ސްރީލަންކާގައި ޓެކްސްގެ ގޮތުގައި ނަގާ އަދަދުތައް މަތިކޮށް، ހަކަތައިގެ އަގުތަކަށް އިސްލާހީ ބަދަލު ގެނައުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ލަފާ ދީފި އެވެ.
ލަންކާ ސަރުކާރާ އެކު ބޭއްވި މަޝްވަރާތަކަށް ފަހު އައިއެމްއެފްއިން ނެރުނު ރިޕޯޓުގައި ބުނީ ކުރު އަދި ދިގު ރާސްތާގައި އިގްތިސާދީ ހަމަޖެހުން ގާއިމްކޮށް، ދަރަނި ދެއްކުން ދެމެހެއްޓުމަށް ހަރުދަނާ ސިޔާސަތެއް ގެންގުޅެން ޖެހޭ ކަމަށެވެ.
އެގޮތުން މުދަލާއި ހިދުމަތުން ނަގާ ވެލިއު އެޑެޑް ޓެކްސް (ވީއޭޓީ) އާއި ފަރުދުންގެ އާމްދަނީއިން ނަގާ އިންކަމް ޓެކްސް މަތި ކުރަން ލަފާ ދިނެވެ.
އޭގެ އިތުރުން ޕަބްލިކް ކުންފުނިތަކަށް ލިބެމުންދާ ގެއްލުންތައް ކުޑަ ކުރުމަށް ހަކަތައިގެ އަގުތަކަށް އިސްލާހީ ބަދަލު ގެނައުމަށް ވެސް ލަފާ ދިނެވެ.
އައިއެމްއެފްގެ ރިޕޯޓުގައި އިތުރަށް ބުނީ އެކްސްޗޭންޖް ރޭޓު ކަނޑައެޅުމުގައި ސަރުކާރުގެ ދައުރު ކުޑަ ކުރަން ޖެހޭ ކަމަށާއި ހާލަތަށް ބަލައި މަޑުމަޑުން އެ ފިޔަވަޅު އަޅަން ޖެހޭނެ ކަމަށެވެ.
ސްރީލަންކާއަށް ދިމާވެފައިވާ އިގްތިސާދީ އަދި މާލީ ކާރިސާއިން އަރައިގަތުމަށް އައިއެމްއެފްގެ އެހީ ހޯދަން ސަރުކާރުން ދާދި ފަހުން ވަނީ ނިންމާފަ އެވެ.
