ރޯދަ މަހާ ދިމާކޮށް ރާއްޖެ އެތެރެކުރާ ހަލާކުވެދާ (ޕެރިޝަބަލް) ކާބޯތަކެތީގެ ބާވަތްތައް ފަސޭހައިން ބޭރުކުރެވޭނެ މަގުފަހިކުރުމުގެ ގޮތުން މައި ވިޔަފާރި ބަނދަރު ހިންގާ މޯލްޑިވްސް ޕޯޓްސް ލިމިޓެޑުން ޓާސްކްފޯހެއް އެކުލަވާލައިގެން މަސައްކަތް ފަށައިފި އެވެ.
ކޮންމެ އަހަރެއްގެ ރޯދަ މަހަކީ ވެސް ރާއްޖެއަށް އެތެރެކުރާ ކާބޯތަކެތީގެ އަދަދުތައް ބޮޑުތަނުން އިތުރުވާ މައްސަރެކެވެ. މީގެ ތެރޭގައި ގިނައީ ޕެރިޝަބަލް މޭވާ އާއި ތަރުކާރީގެ ބާވަތްތަކެވެ.
މިހެން ވުމުގެ ސަބަބުން ބަނދަރު ބާރުބޮޑުވެ ބާޒާރަށް މުދާ ފޯރުކޮށްދިނުމުގައި ލަސްތައް އާދެ އެވެ. ބައެއް ފަހަރު ބަނދަރުން ބޭރު ނުކުރެވި ހުއްޓާ މުދާ ހަލާކުވެ ވިޔަފާރިވެރިންނަށް މާލީ ގެއްލުންތަކާ ކުރިމަތިލާން ޖެހި، ބާޒާރުން މުދާ ލިބޭ އަގުތައް އުފުލިފައި އެބަހުއްޓެވެ.
މިކަމަށް ދުރާލާ ތައްޔާރީތަކެއް ވެފައިވާކަން ހާމަކޮށް، ރޯދަ މަހު އެމްޕީއެލްގެ ޕޯޓު ހިދުމަތްތަކާ ގުޅޭ ގޮތުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކުންފުނީގެ ސީއީއޯ ޝާހިދު އަލީ ވިދާޅުވީ އެންމެ އިސްކަމެއް ދޭނީ ޕެރިޝަބަލް ކާނާގެ ބާވަތްތައް އަވަހަށް ބޭރުކުރުން ކަމަށެވެ. އަދި އެކަމަށް އެމްޕީއެލް އިން ވާންޖެހޭ ހުރިހާ ތައްޔާރިތައް ވެފައިވާ ކަމުގެ ޔަގީންކަން ދެއްވި އެވެ.
އެގޮތުން ބޯޓު ބަނދަރަށް ވަންނަ ހިސާބުން ފެށިގެން އަވަހަށް ބޯޓުން މުދާ ބާލާ، ކްލިއާ ކުރުމަށް ފަހު ބަނދަރުން މުދާ ބޭރުކުރެވޭނެ އިންތިޒާމުތައް ޓާސްކު ފޯސް މެދުވެރިކޮށް އަވަހަށް ލިބޭނެ ކަމަށް އޭނާ ވިދާޅުވި އެވެ. އަދި މީގެ ސަބަބުން ބާޒާރަށް މުދާ ލިބުން އަވަސްވެ އަގު ހިފަހައްޓަން މަގުފަހި ވާނެ ކަމަށް ވެސް އޭނާ ވިދާޅުވި އެވެ.
