ކޮވިޑްގެ ބަލިމަޑުކަމާ ހެދި އިންޑިއާގެ ވައިގެ ދަތުރުފަތުރަށް އެޅި ފިޔަވަޅުތައް އާދީއްތަ ދުވަހުން ފެށިގެން ނިމުމަކަށް ގެނެސް، ހުރިހާ ބައިނަލްއަގްވާމީ ދަތުރުތަކެއް އަލުން ފަށަން ނިންމައިފި އެވެ.
އިންޑިއާގެ ސިވިލް އޭވިއޭޝަން މިނިސްޓްރީން ބުނީ ކެބިން ކްރޫ މެމްބަރުން އާދީއްތަ ދުވަހުން ފެށިގެން ޕީޕީއީ ބޭނުން ކުރުން ނިމޭނެ ކަމަށާއި އެއާޕޯޓުގައި ޕަސެންޖަރުން ބަލައި ފާސްކުރުން ވެސް ކުރިއެކޭ އެއް ގޮތަށް ކުރިއަށް ދާނެ ކަމަށެވެ.
ބައިނަލްއަގްވާމީ ދަތުރުތަކުގައި މެޑިކަލް އެމެޖެންސީތަކުގައި ބޭނުން ކުރުމަށް، ފްލައިޓުގެ ތިން ސީޓު ހުހަށް ބެހެއްޓުން ވެސް ނިމުމަކަށް ގެންނަން ވަނީ އިއުލާނުކޮށްފަ އެވެ.
ސިވިލް އޭވިއޭޝަން މިނިސްޓްރީން ބުނީ ފިޔަވަޅުތަކަށް ލުއި ދޭން ނިންމީ ކޮވިޑް ކޭސްތައް ދަށްވަމުން ދާތީ، ވައިގެ ދަތުރުތައް ވީހާ ވެސް ފަސޭހަކަމާ އެކު ކުރިއަށް ގެންދިޔުމުގެ މަގުފަހިކުރުމަށް ކަމަށެވެ.
އެހެން ނަމަވެސް، އެއާޕޯޓުތަކާއި ފްލައިޓްތަކުގައި ވެސް އަދިވެސް މާސްކު އަޅަން ޖެހޭނެ ކަމަށާއި ސެނިޓައިޒާ އަދި އަތް ދޮވެވޭނެ ގޮތަށް ހަދާފައި ހުންނަން ޖެހޭނެ ކަމަށް ބުންޏެވެ.
އިންޑިއާގެ ހުރިހާ ބައިނަލްއަގްވާމީ ދަތުރުތަކެއް މެދުކަނޑާލީ މާޗް 23، 2020 ވަނަ އަހަރު އެވެ. އެ އަހަރުގެ ޖުލައި މަހު ބައެއް ދަތުރުތައް އަލުން ފެށީ 37 ގައުމަކާ އެކު ހެދި "އެއާ ބަބްލް" އެއްބަސްވުންތަކުގެ ދަށުންނެވެ.
އިންޑިއާގެ އެތެރޭގެ އުދުހުންތައް ކޮވިޑްގެ ކުރިން އޮތް ގޮތަށް އޮޕަރޭޓް ކުރުމުގެ ހުއްދަ ސަރުކާރުން ދިނީ އޮކްޓޯބަރު 18، 2021 ވަނަ އަހަރު އެވެ.
އިންޑިއާގެ ނޫސްތަކުން ބުނާ ގޮތުގައި ފާއިތުވި ހަފްތާގައި އެ ގައުމުގައި ކޮވިޑް ޖެހިގެން ރިކޯޑް ކުރަނީ ދުވާލަކު 2000 ކޭސް އެވެ. އަދި މަރުވާ މީހުންގެ އަދަދު ވަނީ ދުވާލަކު 100 އަށް ވުރެ ތިރިވެފަ އެވެ.
