ސްރީލަންކާގެ ކެންޑީގައި ކަރާސީން ތެޔޮ ގަންނަން ދިގު ކިޔުއެއްގައި މަޑުކޮށްގެން ހުރި މީހަކު ހޭނެތިގެން ވެއްޓި މަރުވެއްޖެ އެވެ.
ލަންކާއަށް މިހާރު ކުރިމަތިވެފައިވާ އިގްތިސާދީ އަދި މާލީ ކާރިސާގައި އާއްމު ރައްޔިތުންގެ ދިރިއުޅުމަށް ބުރޫ އަރާފައިވާ އިރު، ތެކުގެ ބާވަތްތައް ގަންނަން ޖެހެނީ އެތައް ވަގުތެއް ކިޔުގައި ހޭދަކޮށްގެންނެވެ.
އެގޮތުން ދެ ކިލޯމީޓަރަށް ވުރެ ދިގު ސަފުތައް ބައެއް ހިސާބުތަކުގައި ހަދަ އެވެ. މީގެ ކުރިން ވެސް ސަފުގައި މަޑުކޮށްގެން ތިބޭ ބައެއް މީހުން ހޭނެތޭ މަންޒަރު ފެންނަ ވީޑިއޯ އާއި ފޮޓޯ އާއްމުވެފައިވެ އެވެ.
ޑެއިލީ މިރާ ނޫހުން ބުނީ ހޮނިހިރު ދުވަހު ކިޔުގައި ހުއްޓާ ހޭނެތިގެން ވެއްޓުނީ އުމުރުން 71 އަހަރުގެ ފިރިހެނެއް ކަމަށެވެ. އޭނާ ހޮސްޕިޓަލަށް ގެންދިޔަ އިރު ވެސް އޮތީ މަރުވެފަ އެވެ.
ތެޔޮ ގަންނަން ދިގު ކިޔުތައް ހެދުމުގެ އިތުރުން ފެނާއި ކަރަންޓު އަދި ގޭހުގެ ހިދުމަތަށް ވެސް ވަނީ ބުރޫ އަރާފަ އެވެ. އެކި ހިސާބުތަކުން ތާވަލުކޮށްގެން ކޮންމެ ދުވަހަކު ކަރަންޓުގެ ހިދުމަތް މިހާރު ކަނޑަ އެވެ.
އޭގެ އިތުރުން ކޮލޮމްބޯގެ ބައެއް ހިސާބުތަކަށް ހޮނިހިރު ދުވަހު 24 ގަޑިއިރަށް ފެނުގެ ހިދުމަތް މެދުކެނޑުނެވެ. ކަމާ ބެހޭ ފަރާތްތަކުން ބުނީ އެއީ ހޮޅިއަކަށް ދިމާވި މައްސަލައަކާ ހެދި ކަމަށެވެ.
ލަންކާގެ އާއްމު ރައްޔިތުންގެ ދިރިއުޅުމަށް ހުރަސް އެޅެމުން ދާތީ، ކޮންމެ ދުވަހަކު ވެސް މިހާރު މުޒާހަރާތައް އޮވެ އެވެ. އަދި ދުވަހަކަށް ވުރެ ދުވަހެއް މުޒާހަރާތައް ހޫނުވަމުންދާ ކަމަށް ރިޕޯޓުތައް ބުނެ އެވެ.
