ޓިއުރިން (މާޗް 17) - ޔުއެފާ ޗެމްޕިއަންސް ލީގުގައި ރޭ ވިޔަރެއާލުން ޔުވެންޓަސް ދަނޑުގައި އެ ޓީމު 3-0 އިން ބަލިކޮށް މުބާރާތުން ކަޓުވާލިއިރު، ފަހަތުން އަރައި 2-1 އިން ލިލް ބަލިކުރި އެންމެ ފަހުގެ ޗެމްޕިއަން ޗެލްސީ ވެސް މުބާރާތުގެ ކުއާޓާ ފައިނަލުން ފުރުސަތު ހޯދައިފި އެވެ.
މިދިޔަ މަހު ވިޔަރެއާލް ދަނޑުގައި ކުޅުނު ފުރަތަމަ ލެގުގައި އޮތީ ދެ ޓީމު 1-1 އިން އެއްވަރުވެފަ އެވެ. އެހެންވެ، ރޭގެ މެޗަށް ނުކުތްއިރު ވެސް ވިޔަރެއާލާއި ޔުވެންޓަސް އަށް ޔަގީންވެފައި އޮތް ކަަމަކީ މޮޅުވާ ޓީމަކަށް ކުއާޓާގެ ޖާގަ ލިބޭނެ ކަމެވެ. ވިޔަރެއާލުން ގޯލުތައް ޖެހީ މެޗުގެ ފަހު 15 މިނިޓް ތެރޭގަ އެވެ.
ވިޔަރެއާލުން ފުރަތަމަ ގޯލު ޖެހީ މެޗުގެ 78 ވަނަ މިނިޓްގައި ޕެނަލްޓީ އަކުން ޖެރާޑް މޮރޭނޯ އެވެ. މިއީ ފްރާންސިސް ކޮކަލިން އަށް އޭރިއާތެރެއިން ޑެނިއަލް ރުގާނީ ކުރި ފައުލަކަށް ރެފްރީ ދިން ޕެނަލްޓީއެކެވެ. މޮރޭނޯ ޖެހި ޕެނަލްޓީ ގޯލަށް ވަނީ ޔުވެންޓަސް ކީޕަރު ވޮޒްޝިއޭ ޝެޒްނީ އަތުގައި ޖެހިފަ އެވެ. މެޗުގެ 85 ވަނަ މިނިޓްގައި ވިޔަރެއާލުން ދެ ވަނަ ގޯލު ޖެހީ ކޯނަރެއްގައި ހުރަސްވި ބޯޅައަކުން ސްޕެއިންގެ ޑިފެންޑަރު ޕައު ޓޮރޭޒް އެވެ.
އިތުރު ވަގުތުގެ ދެ ވަނަ މިނިޓްގައި ޔުވެންޓަސް ކޮޅަށް ވިޔަރެއާލުން ތިން ވަނަ ގޯލު ޖެހީ ވެސް ޕެނަލްޓީ އަކުންނެވެ. މި ގޯލު ޖެހީ އާނައުޓް ޑަންޖޫމާ އެވެ. މިއީ ޔުވެންޓަސްގެ މަތައިސް ޑި ލިޓް އަތުން ބޯޅައިގައި ޖެއްސުމުން ލިބުނު ޕެނަލްޓީއެކެވެ.
މިއީ ޗެމްޕިއަންސް ލީގުގެ ގަދަ 16 ބުރުން ޖެހިޖެހިގެން ޔުވެންޓަސް ކެޓި ތިން ވަނަ ފަހަރެވެ. މީގެ ކުރިން 2020 ގައި ލިޔޯން އަތުން ކެޓިއިރު، 2021 ގައި ކެޓީ ޕޯޓޯ އަތުންނެވެ.
ލިލްގެ ޖާލޯ (ކ) ކައިރިން ޗެލްސީގެ މަައުންޓް ބޯޅަ ހިފައިގެންދެވޭތޯ މަސައްކަތްކުރަނީ.-- ފޮޓޯ: އޭއެފްޕީ
ރޭ ލިލް ދަނޑަށް ޗެލްސީން ނުކުތްއިރު، ފުރަތަަމަ ލެގުގައި 2-0 އިން މޮޅުވެފައި އޮތް ނަމަވެސް ކުރިމަތިވެފައި އޮތް ނުތަނަވަސްކަމަކީ ރަޝިއާ އާއި ޔޫކްރެއިން ހަނގުރާމަ މައްސަަލައިގައި ޗެލްސީގެ ރަޝިއާ މަހުޖަނު ރޯމަން އަބްރަމޮވިޗްގެ ވިޔަފާރިތަކަށް އަޅާފައިވާ ދަތިކުރުމުގެ ފިޔަވަޅުގެ އަސަރު ޗެލްސީ އަށް ކުރަމުންދާތީ އެވެ. ރޭގެ މެޗުގެ ކުރިން ވެސް ލިލް ދަނޑު ބޭރުގައި ޗެލްސީ ސަޕޯޓަރުންތަކަކަށް ދަނޑަށް ނުވަދެވިގެން ފުލުހުންނާ ކުރިމަތިލުންތަކެއް ދިޔަ އެވެ.
މެޗުގެ 38 ވަނަ މިނިޓްގައި އޭރިއާތެރެއިން ޗެލްސީގެ ޖޯޖީނިއޯ އަތުގައި ބޯޅަ ޖެހުމުން ދިން ޕެނަލްޓީ ލިލްގެ ތުރުކީ ފޯވާޑް ބުރަކް ޔިލްމާޒް ވަނީ ކާމިޔާބުކޮށްފަ އެވެ. އެކަމަކު، ފުރަތަމަ ހާފުގެ އިތުރު ވަގުތުގެ ތިން ވަނަ މިނިޓްގައި ޖޯޖީނިއޯ ދިން ބޯޅައަކުން ތިރިިތިރިން ގޯލުގެ ދުރު ކަނަށް ބޯޅަ ފޮނުވާލައިގެން ކްރިސްޓިއަން ޕުލިސިޗް ވަނީ ޗެލްސީ އަށް އެއްވަރުކޮށްދީފަ އެވެ. ޗެލްސީ މޮޅުކޮށްދިން ގޯލު ޖެހީ 71 ވަނަ މިނިޓްގައި މޭސަން މައުންޓް ނެގި ހުރަހަކުން ސެޒާ އަޒްޕިލިކުއޭޓާ ފޮނުވާލި ވޮލީއަކުންނެވެ.
ޗެމްޕިއަންސް ލީގުގެ ކުއާޓާ ފައިނަލުން ފުރުސަތު ހޯދާފައިވަނީ ޗެލްސީ އާއި ވިޔަރެއާލްގެ އިތުރުން، ރެއާލް މެޑްރިޑް، ލިވަޕޫލް، ބަޔާން މިއުނިކް، ބެންފީކާ، އެތުލެޓިކޯ މެޑްރިޑް އަދި މެންޗެސްޓާ ސިޓީ އެވެ.
