ސްރީލަންކާގައި އަވަސް ރިޔާސީ އިންތިހާބެއް ބޭއްވުމަށް އިދިކޮޅު ލީޑަރު ސަޖިތު ޕްރޭމަދާސަ އަންގާރަ ދުވަހު ގޮވާލައްވައިފި އެވެ.
ސަމަގި ޖަނާ ބަލަވޭގަޔާ (އެސްޖޭބީ) ގެ މުޒާހަރާއެއްގައި ވެރިރަށް ކޮލޮމްބޯގައި ސަޕޯޓަރުންނާ ވާހަކަ ދައްކަވަމުން ސަޖިތު ވިދާޅުވީ ސަރުކާރު އިސްތިއުފާ ދޭންވީ ވަގުތު ޖެހިއްޖެ ކަމަށެވެ.
އަންގާރަ ދުވަހުގެ މުޒާހަރާ ފެށީ ކޮލޮމްބޯގެ ޕަބްލިކް ލައިބްރަރީ ކުރިމަތިންނެވެ. ނަމަވެސް ފަހުން މުޒާހަރާގެ ބައިވެރިން އެއްވީ ރައީސް އޮފީސް ކުރިމައްޗަށެވެ.
މުޒާހަރާގެ ބައިވެރިން ވަނީ ރައީސް އޮފީހުގެ ގޯތި ތެރެއަށް ފޭކު ސަންދޯކަކާއި މާބޮނޑިއެއް އެއްލާފަ އެވެ. ސެކިއުރިޓީ ބެލެހެއްޓުމުގައި އުޅުނީ ސްޕެޝަލް ޓާސްކް ފޯސް (އެސްޓީއެފް) ފުލުހުންނެވެ.
ރައީސް އޮފީސް ކައިރިއަށް އެއްވި މީހުން ޑިމާންޑް ކުރަމުން ދިޔައީ ރައީސް ގޮތަބަޔަ ރާޖަޕަކްސަ އޮފީހުން ނުކުމެވަޑައިގެންނެވުމަށެވެ.
އަވަސް އިންތިހާބަކަށް އިދކޮޅު ޕާޓީން ގޮވާލާފައިވާ އިރު، އެންމެ ފަހުން ލަންކާގެ ރިޔާސީ އިންތިހާބެއް އޮތީ 2019 ވަނަ އަހަރުގެ ނޮވެމްބަރު މަހު އެވެ.
އެ ފަހަރުގެ އިންތިހާބުގައި އިދިކޮޅު ލީޑަރު ސަޖިތު ވާދަކުރެއްވި ނަމަވެސް ކުރި ލިބުނީ މިހާރުގެ ރައީސް ގޮތަބަޔަ ރާޖަޕަކްސަ އަށެވެ.
ސްރީލަންކާގެ ސިޔާސީ މަޝްރަހު ހޫނުވެފައި މި ވަނީ އެ ގައުމުގެ މާލީ އަދި އިގްތިސާދީ ހާލަތު ވަރަށް ބޮޑަށް ގޯސްވެ، އާއްމުންގެ ދިރިއުޅުމަށް ހުރަސް އެޅިފައި ވަނިކޮށެވެ.
