ސްރީ ލަންކާގައި މިހާރު ކުރިއަށްދާ ކޮމަންވެލްތު ބީޗްވޮލީބޯޅަ ކޮލިފައިންގައި ރާއްޖޭން ވާދަކުރާ ޕެއާ، އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް) މިއަދު ކުޅުނު ދެ ވަނަ މެޗުން ސިންގަޕޫރުގެ ޕެއާ އަތުން މޮޅުވެ، ފައިނަލުގެ ޖާގައެއް ހޯދުމާ ގާތަށް ޖެހިލައިފި އެވެ.
މި ފަހަރުގެ މުބާރާތުގައި ރާއްޖޭގެ އެޑަމް އާއި ކުޑަކާއްޓޭގެ ޕެއާ ކުޅެން ޖެހިފައިވަނީ ލަންކާ، މެލޭޝިއާ އަދި ސިންގަޕޫރާ ދެކޮޅަށެވެ. މިއަދު ހެނދުނު ލަންކާގެ ޕެއާ އަޝެން އާއި މަލިންތާގެ ޕެއާ އަތުން ބަލިވީ 21-18 އާއި 21-15 އިންނެވެ. ދެ ވަނަ މެޗުގައި މިއަދު ހަވީރު ރާއްޖޭން ވަނީ ސިންގަޕޫރުގެ ޕެއާ ޒިހާއޯ ރޭމެންގް ގެ ޕެއާ އަތުން 21-12 އާއި 21-08 އިން މޮޅުވެފަ އެެވެ.
ރާއްޖޭން މާދަމާ މެލޭޝިއާގެ ޕެއާ އަތުން ހެދުނު ކުޅޭ މެޗުން މޮޅުވެއްޖެނަމަ މާދަމާ ހަވީރު ކުޅޭ ކޮމަންވެލްތު ކޮލިފައިން ފައިނަލުން ފުރުސަތު ލިބޭނެ އެވެ. ސިންގަޕޫރު ޕެއާ ވަނީ 21-19، 21-11 އިން މެލޭޝިއާ ބަލިކޮށްފަ އެވެ. މިއަދު ހަވީރު މެލޭޝިއާގެ ޕެއާ ވަނީ ލަންކާ އަތުން 16-21، 15-21 އިން ބަލިވެފަ އެވެ. އެހެންކަމުން، މާދަމާގެ މެޗަށް ނުކުންނައިރު ވެސް މެލޭޝިއާ އަށް ފައިނަލުގެ ފުރުސަތު ނެތެވެ. ފައިނަލުގެ ޖާގަ ބޮޑަށް ހުޅުވިފައި އޮތީ ދެ މޮޅު ހޯދި ލަންކާ އަށެވެ. ރާއްޖެ އާއި ސިންގަޕޫރަށް އެއް މޮޅު ލިބިފައިވާއިރު، މާދަމާގެ މެޗުތައް މި ދެ ޓީމަށް މުހިންމުވާނެ އެވެ.
މި ފަހަރުގެ ކޮމަންވެލްތު ކޮލިފައިން އަކީ އެޑަމް އާއި ކުޑަކާއްޓެ ބީޗްވޮލީބޯޅައިގެ ޕެއާއެއްގެ ގޮތުގައި ކުޅޭ ދެ ވަނަ މުބާރާތެވެ. އެންމެ ފުރަތަމަ މުބާރާތަކީ މިދިޔަ މަހު ލަންކާގައި ބޭއްވި ސެންޓްރަލް ޒޯން ބީޗް ވޮލީބޯޅަ މުބާރާތެވެ. އެޑަމް އަކީ މި ފަަހަރު މޯލްޑިވްސް ސްޕޯޓްސް އެވޯޑްސްގައި ހޮވި އެންމެ މޮޅު ވޮލީބޯޅަ ކުޅުންތެރިޔާ އެވެ. ގަދަ ތިން ކުޅުންތެރިންގެ ތެރޭގައި ކުޑަކާއްޓެ ވެސް ހިމެނެ އެވެ. ކުޑަކާއްޓެ މީގެ ކުރިން ވަނީ ގިނަ ފަހަރުތަކެއްގެ މަތިން ރާއްޖޭގެ މޮޅު ކުޅުންތެރިޔާގެ އެވޯޑް ހޯދައިފަ އެވެ.
އަންނަ ޖުލައި މަހު ފަހުކޮޅު އިންގްލެންޑްގެ ބާމިންހަމްގައި ފަށާ ކޮމަންވެލްތު ކޮލިފައިންގައި ވާދަކުރުމުގެ ކުރިން ޓްރެއިނިންއެއްގެ ގޮތުން ގައުމީ ބީޗްވޮލީބޯޅަ ޓީމު ވަނީ ގަތަރުގައި ކޭމްޕެއް ބާއްވައިފަ އެވެ. ގަތަރު ޓްރެއިނިން ކޭމްޕްގައި ކުޑަކާއްޓެ އާއި އެޑަމްގެ ޕެއާގެ އިތުރުން ގައުމީ ކޯޗު ވިނީޝިއުސްއާ އެކު ރާއްޖޭގެ އަނެއް ޕެއާ ކަމަށްވާ، އަހުމަދު މުހައްމަދު (ކޯކޭ) އާއި މުހައްމަދު އަލީ (ޑެންޒޯ)ގެ ޕެއާ ވެސް ބައިވެރިވި އެވެ. ބީޗްވޮލީބޯޅަ ކުޅުންތެރިޔާ، ޝިއުނާޒް އަބްދުލް ވާހިދު (މަންކޭ) ހަރަކާތްތެރިވަމުން އަންނަނީ އެސިސްޓަންޓް ކޯޗެއްގެ ގޮތުގަ އެވެ.
