ސްޕޯޓްސް އެވޯޑް ހަފްލާއަށް ރާއްޖެ ވަޑައިގެންނެވި ސްރީލަންކާގެ ސްޕޯޓްސް މިނިސްޓަރު ނަމާލް ރާޖަޕަކްސަ، މޫދު ކުޅިވަރު ހަރަކާތްތަކުގައި އުޅުއްވާ މަންޒަރު ފެންނަ ވީޑިއޯ އާއި ފޮޓޯ އާއްމުވުމުން ލަންކާގެ ސޯޝަލް މީޑިއާ ހޫނުވެއްޖެ އެވެ.
ހުކުރު ދުވަހު އާއްމުވި ފޮޓޯ އާއި ވީޑިއޯއިން ފެންނަނީ ރާއްޖޭގައި ނަމާލް ފްލައިބޯޑިން އަދި ޖެޓް ސްކީ ދުއްވާ މަންޒަރެވެ.
ސޯޝަލް މީޑިއާގައި ފާޑުކީ ފަރާތްތަކުން ބުނީ ސްރީލަންކާއަށް ބޮޑު އިގްތިސާދީ ކާރިސާއެއް ކުރިމަތިވެފައިވާ ދަނޑިވަޅެއްގައި ނަމާލް ރާއްޖެ ވަޑައިގެންނެވުން ބަލައިނުގަނެވޭނެ ކަމަށެވެ. ނަމަވެސް ލަންކާގެ ޑެއިލީ މިރާ ނޫހުން ސުވާލު ކުރުމުން ނަމާކް ވަނީ ރާއްޖެއަށް ކުރެއްވި ދަތުރު ދިފާއު ކުރައްވާފަ އެވެ.
"އަޅުގަނޑު ރާއްޖެ އައިސް މި ހުރީ އެއް ދުވަހަށް، ރާއްޖޭގެ ސްޕޯޓްސް މިނިސްޓަރުގެ ދައުވަތަކަށް، ރާއްޖޭގެ ގައުމީ ސްޕޯޓްސް އެވޯޑް ހަފްލާގައި ބައިވެރިވުމަށް. މި ދަތުރު މުހިއްމު ވަނީ ރާއްޖެއަކީ ލަންކާގެ ގާތް އެކުވެރިޔަކަށް ވާތީ،" ނަމާލް ވިދާޅުވި ކަމަށް އެ ނޫހުގައި ވެ އެވެ.
އޭގެ އިތުރުން ދަތުރުގެ އެއްވެސް ކަމަކަށް ލަންކާ ސަރުކާރުން ހޭދަ ނުކުރާ ކަމަށް ވިދާޅުވި އެވެ.
"ފިލާ ތިވެގެން ކާރިސާއަކަށް ހައްލެއް ނުލިބޭނެ. އަޅުގަނޑުމެން މީހުންގެ ތެރެއަށް ނުކުމެ، ލަންކާގެ ފަތުރުވެރިކަން ކުރިއަރުވަން ޖެހޭ. އެކަމުގައި ރާއްޖެ ވަރަށް މުހިއްމު އަދި ސްޕޯޓްސް ފަތުރުވެރިމަކީ އަޅުގަނޑުމެން ވަރަށް ސީރިއަސްކޮށް ވިސްނަމުންދާ ކަމެއް. ރާއްޖެއިން އިތުރު ވަޒީފާގެ ފުރުސަތުތައް ވެސް ހޯދަން ޖެހޭ. ލަންކާ ޒުވާނުންނަށް އެންމެ ގިނައިން ވަޒީފާ ލިބެނީ ރާއްޖެ އާއި މެދުއިރުމަތިން."
