ސްރީލަންކާއަށް ކުރިމަތިވެފައިވާ މާލީ އަދި އިގްތިސާދީ ކާރިސާގެ ޒިންމާ އުފުލަން ޖެހޭނީ ކުރީގެ ސަރުކާރުން ކަމަށް މަރުކަޒީ ބޭންކުގެ ގަވަރުނަރު އަޖިތް ނިވާޑް ކަބްރާލް ތުހުމަތު ކުރެއްވުމުން، ރައީސް ގޮތަބަޔާ ރާޖަޕަކްސަ ކުރީގެ ބޮޑު ވަޒީރު ރަނިލް ވިކްރަމަސިންހަގެ ކިބައިން މައާފަށް އެދިވަޑައިގެންފި އެވެ.
ލަންކާގެ ސިޔާސީ ޕާޓީތަކުގެ މެދުގައި ފެށި ކޮންފެރެންސެއްގައި ކަބްރާލް ގައުމުގެ އިގްތިސާދީ ހާލަތާ ގުޅޭ ގޮތުން ވާހަކަ ދައްކަވައި، އެފަދަ ކާރިސާއެއް ކުރިމަތިވީ ކުރީ ސަރުކާރުގެ ސަބަބުން ކަމަށް ތުހުމަތު ކުރައްވާފަ އެވެ.
އެ ވާހަކަތަކާ މެދު ހިތްހަމަނުޖެހޭކަން ހާމަކުރައްވައި ޔޫއެންޕީގެ ލީޑަރު އަދި ކުރީގެ ބޮޑު ވަޒީރު ރަނިލް ވިދާޅުވީ މިއީ ތުހުމަތުގެ އިނގިލި ދިއްކުރަންވީ ވަގުތު ނޫން ކަމަށާއި ހުރިހާ ޕާޓީތައް ކޮންފެރެންސަކަށް އެއްވީ ކާރިސާއިން އަރައިގަނެވޭނެ ގޮތެއް ހޯދަން ކަމަށެވެ.
"މި މައްސަލައިގައި ހިފައި ދިގު ދަންމަން އުޅޭ ނަމަ، ރަސްގެފާނު ވިޖެޔާއާ ހަމައަށް ވާހަކަ ކުރިއަށް ގެންދެވިދާނެ،" ރަނިލް ވިދާޅުވި އެވެ.
ރަނިލްގެ ވާހަކަތަކަށް ފަހު ކޮންފެރެންސްގެ ރިޔާސަތުގައި އިންނެވި ރައީސް ގޮތަބަޔާ ވަނީ މައާފަށް އެދިވަޑައިގެންފަ އެވެ. އޭގެ އިތުރުން ވެސް ރަނިލް އާއި ފިނޭންސް މިނިސްޓަރު ބެސިލް ރާޖަޕަކްސައާ ދެމެދު ވެސް ހޫނު ބަހުގެ ހަމަލާތަކެއް ރައްދު ކުރި އެވެ.
ސްރީލަންކާގެ ހާލަތާ ގުޅޭ ގޮތުން އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ތައްޔާރު ކުރި ރިޕޯޓުގެ ކޮޕީއެއް ހޯދަން ރަނިލް އެދިވަޑައިގެންނެވުމުން، ރިޕޯޓު ފައިނަލް ނުވާ ކަމަށާއި މިހާތަނަށް ލިބުނީ ޑްރާފްޓެއް ކަމަށް ބެސިލް ވިދާޅުވި އެވެ.
"އައިއެމްއެފްގެ ބޯޑުން ފާސްކުރުމާ އެކު ފައިނަލް ރިޕޯޓު އަޅުގަނޑުމެން ނެރޭނަން،" ބެސިލް ވިދާޅުވި އެވެ.
ރިޕޯޓުގެ ޑްރާފްޓެއް ލިބޭނެތޯ ރަނިލް ސުވާލު ކުރެއްވުމުން، ޑްރާފްޓެއް ވެސް ފޯރުކޮށްދެވެން ނެތް ކަމަށް ބެސިލް ވިދާޅުވި އެވެ. އެ ވާހަކައާ މެދު ނުރުހުންވެ، ރަނިލް ވިދާޅުވީ ރިޕޯޓުގެ ޑްރާފްޓް ރަސްމީކޮށް މަޖިލީހަށް ހުށަހެޅުމަކީ އެންމެ ރަނގަޅު ގޮތް ކަމަށެވެ.
ލަންކާއަށް ކުރިމަތިވެފައިވާ އިގްތިސާދީ ކާރިސާގެ ތެރެއިން ސިޔާސީ ހަލަބޮލިކަން އުފެދިފައިވާ އިރު، ސިޔާސީ ޕާޓީތަކުގެ މެދުގައި އޯލް ޕާޓީ ކޮންފެރެންސެއް ބޭއްވީ މަޝްވަރާގެ ތެރެއިން ކަންކަން ހައްލު ކުރަން ސަރުކާރު ހިންގާ ކޯލިޝަނުން ބޭނުން ވާތީ އެވެ.
ކާރިސާއިން އަރައިގަތުމަށް އައިއެމްއެފްގެ އެހީ ހޯދަން ދާދި ފަހުން ސަރުކާރުން ނިންމާފައިވާ އިރު، އައިއެމްއެފްގެ އެހީ ހޯދުމާ މެދު ޕާޓީތަކުގެ ވިސްނުން ތަފާތެވެ.
