ކިޔެވް، ޔޫކްރެއިން (މާޗް 27) - ރަޝިއާ އާއި ޔޫކްރެއިނުން މަޝްވަރާގެ ދެ ވަނަ ބުރެއް ހޯމަ ދުވަހު ތުރުކީގައި ފަށަން ތައްޔާރުވެއްޖެ އެވެ.
މަޝްވަރާގައި އިސްކޮށް އުޅޭ ޔޫކްރެއިންގެ އޮފިޝަލް ޑޭވިޑް އަރަހާމިއާ ފޭސްބުކްގައި ވިދާޅުވީ ވީޑިއޯ މަޝްވަރާތަކަށް ފަހު، ދެ ގައުމުން އެއް ތަންވެ، ދެ ވަނަ ބައްދަލުވުމެއް ތުރުކީގައި އޮންނާނީ މާޗް 28 އިން 30 އަށް ކަމަށެވެ.
ރަޝިއާގެ އޮފިޝަލް ލެޑިމިއާ މެޑިންސްކީ ވެސް ވިދާޅުވީ ދެ ގައުމުގެ ވަފުދުން ތުރުކީއަށް ދަތުރުކޮށް، މި ހަފްތާގައި ބައްދަލުކުރާނެ ކަމަށެވެ.
ރަޝިއާ އާއި ޔޫކްރެއިންގެ ވެރިން ތުރުކީގެ އަންތަލްޔާގައި އެންމެ ފުރަތަމަ ބައްދަލު ކުރީ މާޗް 10 ވަނަ ދުވަހު އެވެ. އެ ބައްދަލުވުމުން އެއްވެސް ކުރިއެރުމެއް ނުލިބެ އެވެ.
އޭގެ ފަހުން ދެ ގައުމުން ގަވާއިދުން ވީޑިއޯ މެދުވެރިކޮށް މަޝްވަރާތައް ބޭއްވި ނަމަވެސް، ހަނގުރާމަ ހުއްޓުމާ ގުޅޭ ގޮތުން އެއްބަސްވުމަކަށް އާދެވިފައެއް ނުވެ އެވެ.
މިދިޔަ ހަފްތާގައި ތުރުކީގެ ރައީސްތައްޔިބް އުރުދުގާން ވިދާޅުވީ މަޝްވަރާއަށް ހުށަހަޅާފައިވާ ހަ ނުކުތާގެ ތެރެއިން ހަތަރު ނުކުތާއެއްގައި ރަޝިއާ އާއި ޔޫކްރެއިނަށް އެއްބަސްވެވޭ ކަމަށެވެ. އެއީ ނޭޓޯގައި ޔޫކްރެއިން ބައިވެރިނުވުމާއި، ޔޫކްރެއިންގައި ރަޝިއާ ބަސް ބޭނުން ކުރަން ހުރަސް ނޭޅުމާއި، ހަތިޔާރު ބެހެއްޓުމާއި، ސަލާމަތާ ގުޅޭ ނުކުތާތަކެވެ.
titledesc
ނަމަވެސް މިދިޔަ ހުކުރު ދުވަހު ޔޫކްރެއިންގެ ފޮރިން މިނިސްޓަރު ޑިމިޓްރޯ ކުލެބާ ވިދާޅުވީ އެއްވެސް މުހިއްމު ނުކުތާއެއްގައި ރަޝިއާއާ އެކު އެއްބަސްވުމަކަށް ނާދެވޭ ކަމަށެވެ.
