސްކުރީ އެކަމަށް ނެގި ވޯޓުގައި ބައިވެރިވެވަޑައިގެންނެވި 31 މެމްބަރުންގެ ތެރެއިން 18 މެމްބަރަކު ވޯޓު ދެއްވައިގެންނެވެ. އެ މައްސަލަ ބަލައިގަންނަން ނުފެންނަ ކަމަށް ވޯޓުދެއްވީ 13 މެމްބަރެކެވެ. ވަކިކޮޅަކަށް ވޯޓު ނުދެއްވާ މެމްބަރަކު ނެތެވެ.
