ތެލުގެ ދަތިކަމާ ހެދި ކޮލޮމްބޯ ސިޓީގައި ކުނި އުކުމުގެ ހިދުމަތް މާޗް މަސް ތެރޭގައި ދެ ވަނަ ފަހަރަށް މެދުކަނޑާލައިފި އެވެ.
ކޮލޮމްބޯ މުނިސިޕަލް ކައުންސިލުން ބުނީ ކުނި އުކުމުގައި ބޭނުން ކުރާ އުޅަނދުތަކުން ތެޔޮ ހުސްވެފައި ވާތީ، ގަންގަރަމަ، ނަރަހެންޕިތަ، ބޮރެއްލާ އަދި ޑެމަޓަގޮޑައިން ހިދުމަތް މެދުކެނޑިފައިވާ ކަމަށެވެ.
މާޗް މަހުގެ ފުރަތަމަ ހަފްތާގައި ވެސް ތެލުގެ ދަތިކަމާ ހެދި ކޮލޮމްބޯ ސިޓީގައި ކުނި އުކުމުގެ ހިދުމަތް މެދުކަނޑާލަން ޖެހުނެވެ.
ތެލުގެ ބާވަތްތައް ހޯދަން އާއްމުން ދިގު ކިޔުތަކުގައި މަޑު ކުރަން ޖެހިފައިވާ އިރު، ކިޔުގައި ހުރި ދެ ވަނަ މީހަކު އާދީއްތަ ދުވަހު ވަނީ މަރުވެފަ އެވެ.
ޑެއިލީ މިރާ ނޫހުން ބުނީ ކަޑަވަތަ ތެޔޮ ކިޔުގައި ހުއްޓާ ހޭނެތިގެން ވެއްޓުނު އުމުރުން 70 އަހަރުގެ މީހަކު ހޮސްޕިޓަލަށް ގެންދިޔަ އިރު މަރުވެފައިވާ ކަމަށެވެ.
ހޮނިހިރު ދުވަހު ވެސް ކެންޑީގައި ކަރާސީން ތެޔޮ ގަންނަން ކިޔުގައި ހުރި އުމުރުން 71 އަހަރުގެ މީހަކު ހޭނެތިގެން ވެއްޓި މަރުވި އެވެ.
ސްރީލަންކާއަށް ދިމާވެފައިވާ މާލީ އަދި އިގްތިސާދީ ކާރިސާގެ ސަބަބުން އާއްމުންގެ ދިރިއުޅުމަށް ބުރޫ އަރާފައި ވާތީ ފަށާފައިވާ މުޒާހަރާތައް އާދީއްތަ ދުވަހު ވެސް ބޭއްވި އެވެ.
އުއްބައްތި ދިއްލައިގެން މަގުމަތީގައި ސުލްހަވެރިކަމާ އެކު މުޒާހަރާ ކުރަމުންދާ މީހުންނަކީ އެއްވެސް ސިޔާސީ ފިކުރަކަށް ނިސްބަތްވާ މީހުން ނޫން ކަމަށް ރިޕޯޓުތައް ބުނެ އެވެ.
މުޒާހަރާގެ ބައިވެރިން ބުނާ ގޮތުގައި ބޭރު ފައިސާގެ ދަތިކަމާ ހެދި ތެޔޮ ނުލިބި، ކަރަންޓާއި ފެން އަދި އެހެނިހެން ހިދުމަތްތައް މެދުކެނޑި، ތަކެތީގެ އަގު އުފުލެން މެދުވެރިވީ ސަރުކާރަން އަވަސް ފިޔަވަޅު ނޭޅުމުންނެވެ.
