ސްރީލަންކާއަށް ކުރިމަތިވެފައިވާ އިގްތިސާދީ އަދި މާލީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީ ހޯދަން ސަރުކާރުން ނިންމައިފި އެވެ.
ރައީސް ގޮތަބަޔާ ރާޖަޕަކްސަ ބުދަ ދުވަހު ދެއްވި ހިތާބެއްގައި ވިދާޅުވީ ގައުމަށް ވާނެ ފައިދާ އާއި ގެއްލުން ވަޒަން ކުރުމަށް އައިއެމްއެފްއާ ގުޅިގެން ކުރިއަށް ދާން ނިންމާފައިވާ ކަމަށެވެ.
ލަންކާއިން ދައްކަން ޖެހޭ ދަރަނިތައް ދެއްކުމުގައި އަމަލު ކުރާނެ ގޮތަކާ ގުޅޭ ގޮތުން ބައިނަލްއަގްވާމީ މާލީ އިދާރާތަކާއި އެކުވެރި ގައުމުތަކާ އެކު މަޝްވަރާ ކުރަމުންދާ ކަމަށް ގޮތަބަޔާ ވިދާޅުވި އެވެ.
އައިއެމްއެފްއާ ގުޅިގެން ކާރިސާއަށް ހައްލު ހޯދަން ނިންމާފައިވާ އިރު، ލަންކާ ސަރުކާރާއި އައިއެމްއެފްގެ ވެރިންނާ އެކު އަންގާރަ ދުވަހު މުހިއްމު ބައްދަލުވުމެއް ބޭއްވި އެވެ.
ލަންކާ ސަރުކާރުން އައިއެމްއެފްގެ އެހީ ހޯދަން ނިންމި އިރު، ބައެއް ތަޖުރިބާކާރުން ވަނީ މީގެ ކުރިން ވެސް އެ ނިންމުން ނިންމުމަށް ބާރު އަޅާފަ އެވެ. ނަމަވެސް ކުރިން ސަރުކާރުން އެ ގޮތް ބޭނުމެއް ނުވި އެވެ.
އައިއެމްއެފްގެ އެހީ ހޯދާ ނަމަ ކެބިނެޓުން އިސްތިއުފާ ދެއްވާނެ ކަމަށް ފެނުގެ ސަޕްލައިއާ ބެހޭ މިނިސްޓަރު ވަސުދެވާ ނާނަޔައްކަރަ ބުދަ ދުވަހު ވިދާޅުވި އެވެ.
އޭނާ ވިދާޅުވީ އައިއެމްއެފްގެ އެހީ ހޯދުމަކީ އެ އިދާރާގެ ޝަރުތުތަކަށް އަމަލު ކުރަން ލަންކާއަށް މަޖުބޫރު ވާނެ ނިންމުމެއް ކަމަށެވެ.
އެގޮތުން އާއްމުންގެ ދިރިއުޅުން ފަސޭހަކޮށްދޭން ވެލްފެއާއަށް ކުރާ ހަރަދު ކުޑަކޮށް، ދައުލަތުގެ އިދާރާތައް ޕްރައިވެޓައިޒްކޮށް، ތައުލީމާއި ސިއްހީ ދާއިރާއަށް ކުރާ ހޭދަ މަދުކުރަން ޖެހޭނެ ކަމަށް އޭނާ ފާހަގަކުރެއްވި އެވެ.
"އައިއެމްއެފްގެ އެފަދަ ޝަރުތުތަކެއް ބަލައިގަންނަ ސަރުކާރެއްގެ އެއްވެސް މަގާމެއްގައި ހުންނަން އަޅުގަނޑު ބޭނުމެއް ނޫން."
