ޓިއުރިން (މާޗު 22) - އާޖެންޓީނާގެ މިޑްފީލްޑަރު ޕައުލޯ ޑިބާލާގެ ކޮންޓުރެކްޓް އާނުކޮށް، މި ސީޒަނަށް ފަހު ޔުވެންޓަސް އިން އޭނާ ދޫކޮށްލާނެކަން އެ ކްލަބުން ކަށަވަރުކޮށްދީފި އެވެ.
މިދިޔަ އޮކްޓޯބަރު މަހު ޔުވެންޓަސް އާއި ޑިބާލާއާ މެދު، ކޮންޓުރެކްޓް އާކުރުމަށް އަނގަބަހުން އެއްބަސްވި އެވެ. އޭރު އެއްބަސްވެފައި އޮތީ ޑިބާލާގެ އަށް ސީޒަނަށް ދޭ މުސާރަ 9.1 މިލިއަން ޑޮލަރަށް ބޮޑުކުރުމަށެވެ.
އެހެން ނަމަވެސް، ޑިބާލާގެ އޭޖެންޓުންނާއި ޔުވެންޓަސް އިން އިއްޔެ ބޭއްވި ބައްދަލުވުމުގައި، ޔުވެންޓަސް އިން ޑިބާލާގެ ކޮންޓުރެކްޓް އާކުރުމަށް ރަސްމީކޮށް "އޮފާ"އެއް ހުށަހަޅާފައެއް ނުވެ އެވެ.
ޔުވެންޓަސްގެ ސީއީއޯ މައުރީޒިއޯ އަރީވަބެނޭ ވަނީ ޑިބާލާގެ ކޮންޓުރެކްޓް އާކުރުމަށް އެ ކްލަބުން މަސައްކަތް ނުކުރާކަން ކަށަވަރުކޮށްދީފަ އެވެ. އަދި އޮކްޓޫބަރު މަހު އަނގަބަހުން އެއްބަސްވުމަކަށް އާދެވުނު ނަމަވެސް، ޖެނުއަރީގެ ޓްރާންސްފާގައި ފިއޮރެންޓީނާގައި ހުރި ސާބިއާގެ ފޯވަޑް ޑުސާން ވްލަހޯވިޗް އެ ކްލަބަށް ގެނައި ހިސާބުން، ކްލަބުގެ ވިސްނުން ބަދަލުވެފައިވާ ކަމަށެވެ.
"ކްލަބުގެ ފުޓްބޯޅައިގެ އޮނިގަނޑު ވަރަށް ބޮޑަށް ބަދަލުވެއްޖެ ވްލަހޯވިޗް މި ކްލަބާ ގުޅުނު ހިސާބުން. މި ބަދަލުތަކުގެ ތެރޭގައި ޑިބާލާގެ ކޮންޓުރެކްޓް ކަންތައްތައް ވެސް ހިމެނޭ. އެހެންވެ ކޮންޓުރެކްޓް އާނުކުރީ،" އަރީވަބެނޭ ބުންޏެވެ. "ޔުވެންޓަސް އަށް އޮތް އެއްބަސްވި މުސާރަ ކުޑަކޮށް، ކޮންޓުރެކްޓް އާކުރަން ހުށަހެޅެން. އެކަމަކު އެއީ ޑިބާލާ އަށް ކުރެވޭ ބޭއިހުތިރާމެއް."
ޕަލޭމޯ އިން 2015 ވަނަ އަހަރު ޔުވެންޓަސް އަށް ބަދަލުވި ޑިބާލާ އަށް ފާއިތުވި ދެ އަހަރުގެ ތެރޭގައި އަނިޔާގެ ގިނަ މައްސަލަތަކެއް ކުރިމަތިވި އެވެ.
އަރީވަބެނޭ ބުނީ ޑިބާލާ އަށް ކުރިމަތިވި އަނިޔާގެ މައްސަލަތަކާ ގުޅިގެން، އޭނާގެ ބޭނުން ކްލަބަށް ނުހިފުމަކީ ކޮންޓުރެކްޓް އާކުރުމަށް ނިންމި އެއް ސަބަބު ކަމަށެވެ.
"ޔުވެންޓަސް އިން މިހާރު މި ފަށާފައިވާ ޕްރޮޖެކްޓްގައި، ޑިބާލާ އަކީ މައިގަނޑު ކުޅުންތެރިއެއް ނޫން،" އަރިވަބެނޭ ބުންޏެވެ.
މީޑިއާ ރިޕޯޓްތަކުން ބުނާގޮތުގައި ޑިބާލާ ގެންދަން، ޔުވެންޓަސްއާ ވާދަވެރި އިންޓަ މިލާނުން ޝައުގުވެރިވެ އެވެ. މީގެ އިތުރުން އެތުލެޓިކޯ މެޑްރިޑުން ވެސް ޑިބާލާ ގެންދަން މަސައްކަތްކުރާނެ ކަމަށް ރިޕޯޓްތަކުން ބުނެ އެވެ. -- އޭއެފްޕީ
