ސްރީލަންކާއަށް ކުރިމަތިވެފައިވާ މާލީ އަދި އިގްތިސާދީ ކާރިސާއިން އަރައިގަތުމަށް ޗައިނާގެ އިތުރު އެހީތެރިކަމަށް އެދިއްޖެ އެވެ.
ލަންކާގެ ޑެއިލީ މިރާ ނޫހުން ބުނީ ޗައިނާގެ ލޯންތައް ފަސްކޮށްދިނުމާއި، ޒަރޫރީ ތަކެތީގެ އިމްޕޯޓަށް ކްރެޑިޓް ލައިނެއް ދޫކުރަން ލަންކާ ސަރުކާރުން އެދިފައިވެ އެވެ.
ޗައިނާގެ ބޭންކްތަކަށް ލޯންތައް އަނބުރާ ދެއްކުމަށް މި އަހަރު އެކަނިވެސް 100 މިލިއަން ޑޮލަރަށް ވުރެ ބޮޑު އަދަދެއް ސްރީލަންކާއިން ހޭދަކުރަން ޖެހެ އެވެ.
މަސްދަރުތަކާ ހަވާލަދީ ޑެއިލީ މިރާ ނޫހުން ބުނީ އިގްތިސާދީ އަދި މާލީ ކާރިސާ ހަމައަކަށް އެޅެންދެން ލޯންތައް އަނބުރާ ދެއްކުން ފަސްކޮށްދިނުމަށް ސަރުކާރުން އެދިފައިވެ އެވެ.
އޭގެ އިތުރުން ލަންކާއަށް ބޭނުންވާ ޒަރޫރީ ތަކެތި ޗައިނާއިން އިމްޕޯޓް ކުރުމަށް، ކްރެޑިޓް ލައިނެއް ދޫކޮށްދިނުމަށް ވެސް އެދިފައިވެ އެވެ. އެއީ ލަންކާގެ އެކި ސިނާއަތްތަކުގެ މަސައްކަތަށް ބޭނުންވާ ތަކެތި އިމްޕޯޓް ކުރުމަށެވެ.
ޗައިނާ އެމްބަސީގެ ތަރުޖަމާނަކު ވިދާޅުވީ ލަންކާ ސަރުކާރުން އިތުރު މާލީ އެހީއަށް އެދިފައިވާ ކަމަށާއި އެކަމާ ގުޅޭ މަސައްކަތްތައް ދެ ގައުމުން ގުޅިގެން ކުރަމުންދާ ކަމަށެވެ.
މިދިޔަ ހަފްތާގައި ލަންކާއިން ވަނީ އެއް ބިލިއަން ޑޮލަރުގެ ކްރެޑިޓް ލައިނެއްގައި އިންޑިއާއާ އެކު ސޮއިކޮށްފަ އެވެ. އެއީ ޒަރޫރީ ކާބޯތަކެއްޗާއި ބޭސް އިމްޕޯޓް ކުރުމަށެވެ. އޭގެ އިތުރުން އިންޑިއާއިން ތެޔޮ ގަންނަން 500 މިލިއަން ޑޮލަރުގެ ކްރެޑިޓް ލައިނެއް ވެސް އޭގެ ކުރިން ދޫކުރި އެވެ.
