ފައިނަލްގައި ފަސޭހަކަމާ އެކު ބެންޗު ބަލިކޮށް ގައުމީ ބާސްކެޓްބޯޅަ މުބާރާތުގެ ތަށި ސައިކްލޯން ބީސީ އިން ހޯދައިފި އެވެ.
ސައިކްލޯނުން އެންމެ ފަހުން ގައުމީ ބާސްކެޓްބޯޅަ މުބާރާތުގެ ތަށި ހޯދީ 2019 ވަނަ އަހަރުގަ އެވެ. އެންމެ ފަހުން 2020 ގައި އެ ޓީމުން ގައުމީ ލީގުގައި ވާދަ ނުކުރެ އެވެ. އެ ފަހަރު އެ ޓީމުގެ ގިނަ ކުޅުންތެރިން ކުޅުނީ މިދިޔަ އަހަރު ޗެމްޕިއަންކަން ހޯދި ކުއީންސް ބީސީ އަށެވެ. އެނބުރި އައިސް ސައިކްލޯނުން ގައުމީ ލީގާއި ގައުމީ މުބާރާތުގެ ޗެމްޕިއަންކަން ހޯދީ ކުޅުނު އެއްވެސް މެޗަކުން ބަލި ނުވެ އެވެ.
ގައުމީ ފައިނަލުގައި މުޅިން އަލަށް ކުޅުނު ބެންޗާއި ވާދަކޮށް ސައިކްލޯނުން މެޗު ކާމިޔާބުކުރީ 95-43 ޕޮއިންޓުންނެވެ. މެޗުގެ ފުރަތަމަ ކުއާޓާ އިން ފެށިގެން ސައިކްލޯން އޮތީ ލީޑުގަ އެވެ. އެ ޓީމުގެ ބިދޭސީ ކުޅުންތެރިޔާ ބްރޮންޔަކާއި ޝައިލާން އަފްޒަލްގެ މޮޅު ކުޅުމާ އެކު ސައިކްލޯނުން ފުރަތަމަ ދެ ކުއާޓާ ނިންމާލީ 26 ޕޮއިންޓުގެ ލީޑަކާ އެކުގަ އެވެ.
ފަހު ދެ ކުއާާޓާގައި ސައިކްލޯން އާއި ބެންޗު ސްޕޯޓްސް އިން ވެސް ދެ ޓީމުގެ ބެންޗުގައި ތިބި ގިނަ ކުޅުންތެރިންނަށް ފުރުސަތު ދިނެވެ. ބެންޗަށް ސްކޯގެ ފަރަގު ކުޑަކޮށްލެވުނީ މެޗުގެ ފަހު ކުއާޓާގައި ސްކޯކުރި ޕޮއިންޓްތަކާ އެކުގަ އެވެ.
ފައިނަލް މެޗުގެ މޮޅު ކުޅުންތެރިޔާގެ މަގާމާއި، މުބާރާތުގެ މޮޅު ކުޅުންތެރިޔާގެ މަގާމް ހޯދީ ސައިކްލޯންގެ ބިދޭސީ ކުޅުންތެރިޔާ އެނާ އެވެ. އެނާ އަކީ ގައުމީ ލީގާއި ގައުމީ މުބާރާތުގެ އަންހެން ޑިވިޝަންގައި މި އަހަރު ކުޅުނު ހަމައެކަނި ބިދޭސީ ކުޅުންތެރިޔާ އެވެ.
ސައިކްލޯނުން ފައިނަލަށް ނުކުތީ ވެސް ތަށި ހޯދޭނެ ކަމުގެ ޔަގީންކަމާ އެކު
ޗެމްޕިއަންކަން ހޯދި ސައިކްލޯން ބީސީގެ ކޯޗު އަހުމަދު ނަޒީފް (ނަޒީ) ބުނީ ލީގުގައި ބެންޗާއި ދެކޮޅަށް ކުޅުނު މެޗުތަކުގައި ނުކުތް ނަތީޖާތަކާ އެކު ފައިނަލް މެޗަށް ނުކުތްއިރު ވެސް ޗެމްޕިއަންކަން ހޯދޭނެ ކަމުގެ އިތުބާރު އޮތް ކަމަށެވެ.
"ފައިނަލަށް އައިއިރުވެސް ޔަގީންކަން އޮތް ވަރަށް ބޮޑަށް، އަނެއްކޮޅުން އަޅުގަނޑުމެން ޓީމުގެ ކުޅުންތެރިންގެ ސްކޯރިން ރޭޓްވެސް ވަރަށް ރަނގަޅު. އެހެންވީމަ އެތަންކޮޅު ވެެސް މެޗުން ފެނުނު ތަފާތަކަށް،" 2019 ގައި ވެސް ސައިކްލޯނަށް ތަށި ހޯދައިދިން ނަޒީ ބުންޏެވެ.
ނަޒީފް ވަނީ މި ކާމިޔާބީ ހޯދުމަށް ޓީމުގެ ބިދޭސީ ކުޅުންތެރިޔާ އެނާ ދެއްކި ކުޅުމާއިއެކު ޓީމްގެ ދިވެހި ހުރިހާ ކުޅުންތެރިން ދެއްކި ކުޅުންވެސް ފާހަގަކޮށްފަ އެވެ.
ބެންޗަށް އޮތް ޕްރެޝަރު ބޮޑު
ފައިނަލުގައި އަލަށް ކުޅުނު ބެންޗު ސްޕޯޓްސް ކުލަބުގެ ކޯޗު މުހައްމަދު ޝާހިދު ބުނީ ފައިނަލްގައި ފެނުނީ ޓީމްގެ އަސްލު ފެންވަރު ނޫން ކަމަށެވެ. ބޭނުންވި ގޭމް ޕްލޭނާއި އެއް ގޮތަށް ނުކުޅެވުނު ކަމަށް ވެސް ޝާހިދު ވަނީ ބުނެފަ އެވެ.
އޭނާ ބުނީ ފައިނަލް މެޗުގައި ދިމާވި އެންމެ ބޮޑު މައްސަލައަކީ އެޓީމުން ގިނަ ފުރުސަތުތަކެއް ހޯދައި ސްކޯކުރަން މަސައްކަތްކުރި ނަމަވެސް ހުސް ފުރުސަތުތަކުގައިވެސް ސްކޯ ނުކުރެވުންކަމަށެވެ.
"ރަނގަޅަށް އޮފެންސްގައި ބޭނުންވި ގޭމް ޕްލޭން ސްޓު ނުކުރެވިގެން އުޅެނިކޮށް ސައިކްލޯނުން ލީޑު ނަގައި ފަރަގު ބޮޑުކޮށްލީ. ގިނަ އެޓެމްޕްޓްތަކެއް ކުރި އެހެންނަމަވެސް ސްކޯ އެއް ނުކުރެވުނު. އެއީ އަސްލު އެންމެ ބޮޑު މައްސަލައަކީ،" ޝާހިދު ބުންޏެވެ.
ބެންޗުގެ ކޯޗު ބުނީ ޑިފެންސްގައި ރަނގަޅަށް ކުޅެވުނު ނަމަވެސް ފައިނަލް މެޗުގެ ޕްރެޝަރާ އެކު ޓީމަށް އޮފެންސްގައި އެދެވޭ ކުޅުމެއް ނުދެއްކުނު ކަމަށެވެ.
