ކިންގްސް ފޮރެކްސް އަށް ގެއްލުންވެ ބަދުނާމުވާ ގޮތަށް އަމަލުކޮށްފައި ވާތީ، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ބޭންކް އޮފް މޯލްޑިވްސް (ބީއެމްއެލް) އާ ދެކޮޅަށް ދައުވާ ކުރާނެ ކަމަށާއި، އިންވެސްޓް ކޮށްފައިވާ ފަރާތްތަކަށް ފައިސާ ދިނުމަށް ގޮތްތަކެއް ހޯދާނެ ކަމަށް ކިންގްސް ކެޕިޓަލް ހޯލްޑިންސް އިން ބުނެފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ކިންގްސް ކެޕިޓަލް ހޯލްޑިންސްގް ޗެއާމަން، ފެދޫ ދާއިރާގެ ކުރީގެ މެންބަރު އަލްހާން ފަހުމީ ވިދާޅުވީ މިދިޔަ ހަފުތާ ބަންދުގައި އެމްއެމްއޭ އިން ބަޔާނެއް ނެރެ، ބީއެމްއެލް އިން އެ ކުންފުނީގެ އެކައުންޓް ފްރީޒް ކޮށްފައިވާ ވަނީ ހަގީގަތް ރަނގަޅަށް އޮޅުން ނުލިފުލުވާ ވަރަށް ޒިންމާދާރުކަން ކުޑަކޮށް ކަމަށެެވެެ.
ރާއްޖޭގައި ފުޅާ ދާއިރާއެއްގައި ހިންގާ ޕޮންޒީ ސްކީމަކަށް އާންމުން ސަމާލުވުމަށް އެދި އެމްއެމްއޭ އިން ނެރެފައިވާ ބަޔާނުގައި ވަކި ބަޔެއްގެ ނަން ހާމަކޮށްފައި ނުވި ނަމަވެސް، އެ ބަޔާނުގެ ސަބަބުންނާއި، ބީއެމްއެލް އިން އެ ކުންފުނީގެ އެކައުންްޓް ފްރީޒް ކުރުމާއި ގުޅިގެން ގިނަ ނޫސް ތަކަކުން ކިންގްސް ފޮރެކްސް ބަދުނާމުވާ ގޮތަށް މައުލޫމާތު ފަތުރާ އެ ކުންފުނީގެ އިތުބާރު ގެއްލުވާލަން މަަސައްކަތް ކޮށްފައިވާ ކަމަށް އަލްހާން ތުހުމަތު ކުރެއްވި އެވެ.
"މި މައްސްލާގައި ބޭންކް އޮފް މޯލްޑިވްސް އާ ވާހަކަ ދައްކައިފިން މިކަން ހައްލު ކުރަން، މިކަން މި ކުރިއަށް ގެންދިއައީ ކޮން ހަމައަކުން ކޮން އުސީލަކުންކަން ބަޔާންކޮށް ދިނީމަ އެ ބޭފުޅުން ވިދާޅުވީ އެ ގޮތެއް ގަބޫލެއް ނުކުރަމޭ، އެކައުންޓް އެކްޓިވޭޓް ކޮށްދެވޭކަށް ނެތޭ،" އަލްހާން ވިދާޅުވި އެވެ. "އަޅުގަނޑު މި ގަސްދުކުރީ މިވަރުގެ ބޮޑު ގެއްލުމެެއް މިވަރުގެ ބޮޑު ބަދުނާމެއް ދިނީމަ، އެހެންވީމަ ބޭންކް އޮފް މޯލްޑްވްސް އާ އެމްއެމްއޭގެ މައްޗަށް އަޅުގަނޑު ގަސްދުކުރަނީ ދައުވާކުރަން، ކުންފުނީގެ ގުޑްވިލް ގެއްލި އަޅުގަނޑު އަބުރު ގެއްލި ލިބުނު މާލީ ބޮޑު ގެއްލުމުގެ ބަދަލު ހޯދުމަށް ދައުވާކުރަން،"
އަލްހާންގެ ލޯޔަރުންގެ ޓީމުން ބުނީ އަންނަ ހަފުތާގެ ތެރޭގައި ދައުވާ ކޯޓަށް ހުށަހަޅާނެ ކަމަށެވެ.
