ޔޫކްރެއިންގައި ކުރަމުންދާ ހަނގުރާމައާ މެދު ޖަޕާނުން ގެންގުޅޭ ވިސްނުން ކަމުނުދާ ކަމަށް ބުނެ، ދެ ވަނަ ބޮޑު ހަނގުރާމައަށް ފަހު ޖަޕާނާ އެކު ފެށި ސުލްހައިގެ މަޝްވަރާ ރަޝިއާއިން މެދުކަނޑާލައިފި އެވެ.
ރަޝިއާއިން އެގޮތަށް ނިންމީ އެ ގައުމާ ދެކޮޅަށް ދަތިކުރުމުގެ ފިޔަވަޅު އެޅުމުގައި ޖަޕާނުން ބައިވެރިވުމުންނެވެ. ޖަޕާނަކީ ދަތިކުރުމުގެ ފިޔަވަޅު އެޅި ޖީ7 ގެ މެމްބަރު ގައުމެކެވެ.
ދެ ވަނަ ބޮޑު ހަނގުރާމައަށް ފަހު މިއަދާ ހަމައަށް ޖަޕާނާއި ރަޝިއާއިން ސުލްހައިގެ އެއްބަސްވުމެއްގައި ސޮއިކޮށްފައި ނުވަނީ ހަތަރު ރަށެއްގެ މައްސަލައިގަ އެވެ.
ދެ ވަނަ ބޮޑު ހަނގުރާމަ ނިމެން ގާތްވެފައި ވަނިކޮށް، ޖަޕާނުގެ އެ ހަތަރު ރަށަކީ ރަޝިއާގެ ބިމުގެ ސަރަހައްދުގެ ގޮތުގައި ރަޝިއާއިން އިއުލާނުކުރި އެވެ.
"މި ވަގުތު ހާލަތު ހުރި ގޮތުން، ރަޝިއާ ފަޅިން، ޖަޕާނާ އެކު ސުލްހައިގެ މަޝްވަރާ ކުރުމުގެ އެއްވެސް ވިސްނުމެއް ނެތް،" ރަޝިއާގެ ފޮރިން މިނިސްޓްރީން ނެރުނު ބަޔާނެއްގައި ބުންޏެވެ.
އޭގެ އިތުރުން ޖަޕާނާއި ރަޝިއާއާ ދެމެދު ހިޔާލު ތަފާތުވުން އުފެދިފައި އޮތް ހަތަރު ރަށަށް ޖަޕާނުގެ ރައްޔިތުން ވިސާއާ ނުލައި ދަތުރު ކުރެވޭ ގޮތަށް އޮތް އުސޫލު އުވާލާފައިވާ ކަމަށް ވެސް ބުންޏެވެ.
ޖަޕާނުގެ ބޮޑު ވަޒީރު ފުމިއޯ ކިޝީޑާ މިދިޔަ ހޮނިހިރު ދުވަހު އިންޑިއާގެ ބޮޑު ވަޒީރު ނަރެންދްރަ މޯދީއާ ބައްދަލުކުރެއްވި އިރު، ރަޝިއާއާ ދެކޮޅަށް އިންޑިއާގެ އެއްބާރުލުން ލިބޭތޯ މަޝްވަރާ ކުރެއްވި އެވެ.
