ދިމާވާ މައްސަލަތަކުގައި ވާހަކަ ދައްކަން ނޭނގުމަކީ މި ޖީލަށް ދިމާވެފައިވާ ނުކުޅެދުންތެރިކަމެކެވެ. ޓެކްނޮލޮޖީގެ ދުނިޔެއަށް ފަރިތަވެ، ކިތަންމެ ދުރަށް އަޑު ގެންދަން އެނގުނަސް، އަސްލު ދިރިއުޅުމުގައި ހިނގާ ކަންކަމާއި ކުރިމަތި ލުމާއި، އަނެކާ ދައްކާ ވާހަކަ ކެތްތެރިކަމާއެކު އަޑު އެހުމުގެ ގާބިލުކަން އަހަރެމެންގެ ނެތެވެ. މި ގޯސް އާދައާ ހެދި އެތަކެއް އާއިލާ އެއް ރޫޅިއްޖެ އެވެ. މައިންބަފައިންނާއި ދަރިން ވަކިވެ، އެކުވެރިން ދުރުވެ، އޮފީހުގެ މާހައުލު ބައިބައި ވެއްޖެ އެވެ.
މިހެން ބުނުމުން ހިތަށް އަރާފާނެ އެވެ. ރައްޓެހި ރަހުމަތްތެރިންނާއި އާއިލާގެ މީހުންނަށްވުރެ ދުރު މީހުން މާ ރަނގަޅެވެ. އޯގާތެރި އެވެ. އިހަށް ދުވަހު ފޭސްބުކް އިން ދިމާވި މީހަކާ ހިއްސާކުރުމުން ވެސް ދިނީ މާ ރަނގަޅު ނަސޭހަތެކެވެ.
ތިއީ ކުށް ހީ އެކެވެ. ކަމެއް ބޮޑުވާއިރު އަބަދުވެސް ގާތުގައި އެހީތެރިވާން އޮންނާނީ އާއިލާ އެވެ. ހެޔޮ އެދޭ ރަހުމަތްތެރިންނެވެ. އެމީހުންނަކީ ކޮބައިކަން އެނގޭނަމަ، ވަގުތު އޮއްވައި އަތުގައި ހިފާށެވެ. ދުރުކޮށް ނުލާށެވެ. ކަންކަމާ ވާހަކަ ދައްކާށެވެ. ހައްލު ހޯދާށެވެ.
ވާހަކަ ނުދައްކައި ހިތު ތެރޭގައި ކިތަންމެ ޝަކުވާއެއް ބަހައްޓައިގެން ހުއްޓަސް އެްއްވެސް ކަމެއް ހައްލެއް ނުވާނެ އެވެ.
ހެޔޮ އެދޭ މީހުންގެ ވާހަކަ އަޑު އަހަންވާނެ، ހިއްސާކުރަންވީ އެމީހުންނާ
މި ބުނަނީ، ހުރިހާ ވާހަކަތަކެއް ދަންނަ އެންމެނާ ހިއްސާކުރާށެކޭ ނޫނެވެ. ރަނގަޅު ގޮތަކީ ވެސް އެއީ އެއް ނޫނެވެ. އެކަމަކު ތިމާ ދެކެ ލޯބިވާ މީހުންނަކީ ކޮބައިކަން އަމިއްލަ އަށް އެނގޭ އިރު، އެމީހުން ދުރުކޮށްލައި، އެމީހުން ހެޔޮ އެދޭތީ ބުނާ ވާހަކަތައް އަޑު ނޭހުމަކީ ހެދޭ ގޯހެކެވެ. އަމިއްލަ އަށް ހޯދާ ދެރަ އެކެވެ.
މާ ބޮޑު ކަމެއް އަދި ނުކޮށްދެވުނަސް، އެފަދަ މީހެއްގެ ފަރާތުން ލިބޭ ހިއްވަރުގެ ބަހަކީ ވެސް އުނދަގޫ ދަނޑިވަޅެއްގައި ހިތަށް ލިބޭނެ ފަރުވާ އެކެވެ.
"އަހަރެންގެ ފިރިމީހާ އަކީ ވަރަށް ރަނގަޅު މީހެއް. އެކަމަކު ދެމީހުންނަށް ރަނގަޅަށް ވާހަކަ އެއް ދައްކައި ނުލެވޭތާ އެތައް ދުވަހެއް މިވަނީ. އޭނަގެ ވަޒީފާ ގެއްލިގެން އެކަމުގެ ސްޓްރެސް ގައި އަބަދު އުޅެނީ. އަހަރެންނާ ވެސް އަނގައިން ބުނަނީ އެއް ނޫން. ވެގެން އުޅޭ ގޮތެއް ބުނެގެން ވާހަކަދައްކައިގެން ދޯ ހައްލެއް ވެސް ހޯދޭނީ. ވެދާނެ، އަހަންނަށް ކޮށްދެވޭނެ މާ ބޮޑު ކަމެއް ނެތްކަން ގަބޫލުކުރަނީ ކަމަށް،" 28 އަހަރުގެ މަރިޔަމްގެ ދެމަފިރިން ނުލާހިކު ލޯބިވެގެން ކުރި ކައިވެންޏަށް ފަސް އަހަރު ފުރި ދެ ކުދިން ލިބުނު އިރު މިހާރު އެ ދެމެދުގައި ވަނީ ބޯ ފާރެއް ލެވިފަ އެވެ. ވާހަކަ ދެއްކުމާއި ހިއްސާ ކުރުން މަދު ވެގެންނެވެ.
