ސްރީލަންކާއިން ޗައިނާގައި އެދިފައިވާ އެއް ބިލިއަން ޑޮލަރުގެ ލޯނު ބޭނުން ކުރާނީ ޗައިނާގެ ބޭންކުތަކަށް ދައްކަން ޖެހޭ ލޯނުތައް އަނބުރާ ދެއްކުމަށް ކަމަށް ލަންކާގެ ނޫސްތަކުން ބުނެފި އެވެ.
ކޮލޮމްބޯގައި ހުންނަ ލަންކާގެ އެމްބަސީން މިދިޔަ ހަފްތާގައި ބުނީ އެއް ބިލިއަން ޑޮލަރުގެ ލޯނަކާއި 1.5 ބިލިއަން ޑޮލަރުގެ ކްރެޑިޓް ލައިނަކަށް ލަންކާ ސަރުކާރުން އެދިފައިވާ ކަމަށެވެ.
ލަންކަދީޕާ ނޫހުން ބުނީ އެއް ބިލިއަން ޑޮލަރު ސަރުކާރުން ބޭނުން ކުރާނީ ޗައިނާގެ ބޭންކުތަކުން ކުރިން ނަގާފައިވާ ލޯނުތައް އަނބުރާ ދެއްކުމަށް ކަމަށެވެ.
ޗައިނާގެ ލޯނުތައް ފަހުން ދެއްކޭނެ ގޮތަކަށް ދަރަނި ރީސްޓްރަކްޗާ ކުރުމަށް ލަންކާ ސަރުކާރުން ތަކުރާރުކޮށް އެދުނު ނަމަވެސް، ޗައިނާއިން ބުނީ ރީސްޓްރަކްޗާ ކުރުމަކީ އެ ގައުމުން ގެންގުޅޭ ސިޔާސަތެއް ނޫން ކަމަށެވެ.
ޗައިނާގެ ބޭންކްތަކަށް ލޯންތައް އަނބުރާ ދެއްކުމަށް މި އަހަރު އެކަނިވެސް 100 މިލިއަން ޑޮލަރަށް ވުރެ ބޮޑު އަދަދެއް ސްރީލަންކާއިން ހޭދަކުރަން ޖެހެ އެވެ.
ލަންކާއިން ވަނީ އެއް ބިލިއަން ޑޮލަރުގެ ކްރެޑިޓް ލައިނެއްގައި އިންޑިއާއާ އެކު ވެސް ސޮއިކޮށްފަ އެވެ. އެއީ ޒަރޫރީ ކާބޯތަކެއްޗާއި ބޭސް އިމްޕޯޓް ކުރުމަށެވެ. އޭގެ އިތުރުން އިންޑިއާއިން ތެޔޮ ގަންނަން 500 މިލިއަން ޑޮލަރުގެ ކްރެޑިޓް ލައިނެއް ވެސް އޭގެ ކުރިން ދޫކުރި އެވެ.
