ސިފައިންގެ ޓްރެއިނިން ފުރިހަމަ ކުރަމުން ދަނިކޮށް ހާލު ދެރަވެގެން މާލެ ގެނެސް އައިޖީއެމްއެޗްގެ އައިސީޔޫގައި ފަރުވާދެމުންދިޔަ އަމާނުﷲ ޝަރީފް ވޯޑަށް ބަދަލުކޮށްފައިވާ ކަމަށް އާއިލައިން ބުނެފި އެވެ.
ޅ. މާފިލާފުށީގައި ސިފައިންގެ ތަމްރީނު ހަދަމުން ދިޔަ ދެ ޒުވާނަކު ހާލުދެރަވެ އައިޖީއެމްއެޗްގައި ފަރުވާދޭންފަށައިފައި ވަނީ މިދިޔަ ހަފްތާތެރޭގަ އެވެ. އެއީ އުމުރުން 19 އަހަރާއި 21 އަހަރުގެ ޒުވާނެކެވެ.
އޭގެ ތެރެއިން ހާލުދެރަވެ އައިސީޔޫގައި ފަރުވާދިން އުމުރުން 19 އަހަރުގެ އަމާންގެ ބައްޕަ، އަބްދުﷲ ޝަރީފް "އަދަދު" އަށް ބުނީ ރޭ އައިސީޔޫއިން ނެރެ ވޯޑަށް ބަދަލުކޮށްފައިވާ ކަމަށެވެ.
"އެމްއެންޑީއެފްގެ ޓްރެއިނިންއަކީ ބުރަ މަސައްކަތެއް. އެހެން އުޅޭ އުޅުމުގަ އެފަދަ ކަމެއް ދިމާވެދާނެ ކަމަށް އަޅުގަނޑުމެން ވެސް ގަބޫލު ކުރަން. ދެން އެއީ ހަމަ އެ ދުވަހު ދިމާވި ކަމަކަށް ވެސް ވެދާނެ،" ޝަރީފް ބުންޏެވެ.
ޝަރީފް ބުނީ އެ ދުވަހު ހޮސްޕިޓަލަށް ގެނެސް ދެއްކުމުން ޑޮކްޓަރުން ތިން ކަމެއް ފާހަގަ ކުރި ކަމަށާއި އެގޮތުން ހިތުގެ ވިންދު ދަށްވުމުން އައިސީޔޫއަށްލީ ކަމަށެވެ.
"އެމްއެންޑީއެފްގެ އޮފިޝަލުންވެސް ތިއްބާ އަޅުގަނޑު ކައިރީ ހިތުގެ ޑޮކްޓަރު ވިދާޅުވީ މަސްތަކަށް ތަދުވުމާއި ވިންދު ދަށްވުމާއި މިއީ މިފަދަ ޓްރެއިނިންއެއްގަ ގިނަ ބަޔަކަށް ދިމާވެދާނެ ކަމެކޭ. އެގޮތަށް ދެތިން ކަމެއް ފާހަގަ ކޮށްފައި އިން," ޝަރީފް ބުންޏެވެ.
ނަމަވެސް މިހާރު އަމާންގެ ހާލު ރަނގަޅު ކަމަށް އޭނާ ބުންޏެވެ.
އަމާންގެ އިތުރުން ހޮސްޕިޓަލަށް ގެނެސް ފަރުވާދެމުންދިޔަ 21 އަހަރުގެ ޒުވާނާ ވެސް އޮތީ ވޯޑުގަ އެވެ. އައިޖީއެމްއެޗުން ބުނީ އޭނަގެ ހާލު ވެސް ރަނގަޅު ކަމަށެވެ.
ޓްރެއިނިންގް ހަދަމުންދިޔަ ތިން ހާދިސާ ކައިރީގައި ހިނގާފައި ވާއިރު، ޓްރެއިނިންގަ ހަދަމުންދިޔަ 19 އަހަރުގެ ޒުވާނަކު ވަނީ މަރު ވެސް ވެފަ އެވެ. އެއީ މުހައްމަދު ރާފިލް އެވެ. އާއިލާއިން ތުހުމަތު ކުރާ ގޮތުގައި ރާފިލް މަރުވުމުގައި އެމްއެންޑީއެފްގެ އިހުމާލުތަކެއް އެބަހުއްޓެވެ.
އެގޮތުން ހުން އައިސް ބަލިވެ އުޅޭކަން ބުނަން މެސެޖުކޮށް 11 ފަހަރު ގުޅުމުންވެސް އިމަޖެންސީ ފަރުވާ ނުލިބި މަރުވީ ކަމަށް އާއިލާއިން ބުނެ އެވެ.
އެ ތިން ހާދިސާގައި އެކުދިންގެ ހާލު ދެރަވާން މެދުވެރި ސަބަބުތައް ދެނެގަތުމަށް ހާއްސަ ކޮމިޓީއެއް އެކުލަވާލައި ތަހުގީގެއް ވެސް ވަނީ ފަށައިފަ އެވެ.
އެ ހާދިސާތަކާ ގުޅިގެން އެމްއެންޑީއެފުން ބުނެފައި ވަނީ އަސްކަރީ ތަމްރީނުތައް ބުރަވާނެ ކަމަށާއި، އެކަމުގެ ތެރޭގައި ރިސްކުތައް ހިމެނޭނެ ކަމަށެވެ. އަދި އެ ތަމްރީނުތަކަށް މީހުން ނެގުމުގެ ކުރިން އެ މީހުންގެ ފިޒިކަލް އަދި މެޑިކަލް ޓެސްޓުތަކެއް ހަދާކަން އެމްއެންޑީއެފުން ފާހަގަކުރި އެވެ.