ނޫސްވެރިންގެ ބައްދަލުވުމުގައި އެމްޕީއެލްގެ ސީއީއޯ ޝާހިދު އަލީ މައުލޫމާތު ދެއްވަނީ: ލަސްނުވެ މުދާ ލިބޭނެ އިންތިޒާމުތައް ހަމަޖައްސާފައިވާ ކަމުގެ ޔަގީންކަން ދެއްވި. -- ފޮޓޯ: އަބްދުﷲ އިޔާން/އަދަދު
ރޯދަ މަހު މާލޭ ވިޔަފާރި ބަނދަރުން ހިދުމަތްދޭ ގަޑިތައް
ކްލިއަރިން އޮޕަރޭޝަންސް
- ޕެރިޝަބަލް މުދާ: ހެނދުނު 9:00 އިން ފެށިގެން މެންދަމު 1:30 އަށް
- ޕެރިޝަބަލް ނޫން މުދާ: ހުކުރު ދުވަސް ފިޔަވާ އެހެން ހުރިހާ ދުވަހެއްގެ ހެނދުނު 9:00 އިން މެނދުރު 1:30 އަށް އަދި ރޭގަނޑު 9:00 އިން މެންދަމު 1:30 އަށް
ކާގޯ/ކޮންޓެއިނާ އޮޕަރޭޝަންސް
- ހުކުރު ދުވަސް ފިޔަވާ އެހެން ހުރިހާ ދުވަހެއްގެ ހެނދުނު 9:00 އިން މެނދުރު 1:30 އަށް އަދި ރޭގަނޑު 9:00 އިން މެންދަމު 1:30 އަށް
މި ހިދުމަތްތައް ކުރިޔަށްދާ ވަގުތުތަކުގައި ހުޅުމާލެ ޝިފްޓިން އޮޕަރޭޝަންސް އަދި މެރިން ސާވިސަސް (ޓަގާއި ބާޖު) އޮޕަރޭޝަންތައް ކުރިޔަށް ދާނެ ކަމަށް އެމްޕީއެލް އިން މައުލޫމާތު ދެ އެވެ. އެކަމަކު މި ނޫން ގަޑިތަކުގައި ވެސް، ޕެރިޝަބަލް ހިފައިގެން އަންނަ ބޯޓުތަކަށް ހިދުމަތް ދިނުމާއި މުދާ ބޭރުކުރުމުގެ ކަންކަން ކުރިޔަށް ދާނެ ކަމަށް ޝާހިދު ވިދާޅުވި އެވެ.
"ކާބޯތަކެތި ހިފައިގެން އަންނަ ބޯޓެއް ހުކުރު ދުވަހު އައި ކަމުގައި ވިޔަސް ކްލިއަރިން އަދި މުދާ ބޭލުމުގެ އޮޕަރޭޝަންތައް ކުރިޔަށް ދާނެ"
އޭގެ އިތުރުން ބައެއް އެސްޓީއޯ ފަދަ ބޮޑެތި ކުންފުނިތަކަށް، ބޯޓުން ބާލާގޮތަށް ލޮރީއަށް އަރުވައިގެން މުދާ ބޭރުކުރެވޭނެ އިންތިޒާމުތައް ވަނީ ހަމަޖައްސާފަ އެވެ.
ޕެރިޝަބަލް ކާގޯ ފަސޭހައިން ބޭރުކުރެވޭނެ އިންތިޒާމުތައް ފުރިހަމަކުރުމުގެ މަސައްކަތުގެ ތެރެއިން މިފަހުން އެމްޕީއެލްގެ އިސްވެރިންނާއި ކަސްޓަމްސްގެ ބޭފުޅުން ޓުޓޮކުރިންއަށް ގޮސް މަސައްކަތްތަކެއް ކޮށްފައިވާ ކަމަށް ވެސް ޝާހިދު ވިދާޅުވި އެވެ.
މިގޮތުން އިންޑިއާގެ ޝިޕިން އެޖެންޓުންނާއި ބޯޓުފަހަރު ގެންގުޅޭ ވިޔަފާރިތަކުގެ ޖަމިއްޔާއާ ބައްދަލުކޮށް މަޝްވަރާކުރި އެވެ. މި މަޝްވަރާތަކުގައި ރާއްޖެއަށް ފޮނުވާ ކާނާގެ ބާވަތްތައް ރަނގަޅަށް ޕެކް ކުރުމާ ގުޅޭގޮތުންނާއި އެހެނިހެން ލަކުޑި ބޯޓުފަހަރު ކުޅުދުއްފުށީ ރީޖަނަލް ބަނދަރު ބޭނުންކުރަން ވާހަކަ ދެކެވުނެވެ.
އެމްޕީއެލް އިން ބުނީ މި ދުވަސްވަރު ބަނދަރު ބާރު ބޮޑު ނަމަވެސް ހަމަޖައްސާފައިވާ އިންތިޒާމުތަކާ އެކީ ވިޔަފާރިވެރިންނަށް ދަތިތަކެއް ނެތި މުދާ ބޭރުކުރުމުގެ ކަންކަން ކުރިޔަށް ގެންދެވޭނެ ކަމަށެވެ.
