ރާއްޖޭގައި ބާއްވާ އެންމެ ފުރަތަމަ ބާ އިމްތިހާނުގައި ބައިވެރިވާ ކޮންމެ ދަރިވަރެއްގެ އަތުން 10،000ރ. ގެ ފީއެއް ނެގުމަށް މޯލްޑިވްސް ބާ ކައުންސިލުން ކަނޑައަޅައިފި އެވެ.
ބާ ކައުންސިލްގެ ރައީސް މައުމޫން ހަމީދު ވަނީ ގާނޫނީ ފަންނު ކިޔަވާ އަދި ކިޔަވައި ނިމިފައިވާ ދަރިވަރުންނާއި މުއާސަލާތުކުރަން ހާއްސަކޮށްފައިވާ ޓީމްސް ޕްލެޓްފޯމުގައި ބާ އިމްތިހާނާ ގުޅިގެން ކަނޑައެޅި އަގުގެ މައުލޫމާތު ހިއްސާކުރައްވާފަ އެވެ.
މައުމޫން ހަމީދު ފޮނުއްވި މެސެޖުގައި ބާ ކައުންސިލުން އިމްތިހާނު ބާއްވަނީ ބޮލަކަށް ޖުމްލަ 20،000ރ. ގެ އަގަކަށް ކަމަށް ވިދާޅުވެފައިވެ އެވެ. ނަމަވެސް ޑިސްކައުންޓްއަކާއެކު މި އަހަރު ބާއްވާ އިމްތިހާނުގައި ކޮންމެ ދަރިވަރަކު ދައްކަން ޖެހެނީ 10،000ރ. އެވެ.
އެގޮތަށް ނިންމާފައިވަނީ އިމްތިހާނު ބާއްވަން ދާ ހަރަދަށް ބެލުމަށްފަހު އެވެ. ބާ ކައުންސިލްގެ ނިންމުން ރަސްމީ ގޮތެއްގައި މާދަމާގެ ވަގުތެއްގައި ނޫސް ބަޔާނަކުން ހާމަކުރަން ވަނީ ހަމަޖެހިފަ އެވެ.
ނަމަވެސް, ބާ ކައުންސިލްގެ ރައީސް މިއަދު ދަރިވަރުންނަށް ހާމަކުރި އަގުތަކާއި ދޭތެރޭ މިހަރު ވެސް ދަރިވަރުން ދަނީ ކަންބޮޑުވުން ފާޅުކުރަމުންނެވެ. އަދި ބާ އިމްތިހާނުގެ އަގުބޮޑުވުމަކީ ދަރިވަރުންނަށް ދާއިރާއަށް ނުކުތުމަށް ކުރިމަތިވާ އިތުރު ހުރަހެއް ކަމުގައި ބައެއް ދަރިވަރުން ބުނެ އެވެ.
މި އަހަރުގެ ޖޫން 25 ވަނަ ދުވަހު ބާ އިމްތިހާނު ބާއްވަން ތައްޔާރުވަމުންދާއިރު ގާތްގަނޑަކަށް 400 އެއްހާ ދަރިވަރުން އެ އިމްތިހާނުގައި ބައިވެރިވާނެ ކަމަށް ލަފާކުރެވެ އެވެ.
ބާ އިމްތިހާނަކީ ގާނޫނީ ދާއިރާއިން ކިޔަވައި ދަސްވެނިވޭ ކޮންމެ ދަރިވަރަކު އެ ދާއިރާއިން ޕްރެކްޓިސް ކުރުމުގެ ކުރިން ފުރިހަމަކުރަންޖެހޭ އިމްތިހާނެކެވެ.
އެ އިމްތިހާން ރާއްޖެއަށް ތައާރަފްކުރިީ 2019 ވަނަ އަހަރު ފާސްކުރި ގާނޫނީ ފަންނުގެ ގާނޫނުންނެވެ. އިމްތިހާނުގެ އިތުރުން ވެސް ގާނޫނީ ދާއިރާއިން ކިޔަވައި ނިމުމަށްފަހު އެއް އަހަރު ދުވަހުގެ ޓްރެއިނިންއެއް ވެސް ދަރިވަރުން ފުރިހަމަ ކުރަންޖެހޭނެ ކަމަށް ވަނީ ކަނޑައަޅައިފަ އެވެ.
