ޔޫކްރެއިން ހަނގުރާމައާ ހެދި ތެލަށް ބަރޯސާވުން އިތުރުވުމަކީ "މޮޔަކަމެއް" ކަމަށާއި އޭގެ ސަބަބުން މޫސުމީ ބަދަލު ކުޑަ ކުރަން ދުނިޔެއިން ކަނޑައެޅި ޓާގެޓްތަކަށް ވާސިލްނުވެވުމުގެ ބިރު އެބަ އޮތް ކަމަށް އދ. އިން ބުނެފި އެވެ.
ރަޝިއާގެ ސިފައިން ޔޫކްރެއިނަށް އަރައި ފެށި ހަނގުރާމައިގެ ސަބަބުން ދުނިޔޭގައި ބޯޓު ދެއްޔާއި، ތެޔޮ އަދި ގޭހުގެ އަދު ވަނީ ވަރަށް ބޮޑަށް އުފުލިފަ އެވެ. އަދި ރަޝިއާގެ އުފެއްދުންތަކުގެ ބަދަލުގައި އެހެން ގައުމުތަކުގެ ހަކަތައިގެ އުފެއްދުންތައް ލިބޭނެ ގޮތް މަގުފަހިކުރެވޭތޯ ހުޅަނގުން ދަނީ ބަލަމުންނެވެ.
ނަމަވެސް އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ވިދާޅުވީ ކުރު ރާސްތާގައި އަޅާ އެ ފިޔަވަޅުތަކާ ހެދި، މޫސުމީ ބަދަލު ކުޑަ ކުރަން ގައުމުތަކުން ކަނޑައެޅި ލަނޑުދަނޑުތަކަށް ވާސިލްނުވެވިދާނެ ކަމަށެވެ. ޗައިނާ އާއި އެހެން ގައުމުތަކަށް ގުޓެރޭޒް ގޮވާލެއްވީ 2040 ވަނަ އަހަރުގެ ކުރިން ބޯޓު ދެލި ބޭނުން ކުރުން އެއްކޮށް ހުއްޓާލުމަށެވެ.
"މިއީ މޮޔަކަމެއް. އިއާދަނުކުރެވޭ ހަކަތައަށް ދެވިހިފައިގެން ތިބުމަކީ އަޅުގަނޑުމެންގެ ނެތިދިޔުން ކަށަވަރުވާ ކަމެއް."
ކޮޕް26 ސަމިޓަށް ފަހު މޫސުމީ ބަދަލާ ގުޅޭ ގޮތުން ދެއްވި ފުރަތަމަ ބޮޑު ތަގުރީރުގައި ގުޓެރޭޒް ވަނީ ގްލާސްގޯގައި މިދިޔަ އަހަރުގެ ފަހުކޮޅު ކުރިއަށް ދިޔަ ސަމިޓުން އެދެވޭ ނަތީޖާތަކެއް ނުނެރެވޭކަން ފާހަގަކުރައްވާފަ އެވެ.
ސައިންސްވެރިން ދެކޭ ގޮތުގައި މޫސުމީ ބަދަލުގެ ސަބަބުން ދުނިޔެ ނުރައްކާތެރި ފައްތަރަކަށް ދިޔުން ހުއްޓުވުމަށް، ދުނިޔޭގެ ފިނިހޫނުމިން މި ގަރުނުގައު 1.5 ޑިގްރީ ސެލްސިއަސްއަށް ވުރެ މަތިވިޔަ ދީގެން ނުވާނެ އެވެ.
