ސްރީލަންކާގެ ޕާލިމެންޓަށް އާ ރައީސަކު އިންތިހާބު ކުރެވޭ ގޮތަށް ހެދުމަށް ގާނޫނު އަސާސީއަށް 21 ވަނަ އިސްލާހް ގެނައުމުގެ ބިލު ހުށަހަޅައިފި އެވެ.
އެ އިސްލާހު ހުށަހެޅީ އެސްއެލްޕީޕީގެ މެމްބަރު ވިޖެދާސަ ރާޖަޕަކްޝަ އެވެ. އޭނާ ހުށަހެޅުއްވީ ރައީސް ގޮތަބަޔާ ރާޖަޕަކްސަގެ ބާރުތައް ކެބިނެޓާ ހަވާލު ކުރެއްވުމަށް ފަހު އާ ރައީސަކު އިންތިހާބު ކުރުމުގެ ބާރު ޕާލިމެންޓަށް ފަހިކުރުމަށެވެ.
ބިލުގައިވާ ގޮތުން ރައީސްގެ ބާރުތައް ކެބިނެޓާ ހަވާލު ކުރުމަށް ފަހު، ކެބިނެޓުން ޕާލިމެންޓާއި ރައްޔިތުންނަށް ޖަވާބުދާރީ ވާން ޖެހޭނެ އެވެ. ޕާލިމެންޓުގެ ތެރެއިން އާ ރައީސަކު ހޮވަން ހުށަހަޅާފައިވާ އިރު، އެފަދަ އިންތިހާބަކާ އެކު މިހާރުގެ ރައީސްގެ އޮފީސް އުވިގެންދާނެ ކަމަށް ލިޔެފައިވެ އެވެ.
އޭގެ އިތުރުން ލަންކާގެ އާ ބޮޑު ވަޒީރު އައްޔަނު ކުރަން ވާނީ ޕާލިމެންޓުން ހޮވާ އާ ރައީސަކު، ޕާލިމެންޓުގެ މެޖޯރިޓީ އޮތް ގޮތަކަށް ރިއާޔަތް ކުރުމަށް ފަހު ކަމުގައި ވެސް ހުށަހަޅާފައިވެ އެވެ.
މިހާރު އޮތް ކެބިނެޓުގެ ބަދަލުގައި އިންތިގާލީ ކެބިނެޓެއް ގާއިމްކޮށް، އެ ކެބިނެޓްގައި ހުރިހާ ޕާޓީއެއްގެ މެމްބަރުން ތިބޭ ގޮތަށް ވެސް ބިލުގައިވެ އެވެ. ޕާލިމެންޓުގެ މިހާރުގެ ދައުރު ހަމަވަންދެން ވެރިކަން ކުރާނީ އެ ކެބިނެޓުން ކަމަށް ހުށަހަޅާފައިވެ އެވެ.
އިންތިގާލީ ކެބިނެޓުގެ ޒިންމާއެއް ކަމަށް ކަނޑައަޅާފައި ވަނީ އިގްތިސާދީ ކާރިސާއިން އަރައިގަތުމަށް ކުރު ރާސްތާގެ އަދި ދިގު ރާސްތާގެ ލަނޑުދަނޑުތަކާއި ސިޔާސަތުތައް އެކަށައެޅުމެވެ.
