މޮނާކޯ (މާޗް 20) - ފްރެންޗް ލީގުގައި މިރޭ މޮނާކޯ އިން 3-0 އިން ލީގުގެ އެއް ވަނައިގައި އޮތް ޕީއެސްޖީ ބަލިކުރިއިރު، މިއީ ޕީއެސްޖީ ލަދުގަންނަން ޖެހޭ ނަތީޖާއެއް ކަމަށް އެ ޓީމުގެ ކޯޗު މައުރީސިއޯ ޕޮޗެޓީނޯ ބުނެފި އެވެ.
ރެއާލް މެޑްރިޑް އަތުން ޗެމްޕިއަންސް ލީގުން ކެޓުމަށް ފަހު ޕީއެސްޖީގެ ފޯމު ވަނީ ދަށްވެފަ އެވެ. ބަލިވެ އުޅޭތީ ލިއޮނަލް މެސީ ނުލައި، މިއަދުގެ މެޗު މޮނާކޯ ދަނޑުގައި ކުޅުނުއިރު، ޕީއެސްޖީގެ ތަރިން ކަމަށްވާ ކީލިއަން އެމްބާޕޭ އާއި ނޭމާ ވެސް ފެނުނީ އާދައިގެ ގޮތަކަށެވެ.
މޮނާކޯ އަށް ލީޑުނަގައިިދިނީ 25 ވަނަ މިނިޓްގައި ފްރާންސްގެ ފޯވާޑް ބެން ޔެޑާ އެވެ. އޭރިއާތެރެއިން ބެން ޔެޑާ ފޮނުވާލި ބޯޅަ ވަނީ ގޯލުގެ ކައިރީ ކަނަށެވެ. މެޗުގެ 68 ވަނަ މިނިޓްގައި ކެވިން ވޮލަންޑް ވަނީ މޮނާކޯގެ ލީޑުފުޅާކޮށްދީފަ އެވެ. އަދި 84 ވަަނަ މިނިޓްގައި ބެން ޔެޑާ ވައްދާލި ޕެނަލްޓީން މޮނާކޯ ތިން ޕޮއިންޓް ޔަގީންކުރި އެވެ. މި ދެ ގޯލާ އެކު ބެން ޔެޑާ ވަނީ ލީގުގައި 17 ގޯލު ޖަހައި، ލަނޑު ލިސްޓު އެއް ވަނައިގައި އެމްބާޕޭ އަށް ވުރެ ދެ ގޯލު ކުރިއަށް ޖެހިލައިފަ އެވެ.
ކުރިން މޮނާކޯ އަށް ކުޅުނު ޕީއެސްޖީގެ އެމްބާޕޭ އަށް މިރޭ ގިނަ ފުރުސަތުތަކެއް ލިބުނު ނަމަވެސް ގޯލެއް ނުޖެހުނު.
މެޗަށް ފަހު ޕޮޗެޓީނޯ ބުނީ ކޯޗަކަށް ކޮންމެ ގޮތަކަށް ވެސް ކިޔައިދެވިދާނެ ކަމަށާއި މީގެ ކުޅުންތެރިން އަމިއްލަ އަށް ވެސް ކުޅޭހިތުން އެކަން ކުރަންޖެހޭނެ ކަމަށެވެ.
"ކުޅިވަރުގެ ހަމަތަކުން ބަލާއިރު މިއީ ލަދުގަންނަން ޖެހޭ ނަތީޖާއެއް. އަހަރެމެން ކޮންމެ ހެނެއް ވެސް އެބަޖެހޭ ޗެމްޕިއަންސް ލީގުން ކެޓުމުގެ މި މާޔޫސްކަމުން ވީ އެންމެ އަވަހަށް އަރައިގަންނަން،" ޕޮޗެޓީނޯ ބުންޏެވެ.
އެމްބާޕޭ ވެސް ވަނީ ޗެމްޕިއަންސް ލީގުން ޕީއެސްޖީ ކެޓުމުން ދިމާވެފައިވާ މައްސަލަތަކަށް ވީ އެންމެ އަވަހަށް ހައްލެއް ބޭނުންވާ ކަމަށް ބުނެފަ އެވެ.
ލީގުގެ އެއް ވަނައިގައި ޕީއެސްޖީ އޮތީ 13 ޕޮއިންޓުގެ ލީޑަކާ އެކު އެވެ. އެއީ 29 މެޗުން 65 ޕޮއިންޓާ އެކު އެވެ. ދެ ވަނައިގައި އޮތީ މިރޭ 6-1 އިން މެޓްޒް ބަލިކުރި ރެނެސް އެވެ. އެ ޓީމަށް ވަނީ 29 މެޗުން 52 ޕޮއިންޓާ އެކު އެވެ.
ތިން ވަނައިގައި އޮތް މާސޭ އާއި ހަތަރެއްގައި އޮތް ނީސް މިރޭ ކުޅޭ މެޗުން މޮޅުވާ ޓީމަކަށް ދެ ވަނަ އަށް އެރޭނެ އެވެ. ނީސް އާއި މާސޭ އެއްވަރުވެއްޖެނަމަ ދެ ވަނައިގައި އޮންނާނީ ރެނެސް އެވެ.
