ސައުދީ އަރަބިއްޔާގެ ދައުލަތުގެ ތެޔޮ ކުންފުނި، ސައުދީ އަރަމްކޯގެ ފައިދާ 2021 ވަނަ އަހަރު ދެ ގުނަ އިތުރުވުމާ އެކު، ހަކަތަ އުފެއްދުމުގައި ކުރާ އިންވެސްޓްމަންޓް މައްޗަށް ޖައްސަން ނިންމައިފި އެވެ.
ކުންފުނިން ނިންމީ ކުރިއަށް އޮތް ފަސް އަހަރު އުފެއްދުންތެރިކަން ވަރަށް ބޮޑަށް މައްޗަށް ޖެއްސުމަށެވެ. ރަޝިއާއިން ޔޫކްރެއިންގައި ފެށި ހަނގުރާމައިގެ ސަބަބުން ދުނިޔޭގެ ބާޒާރުގައި ތެލާއި ގޭހުގެ އަގު ވަނީ ވަރަށް ބޮޑަށް އުފުލިފަ އެވެ.
ރަޝިއާގެ ތެލާއި ހަކަތަ ބޭނުން ކުރުން ހުއްޓާލަން ބައެއް ގައުމުތަކުން ވިސްނާތީ، ރަޝިއާ ނޫން މާކެޓުތަކުގެ ތެލާއި ގޭސް އިތުރަށް އުފެއްދުމަށް އޮތް ޕްރެޝަރު ދަނީ ބޮޑުވަމުންނެވެ.
މިދިޔަ ހަފްތާގައި އިނގިރޭސި ބޮޑު ވަޒީރު ބޮރިސް ޖޯންސަން ސައުދީ އަރަބިއްޔާއަށް ވަޑައިގެން ތެލުގެ އުފެއްދުންތެރިކަން މައްޗަށް ޖެއްސުމަށް ބާރު އެޅުއްވި އެވެ. އޭގެ އިތުރުން އެމެރިކާއިން ވެސް ވަނީ އެކަމާ ގުޅޭ މަޝްވަރާތައް ސައުދީ އަރަބިއްޔާ އާއި ތެޔޮ އުފައްދާ އެހެން ގައުމުތަކާ އެކު ބާއްވާފަ އެވެ.
ތެޔޮ އުފައްދާ ގައުމުތައް ހިމެނޭ އޯޕެކްގެ މެމްބަރުންގެ ތެރެއިން އެންމެ ގިނައިން ތެޔޮ އުފައްދާ ގައުމަކީ ސައުދީ އަރަބިއްޔާ އެވެ. އެހެންކަމުން ސައުދީ އަރަބިއްޔާއިން އުފެއްދުންތެރިކަން އަދިވެސް މަތިކޮށްފި ނަމަ، ހަކަތައިގެ އަގު ތިރިކުރެވޭނެ އެވެ.
ކޮވިޑް ބަލިމަޑުކަމުގެ ސަބަބުން 2020 ވަނަ އަހަރު ސައުދީ އަރަމްކޯގެ ފައިދާ ވަރަށް ބޮޑަށް ވެއްޓުނެވެ. ނަމަވެސް ގައުމުތަކުން އަލުން ބޯޑަރު ހުޅުވަން ފެށުމާ އެކު، 2021 ވަނަ އަހަރު ލިބުނު އާމްދަނީ އިތުރުވި އެވެ.
އެގޮތުން 2020 ވަނަ އަހަރު 49 ބިލިއަން ޑޮލަރުގެ ފައިދާއެއް ލިބުނު އިރު، 2021 ވަނަ އަހަރު ވަނީ އެ އަދަދު 110 ބިލިއަން ޑޮލަރަށް މަތިވެފަ އެވެ. އެނެލިސްޓުން ލަފާކުރާ ގޮތުގައި 2022 ވަނަ އަހަރުގެ ފައިދާ އެއަށްވުރެ ވެސް މަތިވާނެ އެވެ.