އަލްހާން ވިދާޅުވި ގޮތުގައި މިދިޔަ ޑިސެމްބަރު މަހު ހުޅުވާލި ކިންގްސް ފޮރެކްސް ގެ އިންވެސްޓްމަންޓް ޕްލޭން ތަކުގައި 1،600 އަށްވުރެ ގިނަ މީހުން އިންވެސްޓު ކޮށްފައިވާއިރު، ދަތި ކުރުމުގެ ފިޔަވަޅުތައް އެލުމާ ގުޅިގެން 30 މިލިއަން ރުފިޔާ އެ ކުންފުންޏަށް ގެއްލުންވާނެ އެވެ. ފޮރެކްސް ޓްރޭޑް ކުރުމަށް އެކި ފަރާތްތަކުން އިންވެސްޓް ކޮށްފައިވާ ފައިސާ ގެ އަދަދެއް އެ ކުންފުނިން ހާމައެއް ނުރެ އެވެ. ކިންގްސް ފޮރެކްސް ގެ އެންމެ ކުޑަ އިންވެސްޓްމަންޓް ޕްލޭންގައިވާ ގޮތުގައި 10،000 އިންވެސްޓް ކުރުމުން، ޖުމްލަ 25،000 ރުފިޔާ، އަށް މަސް ދުވަހަށް ބަހާލައިގެން އިންވެސްޓް ކުރާ ފަރާތައް ލިބޭނެ އެވެ.
"އެއްވެސް ފަރާތްތަކަށް މަކަރުހަދާ އޮޅުވާލައިފައެއް ނޯންނާނެ، ހުރިހާ ފައިސާގެ މުއާމާލާތެއް ހިންގާފައިވާނީ ބޭންކް އޮފް މޯލްޑިވްސް މެދުވެރިކޮށް، ހުރިހާ ފަރާތްތަކާއެކު ވެސް ކޮށްފައިވާ ކޮމިޔުނިކޭޝަން ފެންނަށް ހުންނާނެ،" އަލްހާން ވިދާޅުވި އެވެ. "ވާހަކަ މިދައްކަނީ މިކަމުގެ ހަގީގަތް ނޭނގި ތިބެ، އަޅުގަނޑުމެންނަކީ ބޭރުގެ ފަރާތްތަކާއި އެފިލިއޭޓް ވެގެން ފޮރެކްސް ޓްރޭޑް ކުރާބައެއް."
ކިންގްސް ފޮރެކްސް އިން ބުނީ ކުރިއަށް އޮތް ދެ އަހަރު ދުވަހުގެ ތެރޭގައި އަނބުރާ ލިބޭ ގޮތަށް ބައެއް ފަރާތްތަކުން އިންވެސްޓް ކޮށްފައިވާއިރު، އިންވެސްޓް ކޮށްފައިވާ ހުރިހާ ފަރާތްތަކަށް ފައިސާ ދޫކުރޭނެ މަގެއް ހޯދުމަށް މަސައްކަތް ކުރަމުން ގެންދާ ކަމަށެވެ. އަލްހާން ވިދާޅުވީ ކުރިއަށް އޮތް ތަނުގައި ވެސް ބީއެމްއެލް އިން ހުރައްތައް ކުރިމާތިވާނެތީ، މިހާރު ނިންމާފައިވަނީ އިންވެސްޓަރުންގެ އީވޮލެޓް އަށް ފައިސާ ޖާމާކޮށްދޭން ކަމަށް އޭނާ ވިދާޅުވި އެވެ.
"އަޅުގަނޑުމެން ނުހުއްޓުވޭނެ، ޓްރޭޑް ކުރުމެއް ވެސް ނުހުއްޓުވޭނެ، މިކަން ހުއްޓުވަންޔާ ޖެހޭނީ އިންޓަނެޓް ކަނޑާލަން، ބޭންކް އޮފް މޯލްޑިވްސް ކަންބޮޑުވެގެން މި އުޅެނީ، ބޭންކުގައި ހުރި ފައިސާ ނަގައިގެން ގެނެސް ފޮރެކްސް ގައި އިންވެސްޓް ކުރާތީ، މިހާތަނަށް އިންވެސްޓް ކޮށްފައިވާ ފާރަތްތަކުގެ ތޭރޭގައި ހިމެނެނީ ޒިންމާދާރު، ކިޔަވައިގެން ތިބި ފަރާތްތައް،" އަލްހާން ވިދާޅުވި އެވެެ.
ކިންގްސް ފޮރެކްސް އިން ބުނީ ދުނިޔޭގެ އެންމެ ބޮޑު އެއް އޮންލައިން ބްރޯކާ ޑެރައިވް އާ އެކު އެއްބަސްވުމަކަށް އާދެވިފައިވާ ކަމާށާއި، ފޮރެކްސް ޓްރޭޑް ކުރުމުގައި ކުރިމަތިވެފައިވާ ދަތިތަކަށް ހައްލު ހޯދާއި ކުރިއަށް އޮތްތަކުގައި މާ ފުޅާކޮށް، ފޮރެކްސް ޓްރޭޑް ކުރުން ކުރިއަށް ގެންދާނެ ކަމަށެވެ.