މިއީ ވަރަށް ގިނަ ފަހަރު ވާގޮތެކެވެ. ކަމެއް ދިމާވުމުން ގާތް މީހުންނާ ހިއްސާކޮށްގެން ލިބޭނެ ފައިދާއެއް ނޯންނަ ކަމަށް ގަބޫލުކުރާ މީހުން ގިނަ އެވެ. އަދި، ހިއްސާކުރިޔަސް، އެމީހުން ދައްކާ ވާހަކަ ތަކާއި ދޭ ނަސޭހަތް އެއްޗަކަށް ނުހަދަ އެވެ.
ވަކި ވަރަކަށް ވުރެ ބޮޑަށް މީހުން ގާތް ވުމުން، އެމީހުން ބުނާނެ އެއްޗިއްސާއި ކަން ކުރާނެ ގޮތް އެނގޭ ކަމަށް ގަބޫލުކުރެވޭ ގޮތްވެ އެވެ. އޭގެ ސަބަބުން އެ މީހުންގެ ގާތުގައި ހިއްސާ ކޮށްގެން އިތުރަށް ލިބޭނެ މޮޅެއް ނެތް ކަމަށް ގަބޫލުކުރެވެ އެވެ.
މިހާ ހިސާބަށް ދާއިރު، ފޯނުގެ މުހިއްމުކަން ބޮޑުވެ އެވެ. އެކަނިވެރިވެފައިވާ ކަމުގެ އިހުސާސް ކުރެވޭތީ ސޯޝަލް މީޑިއާ އަށް ގޮސް ހުސްވެ އެވެ. ސްޓްރެސް ކުޑަ ކޮށްލަން، ނުދަންނަ މީހުންނާއި ވާހަކަ ހިއްސާކުރެވޭ ގޮތްވެ އެވެ.
ވާހަކަ ނުދައްކައި ތިއްބައި ރައްޓެހިން ބީރައްޓެހިންނަށް ވެދާނެ!
އެންމެ ގާތް މީހުންނަކީ ވެސް އަބަދު އެއް ގޮތެއްގައި ތިބޭނެ މީހުންނެއް ނޫނެވެ. މީހަކު އިއްޔެ ހެނދުނު ވިސްނި ގޮތަށް މިއަދު ހަވީރު ނުވިސްނަފާނެ އެވެ. އެހެންކަމުން ވާހަކަ ދެއްކުން އެބަ މުހިއްމުވެ އެވެ. ކޮންމެ ދުވަހަކު ވެސް ހިއްސާކުރުން މުހިއްމެވެ. ނޫނީ އެންމެ ގާތުގައި ތިބޭ މީހުން ބީރައްޓެހިންނަށް ބަދަލުވާން މާ ގިނަ ދުވަހެއް ނުނަގާނެ އެވެ.
ބައެއް ފަހަރު ދަރިފުޅު ކުރާ ކަމަކުން މައިންބަފައިން ހައިރާންވެ އަންތަރީސް ވާންޖެހޭ ފަހަރު އާދެ އެވެ. ބައިވެރިޔާ ކޮށްލާ ކަމަކުން ސިކުނޑި ސުމަކަށް ދާ ފަހަރު ވެސް އާދެ އެވެ. އެކަމެއް އެއިން މީހަކު ކޮށްފާނެއެކޭ ހިތަށް ވެސް ނާރުވާތީ އެވެ. މިކަހަލަ ތަޖުރިބާ ތައް ކުރަން ޖެހެނީ އެކަކު އަނެކަކަށް އެނގެންޖެހޭ ވަރަށް ނޭނގޭތީ އެވެ. ވާހަކަ ދެއްކުމާއި އަޑު އެހުމާއި ވަގުތު ދިނުން މުހިއްމު ވަނީ މި ސަބަބާ ހެދި އެވެ.
އެހެންވީމަ، މިއަދުގެ ޝެޑިއުލް ބިޒީކޮށްދާނަމަ، ވަގުތެއް ކަނޑަ އަޅާށެވެ. އެންމެ ގާތް މީހުންނަށް ކުޑަ ވަގުތުކޮޅެއް ހުސްކޮށްލައި، ހިއްސާ ނުކޮށް އޮތް ވާހަކަ އެއް ހިއްސާކޮށްލާށެވެ. ހަގީގީ ގާތް މީހުންނަށް އަންޑަސްޓޭންޑް ވާނެ އެވެ.
އެކަކު އަނެކަކުގެ ވާހަކަ ތަކާއި އިހުސާސްތައް އަޑު އަހައި ދައްޗާއި އުފާ ޝެއާ ނުކުރެވޭ ނަމަ، ލޯތްބަކުން ކުރާނީ ވަކި ކީއް ހެއްޔެވެ؟
