ބާސެލޯނާ (މާޗް 20) - ފްރާންސްގެ ޕީއެސްޖީ އަށް ކުޅެމުން އަންނަ ބާސެލޯނާގެ ކުރީގެ ކެޕްޓަން ލިއޮނަލް މެސީ އަށް އެ ކުލަބުން އަބަދުވެސް މަރުހަބާ ކިޔާނެ ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.
މި ސީޒަން ފެއްޓުމުގެ ކުރިން މެސީ، 21 އަހަރަށް ފަހު ބާސެލޯނާ ދޫކޮށް ޕީއެސްޖީ އަށް ބަދަލުވީ ހިލޭ ޓްރާންސްފާއެއްގަ އެވެ. ޕީއެސްޖީ އަށް ބަދަލުވެ މެސީ މިހާތަނަށް އެ ޓީމަށް 26 މެޗު ވަނީ ކުޅެދީފަ އެވެ. އެ މެޗުތަކުގައި އޭނާ އަށް ޖެހުނީ އެންމެ ހަތް ގޯލެވެ. އެއީ ޗެމްޕިއަންސް ލީގުގައި ޖެހި ފަސް ގޯލާއި ފްރެންޗް ލީގުގައި ޖެހި ދެ ގޯލެވެ.
މިރޭ ސްޕެނިޝް ލީގުގެ ފޯރިގަދަ އެލްކްލަސިކޯ މެޗުގެ ކުރިން މެސީއާ ގުޅޭގޮތުން ނޫސްވެރިން ސުވާލުކުރުމުން ޒަވީ ބުނީ، ބާސެލޯނާ އިން އަބަދުވެސް އެ ޓީމުގެ ލެޖެންޑް މެސީ އަށް ފުރުސަތު އޮންނާނެ ކަމަށެވެ.
"ބާސެލޯނާގެ ދޮރު އަބަދު ވެސް މެސީ އަށް އޮތީ ހުޅުވިފައި. ކުލަބުގެ ތަމްރީންތައް ބަލަން ވިޔަސް، ނޫނީ އަހަންނާ ވާހަކަދައްކަން ވިޔަސް މެސީ އަށް އަބަދު ވެސް އެންމެން ވެސް މަރުހަބާ ކިޔާނެ" މެސީގެ ރަން ދުވަސްވަރު އޭނާއާ އެކު ބާސެލޯނާއަށް ކުޅެ އެ ކްލަބުގެ ކެޕްޓަންކަން ވެސް ކުރި ޒަވީ ބުންޏެވެ.
"މެސީގެ ކުރިމަގާ މެދު އަހަރެން އެއްޗެއް ނުބުނާނަން، ސަބަބަކީ އެއީ ޕީއެސްޖީގެ ކުޅުންތެރިއެއް، ބާސެލޯނާ އަށް މެސީ އެނބުރި އަންނަން ހުރިހާ ސަޕޯޓަރުން ވެސް ބޭނުންވޭ."
ޒަވީ ގަބޫލުކުރާ ގޮތުގައި މެސީ އަށް އެކަށީގެންވާ އަލްވަދާއުއެއް ބާސެލޯނާ އިން ނުކިޔަ އެވެ. އެހެންކަމުން ބާސެލޯނާ އަށް މެސީ ކޮށްދިން ކަންކަމަކުގެ އަގު ވަޒަންކުރަން ސަޕޯޓަރުންނަށް ފުރުސަތު ދެވެން އޮވެއްޖެ ނަމަ އެ ފުރުސަތަށް މަސައްކަތްކުރާނެ ކަމަށް އޭނާ ބުންޏެވެ.
