"ފުވައްމުލަކުގެ ތާރީހުގައި މަނިކުފާނުގެ ނަން ލިޔެވިގެން ދާނީ ތަރައްގީގެ ބާނީގެ ގޮތުގައި."
މާލޭން ފުރައިގެން އެއްގަޑިއިރާ ބައިގެ ދަތުރެއް ނިންމައި, ފުވައްމުލައް ސިޓީގެ އެއާޕޯޓުން ނުކުތްއިރު ރައީސް އިބްރާހިމް މުހައްމަދު ސޯލިހުގެ ފޮޓޯއާއެކު ދަމާފައިހުރި ބެނާގައި ލިޔެފައި އޮތީ މިހެންނެވެ. އެ ބެނާގެ ދަށުގައި ދިގު ސަފަކަށް މީހުން އެތުރި ތިބީ ރައީސްގެ އިންތިޒާރުގަ އެވެ.
"މިވަރުގެ ހޫނު މަރުހަބާއަކަށް ތައްޔާރުވެ މި ތިބީ ރައީސް ސޯލިހު ވަޑައިގަންނަވާތީ, އެމަނިކުފާނަށް އޮތީ ބޮޑު ތަރުހީބެއް," ސަފުގައި ހުރި މީހަކު ބުންޏެވެ.
ރައީސް ސޯލިހު, އަނބިކަނބަލުން ފަޒުނާ އަހުމަދާއެކު އެއާޕޯޓުން ނުކުންނެވިތަނާ އެމަނިކުފާނަށް މި ސިޓީން ހޫނު މަރުހަބާއެއް ކިޔެ އެވެ. މާފަތިތަކުންނާއި ރަތްދޫލައިން ކީ މަރުހަބާއެކު އާންމުންގެ ތަރުހީބުގެ އަޑު ގަދަ އެވެ.
އެމަނިކުފާނަށް މަރުުހަބާ ދެންނެވުމަށް ދަމާލި ސަފުގައި ތިބި އެންމެންނާ ބައްދަލުކުރައްވައި, ރައީސްގެ ދެކަނބަލުން ސަލާމް ކުރެއްވި އެވެ. އެކަމަށް ގާތްގަނޑަކަށް ބައިގަޑިރެއްހާވަރު ހޭދަވި އެވެ. އެއަށްފަހު, ރައީސް މިސްރާބު ޖެއްސެވީ މި ސިޓީގެ އެއް ފަހުރު ކަމުގައިވާ ނޭޗާ ޕާކަށެވެ.
ރައީސް ސޯލިހަށް ފުވައްމުލައް ސިޓީން މަރުހަބާ ކިޔަނީ
ޕާކުގައި ރައީސް ދެއްވީ އުއްމީދީ ޖަވާބެއް
ފުވައްމުލަކު އެންމެ ބޮޑު އެސެޓް ކަމުގައިވާ ނޭޗާ ޕާކަށް ވަޑައިގެން އެތަނާ ގުޅޭ ޕްރެޒެންޓޭޝަނެއް އެމަނިކުފާނު ބައްލަވާލެއްވި އެވެ. އެ ޕްރެޒެންޓޭޝަނުގައި ތަން އިތުރަށް ތަރައްގީ ކުރެވޭ ގޮތްތަކާއި އިތުރަށް އާމްދަނީ ހޯދޭނެ މަގުތައް ފާހަގަކުރި އެވެ.
ޕްރެޒެންޓޭޝަން ނިންމާލުމާއެކު, އޭގައި ފާހަގަކުރި ކަންކަން ކުރުމަށް ހޭދަވާނެ އަގުތަކާއި ވަސީލަތްތައް ފާހަގަކޮށް ހުށަހެޅުމަށް ރައީސް ވަގުތުން ދެންނެވި އެވެ. އޭރަށް އެކަން ފަހިވެގެންދާނެ ކަމުގެ ޔަގީންކަން އަރުއްވަމުން, ރައީސް ވަނީ ނޭޗާ ޕާކް ބައްލަވާލައްވާފަ އެވެ.
ރައީސް ސޯލިހު, ނޭޗާ ޕާކްގައި
ބޮޑު މާހެފުމެއް ރައްޔިތުންނަށް
ރައީސްގެ ދަތުރުފުޅާ އަމާޒުކޮށް ފުވައްމުލައް އޮތީ ވަރަށް އުފަލުންނެވެ;
އެ އުފަލުގައި ރައީސް ރައްޔިތުންނަށް ދެއްވާ ބޮޑު މާހެފުމެއް މިރޭ ފުވައްމުލައް ދަނޑުގައި ބޭއްވުމަށް ވަނީ ހަމަޖެހިފަ އެވެ. ރައީސްގެ ދެކަނބަލުންނާއެކު, މި ސިޓީއަށް ނިސްބަތްވާ ނައިބު ރައީސް ފައިސަލް ނަސީމް ވެސް ބައިވެރިވެވަޑައިގަންނަވާނެ އެވެ.
މި ރަށުގެ ރައްޔިތުން ބުނާ ގޮތުގައި, މިރޭގެ މާހެފުމަކީ ވަރަށް ބޮޑު ހާއްސަ މާހެފުމަކަށް ވާނެ އެވެ. ސިޓީއަށް ހާއްސަ ކެއުންތައް ވެސް ހިމެނޭ ގޮތުން, މިއީ ހަނދާނުން ފިލުވާލަން އުނދަގޫވާ ފަދަ ބޮޑު މާހެފުމަކަށް ވާނެ ކަމަށް ބުނެ އެވެ.
ތައްޔާރީތައް އޮތީ ވަރަށް ފޯރީގަ އެވެ;
ރައީސް ސޯލިހު މާދަމާ ވެސް ހުންނެވުމަށް ހަމަޖެހިފައިވަނީ ފުވައްމުލައް ސިޓީގަ އެވެ. އެގޮތުން, ސިޓީ ކައުންސިލާއި އެހެން ވެސް މުއައްސަސާތަކާ ރައީސް މާދަމާ ބައްދަލު ކުރައްވާނެ އެވެ.
ގުދުރަތީ މުއްސަނދި ވަސީލަތްތަކެއް ލިބިފައިވާ މި ސިޓީއަކީ މި ސަރުކާރުން ޖުމްލަ 34 މަޝްރޫއުއެއް މިހާތަނަށް ވަނީ ފަށާފަ އެވެ. އޭގެ ތެރެއިން ބައެއް މަޝްރޫއުތައް ނިމިފައިވާއިރު ގިނަ މަޝްރޫއުތަކެއް ކުރިއަށް ވެސް އެބަދެ އެވެ. ބިޑް ކުރުމާއި ކޮންޓެކްޓް ކުރުމުގެ މަރުހަލާގައި ވެސް މަޝްރޫއުތައް ހުރިއިރު, މި އަހަރުގެ ބަޖެޓްގައި މި ސިޓީއަށް 133,478,300 ރުފިޔާގެ މަޝްރޫއުތައް ހިމަނާފައިވެ އެވެ.
