އަފްގާނިސްތާނުގެ އަންހެން ކުދިންގެ ސެކަންޑަރީ ސްކޫލްތައް ބުދަ ދުވަހު ހުޅުވުމަށް ފަހު، ކުޑަ އިރުކޮޅެއްގެ ތެރޭގައި އަނެއްކާވެސް ބަންދުކުރަން އަންގައިފި އެވެ.
މިދިޔަ އޯގަސްޓް މަހު އަފްގާނިސްތާނުގެ ވެރިކަމަށް އައި ތާލިބާނުން ވަނީ އަންހެން ކުދިންގެ ސްކޫލުތައް ބަންދުކޮށްފަ އެވެ. ނަމަވެސް ފަހުން ޕްރައިމެރީ ގްރޭޑްތަކުގައި އަންހެން ކުދިންނަށް ކިޔަވައިދޭން ފެށި އެވެ.
ތާލިބާނުން ބުނީ ހާއްސަ އުސޫލުތަކެއް ހެދުމަށް ފަހު ސެކަންޑަރީ ގްރޭޑްތަކުގައި ވެސް އަންހެން ކުދިންނަށް ކިޔަވައިދޭން ފަށާނެ ކަމަށެވެ. ގިނަ ތައްޔާރީތަކަށް ފަހު، ބުދަ ދުވަހު އަންހެން ކުދިންގެ ސެކަންޑަރީ ސްކޫލުތައް ހުޅުވި އެވެ.
ތާލިބާނުންގެ ތަރުޖަމާން އިނާމުއްﷲ ސަމަންގަނީ އޭއެފްޕީއަށް ބުނީ، ސްކޫލްތައް ހުޅުވުމަށް ފަހު އަލުން ބަންދު ކުރަން އެންގި ވާހަކައަކީ ހަގީގަތެއް ކަމަށެވެ. ނަމަވެސް އެކަމާ ގުޅޭ ތަފްސީލެއް ހިއްސާ ނުކުރެ އެވެ.
އަފްގާނިސްތާނަށް އެހީ ފޯރުކޮށްދިނުމާއި ތާލިބާން ސަރުކާރު ބަލައިގަތުމާ ގުޅޭ ގޮތުން ހިންގާ މަޝްވަރާތަކުގައި ބައިނަލްއަގްވާމީ ފަރާތްތަކުން އެންމެ ބޮޑަށް ފާހަގަކުރާ ކަމަކީ ދެ ޖިންސުގެ ކުދިންނަށް ވެސް ތައުލީމް ހާސިލްކުރުމުގެ ފުރުސަތު ހައްގު ދިނުމެވެ.