މެސީ ދިޔަ ފަހުން މި ސީޒަނުގެ ކުރީކޮޅުގައި ބާސެލޯނާގެ ފޯމަށް އަސަރުކުރި އެވެ. ސީޒަން ފެށިއިރު ބާސެލޯނާގައި ހުރި ކޯޗު، ނެދަލެންޑްސްގެ ރޮނާލްޑް ކޫމަން ވަކިކޮށް ގަތަރުގެ އަލް ސާދުގައި ހުރި ޒަވީ އާ ޓީމު ހަވާލުކުރި އެވެ. ބާސެލޯނާ ހަމަަމަގަށް އަޅުވަން ކުރާ މަސައްކަތުގައި ޒަވީ އަންނަނީ ކުރިއެރުން ހޯދަމުންނެވެ. މި ގޮތުން އެންމެ ފަހުން ކުޅުނު ހަތް މެޗުގެ ތެރެއިން ހަ މެޗުން އެ ޓީމު ވަނީ މޮޅުވެފަ އެވެ. ލީގުގެ ގަދަ ހަތަރަކަށް މިހާރު ބާސެލޯނާ ވާދަކުރަމުން އަންނައިރު، ޔުއެފާ ޔޫރޮޕާ ލީގުގެ ކުއާޓާ ފައިނަލުން ވެސް އެ ޓީމު ވަނީ ޖާގަ ހޯދައިފަ އެވެ.
ފްރެންޗް ލީގު އެއް ވަނައިގައި ޕީއެސްޖީ އޮތް ކަމުގައި ވިޔަސް އެ ޓީމު ވަނީ ލީގު ކަޕުން ކަޓައިފަ އެވެ. އަދި ޕީއެސްޖީގެ އެންމެ ބޮޑު ޓާގެޓް ކަމަށްވާ، ޗެމްޕިއަންސް ލީގު ކާމިޔާބު ކުރުން ވެސް މި ފަހަރު ފުރިހަމަވާން ނެތެވެ. އެއީ ގަދަ 16 ބުރުން ރެއާލް މެޑްރިޑް އަތުން ބަލިވެ ކެޓުމުންނެވެ.
ޗެމްޕިއަންސް ލީގުން ކެޓުމުން ޕީއެސްޖީގެ ސަޕޯޓަރުންގެ ރުޅިގަނޑު ފަޅައިގެން ގޮސް އަންނަނީ މެސީ އާއި އެ ޓީމުގެ ގިނަ ކުޅުންތެރިންނަށް ވަރަށް ބޮޑަށް ފާޑުކިޔަމުންނެވެ. އެ ގޮތުން އެންމެ ފަހުން ލީގުގައި ޕީއެސްޖީ ކުޅުނު މެޗުގައިވެސް ސަޕޯޓަރުން ވަނީ މެސީ ހިމެނޭހެން އެ ޓީމުގެ ގިނަ ކުޅުންތެރިންނަށް ބޯޅަ ލިބޭ ކޮންމެ ފަހަރަކު އަޑުގަދަކޮށް އޭނާ ޖެއްސުންކޮށްފަ އެވެ.
ޕީއެސްޖީގައި އަދި ސަޕޯޓަރުން ބޭނުންވާ ފެންވަރުގެ ކުޅުމެއް މެސީ އަށް ނުދެއްކޭތީ ގިނަ ބަޔަކު ފާޑުކިޔަމުން އަންނައިރު، މެސީގެ ދިފާއުގައި ބައެއް ކުޅުންތެރިން އަންނަނީ ވާހަކަ ދައްކަމުންނެވެ. އޭގެ ތެރޭގައި މެސީގެ ވާދަވެރި، ރެއާލް މެޑްރިޑްގެ ކެޕްޓަން ކަރިމް ބެންޒެމާ އާއި ބާސެލޯނާގެ ލެޖެންޑުން ހިމެނެ އެވެ.
އަނެއް ކޮޅުން މި ސީޒަނަށް ފަހު މެސީ، ޕީއެސްޖީ ދޫކޮށްލަން އުޅޭކަމަށް މީޑިއާތަކުގައި ވަނީ އަޑުފެތުރިފަ އެވެ. ފުޓްބޯޅަ ދިރާސާ ކުރާ މީހުންނާއި ގިނަ ސަޕޯޓަރުން ދެކޭގޮތުގައި މެސީ އެނބުރި ދާން އެންމެ ރަނގަޅުވާނީ ކެރިއަރު އެއްކޮށް ކަހަލަ ގޮތަކަށް ހޭދަކުރި ބާސެލޯނާ އަށެވެ.
ސްޕެނިޝް ލީގުގައި މެސީގެ ވިދުން އެންމެ ގަދަވި އެލް ކްލަސިކޯ މެޗު މިރޭ އޮންނާނީ އޭނާ ނެތި އެވެ. މި ފޯރިގަދަ މެޗު ފަށާނީ މިރޭ ރާއްޖެ ގަޑިން 1 ޖަހާއިރު އެވެ.
