ޗައިނާގައި މަތިންދާބޯޓެއް ވެއްޓުމާ އެކު އިންޑިއާގައި ދުއްވާ ބޮއިންގް 737 މަރުކާގެ ބޯޓުތައް "އިތުރަށް މޮނީޓާ ކުރުމަށް" އެ ގައުމުގެ އޭވިއޭޝަން ރެގިއުލޭޓަރުން އަންގައިފި އެވެ.
އެ އިދާރާއިން ބުނީ ބޮއިންގް 737 މަރުކާގެ ބޯޓުތަކުގެ ފްލައިޓް ޕްރޮސީޖާ އާއި އޮޕަރޭޝަން ކުރިއަށްދާ ގޮތާއި އެއާ ވޯދިނަސް ބެލުމަށް ޓީމުތައް ފޮނުވާފައިވާ ކަމަށެވެ.
ހޯމަ ދުވަހު ދެކުނު ޗައިނާއަށް ވެއްޓުނު ޗައިނާ އީސްޓާން އެއާލައިންސްގެ ބޮއިންގް 800-737 މަރުކާގެ ބޯޓުގައި 132 މީހުން ދަތުރު ކުރި އެވެ.
އޭގެން އެކަކު ވެސް ދިރިހުއްޓާ ފެނިފައި ނުވާ އިރު، ބޯޓު ވެއްޓުނު ސަބަބު ވެސް ދެނެގަނެވިފައެއް ނުވެ އެވެ.
އިންޑިއާއިން ބުނީ އެ ގައުމުގެ ސްޕައިސް ޖެޓް، ވިސްޓާރާ އަދި އެއާ އިންޑިއާ އެކްސްޕްރެސް އެއާލައިންގައި ވެސް އެ މަރުކާގެ ބޯޓުތައް ބޭނުންކުރާ ކަމަށެވެ.
އެމެރިކާގެ ބޮއިންގް ކުންފުނިން ބުނީ ޗައިނާގައި ބޯޓު ވެއްޓުމާ ގުޅިގެން ހިންގާ ތަހުގީގަށް އެހީވަމުންދާ ކަމަށާއި އެމެރިކާގެ ނޭޝަނަލް ޓްރާންސްޕޮޓޭޝަން ސޭފްޓީ ބޯޑާ ވެސް މުއާމަލާތު ކުރަމުންދާ ކަމަށެވެ.
މި ވަގުތު ބޮއިންގް 800-737 މަރުކާގެ 4،208 ބޯޓު ދުނިޔޭގައި އޮޕަރޭޓް ކުރެ އެވެ. އޭގެ ތެރެއިން 1،000 އަށް ވުރެ ގިނަ ބޯޓު ބޭނުން ކުރަނީ ޗައިނާގަ އެވެ.
