ސްރީލަންކާގެ ރައީސް ގޮތަބަޔާ ރާޖަޕަކްސަ އިސްތިއުފާ ދިނުމާ މެދު ވިސްނަމުން ގެންދަވާ ކަމަށް ސޯޝަލް މީޑިއާގައި ފެތުރޭ ހަބަރު ދޮގުކޮށްފި އެވެ.
ގޮތަބަޔާގެ ތަރުޖަމާން ކޮންގްސްލީ ރަތްނަޔަކެ ޑެއިލީ މިރާ ނޫހަށް ވިދާޅުވީ އެއީ އެއްވެސް ހަގީގަތެއް ނެތް ދޮގު ހަބަރުތަކެއް ކަމަށެވެ.
"ރައީސް ގޮތަބަޔާއަކީ މިފަދަ ކާރިސާތަކާ ކުރިމަތިވުމުން ފިއްލަވާނެ ބޭފުޅެއް ނޫން. އެމަނިކުފާނަކީ އަޒުމަކާ އެކު ދުރު ވިސްނުން ގެންގުޅުއްވާ ރައީސެއް."
ރަތްނަޔަކެ ވިދާޅުވީ ރައީސްގެ ސަމާލުކަން މި ވަގުތު ދެއްވަނީ އާއްމުންނަށް ދިމާވާ ގޮންޖެހުންތައް ހައްލު ކުރުމަށް ކަމަށާއި އެކަންކަމާ ގުޅޭ މަސައްކަތް ކޮންމެ ދުވަހަކު ވެސް ކުރައްވާ ކަމަށެވެ.
"އެފަދަ ދޮގު ހަބަރުތައް ފަތުރަނީ ރައީސްގެ ރޭވުންތަކަށް ހުރަސް އަޅައި، ސަރުކާރުގައި ހަމަނުޖެހުން އުފައްދަން ބޭނުންވާ ގްރޫޕްތަކުން."
ރައީސް އިސްތިއުފާ ދޭން އުޅޭ ކަމަށް ފެތުރޭ ހަބަރުތައް ދޮގުކޮށްފައިވާ އިރު، ލަންކާ ސަރުކާރުން އެއް ބިލިއަން ޑޮލަރުގެ ލޯނަކަށް ޗައިނާގައި އެދިފައިވާ ކަމަށް ނޫސްތަކުން ހޯމަ ދުވަހު ރިޕޯޓުކުރި އެވެ.
ޗައިނާއިން ލަންކާއަށް ކަނޑައަޅާފައި ހުންނަ ސަފީރު ގީ ޒެންހޮންގް ބޭއްވި ޕްރެސް ކޮންފެރެންސެއްގައި ވިދާޅުވީ ލަންކާ ސަރުކާރުން އެދުނީ އެއް ބިލިއަން ޑޮލަރުގެ ލޯނެއްގެ އިތުރުން 1.5 ބިލިއަން ޑޮލަރުގެ ކްރެޑިޓް ފެސިލިޓީއަކަށް ކަމަށެވެ.
އޭނާ ވިދާޅުވީ ކޮވިޑްގެ ބަލިމަޑުކަމާ ހެދި 2.8 ބިލިއަން ޑޮލަރުގެ މާލީ އެހީތެރިކަން ލަންކާއަށް ފޯރުކޮށްދިން ކަމަށާއި ލަންކާ ރައްޔިތުންނަށް ދިމާވެފައިވާ ދަތި ދަނޑިވަޅުގައި ޗައިނާއިން ދެރައެއް ނުދޭނެ ކަމަށެވެ.
ޗައިނާގެ އެހީއަށް ލަންކާ ސަރުކާރުން އެދިފައިވާ އިރު، މީގެ ކުރިން ވަނީ އިންޑިއާގެ އެހީތެރިކަން ވެސް ހޯދާފަ އެވެ.
